ازاي تحطي البلاشر حسب شكل وشك ؟
البلاشر من الخطوات المهمة في مكياجنا لانه بيعتبر التاتش النهائي اللي بيدي لون حلو للخدود وبيدي حياة للمكياج بتاعنا وبيظهره اكتر بس في حاجات كتير لازم نعرفها قبل ما نحط البلاشر, لازم نعرف ايه نوع البلاشر المناسب لبشرتنا واللون المناسب وايه الطريقة الصح اللي نحط بيها البلاشر حسب شكل كل وش لان الوش البيضاوي غير المدور غير الطويل كل وش ليه الطريقة اللي تخليه احلى, احنا النهاردة هنقول لكل بنات حوا ازاي تحطي البلاشر حسب شكل وشك وايه البلاشر المناسب لبشرتك.
– تعالوا نعرف ازاي تختاري البلاشر المناسب لنوع بشرتك:
1- بالنسبة للبشرة الجافة عند منطقة الخدود انسب نوع بلاشر ليها هو البلاشر الكريمي عشان يرطب البشرة ويديها لمعة شوية.
ومن انواع البلاشر الكريمي:
– Elf Studio HD Blush.
– Elf Essential All Over Color Stick.
– Full Bloom Crème Blush.
– Make up Forever HD Blush.
– Maybelline Dream Bouncy Blush.
2- بالنسبة للبشرة الدهنية انسب نوع بلاشر ليها هو البودر, عشان يمتص الدهون الزيادة اللي في البشرة ويطفي لمعتها.
من انواع البلاشر البودر:
– Too Faced Sweatheart Blush.
– Glowing Cheek Color.
– Elf Mineral Blush.
– Maybelline Fit Me Blush.
– NYX Powder Blush.
– بس في بعض الاحيان البشرة بتتغير حسب الجو وحسب تغيير فصول السنة من الصيف للشتا ده بيأثر على بشرتنا في الحالة دي نستخدم النوع المناسب لحالة بشرتنا.
– في حاجة كمان لازم ناخد بالنا منها لو انتي حاطه مكياج كامل يعني كريم اساس وبودرة يبقى انسب نوع بلاشر هو البودر, لو مش حاطه كريم اساس ولا بودرة ومكتفية بس بالبلاشر عشان بس تدي لون لبشرتك يبقى في الحالة دي استخدمي البلاشر الكريمي هيكون افضل عشان هيرطب البشرة وهيديها لمعة حلوة.
– وبالنسبة لالوان البلاشر المناسبة لكل بشرة, البشرة البيضا انسب الوان ليها هي الالوان الفاتحة زي البينك الفاتح, والبيج, والبشرة السمرا انسب الوان ليها هي الالوان الدافية زي البرونزي, والبرتقاني, والموف الغامق, والفوشيا واحنا اتكلمنا قبل كده بالتفصيل عن الوان البلاشر المناسبة لكل لون بشرة, بس في النهاية اهم حاجة يكون اللون واللوك شكله طبيعي يعني ميبقاش اوفر اوي والخدود فيها لون زيادة عن اللزوم.
– ازاي تحطي البلاشر حسب شكل وشك ؟
– في البداية كده عموما عشان يطلع البلاشر مظبوط نختار فرشة تكون كبيرة عشان توزع البلاشر كويس على الخدود.
– بعد ما تاخدي من البلاشر اخبطي الفرشة على العلبة عشان تنزلي منها اي زيادة من البلاشر عشان ميبقاش اللون على خدودك زيادة عن اللزوم.
– طبقي البلاشر على تفاحتين الخد من اول الخد لحد منابت الشعر وتطلعي وتنزلي بالفرشة على الخد عشان تدمجيه كويس على البشرة.
1- البلاشر للوش المربع:
الوش المربع بيتميز انه بيكون منطقة الفك قوية وعريضة, واللي مش بيقدر يحدد شكله وشه تقدر تعرفي من شكل ايدك لان شكل الايد بتبقى واخدة شكل الوش يعني بصي لاطراف صوابعك وشكل الضوافر لو مربعة يبقى انتي وشك مربع, وفي حالة الوش المربع افضل تطبيق للبلاشر بيكون عن تجويف الخد من فوق لحد الزوايا الخارجية للعين ويكون البلاشر تحت منطقة الاذن, يعني التركيز بيكون على الجزء اللي فوق من الخد ده بيخفف من عرض الوش.
2- الوش المدور:
الوش المدور اللي بيكون المسافات بين ملامحه كلها متساوية او قد بعض, هنا البلاشر هتطبقيه على طول عضمة الخد كلها لحد منابت الشعر واطلعي وانزلي على الخد عشان تدمجيه كويس على تفاحة الخد, وشكل البلاشر يكون واخد شكل مثلث في اتجاه الانف, وعشان تظبطيه اكتر وتدي اضاءة للوش ممكن تبتسمي ابتسامة خفيفة وحطي البلاشر في نص منطقة تفاحة الخد, وممكن تحطي هايلايتر عند عضمة الخد عشان تديه اضاءة اكتر.
3- الوش على شكل قلب:
الوش على شكل قلب بتكون منطقة الجبين اعرض من المنطقة اللي تحت, عشان تخلي الخدود شكلها ممتليء وتبقى متناسقة مع باقي الوش طبقي البلاشر على تفاحة الخد وبعدين ادمجيه عند تجويف الخد تحت منطقة تفاحة الخد, يعني يطبق زي طريقة الكونتور تقريبا يبقى تحت عضمة الخد عشان يبرزها.
4- الوش البيضاوي:
الوش البيضاوي هو مزيج من الوش المدور والوش على شكل قلب, طبقي البلاشر على عضمة الخد بس خليه بعيد عن المنطقة الخارجية للعين يعني متمديش البلاشر لحد المنطقة دي ومتوصليهوش لمنابت الشعر, لان تقريبا الوش البيضاوي يعتبر متناسق ومش محتاج بلاشر اكتر من كده.
5- الوش الطويل:
الوش الطويل ليه طريقتين في تطبيق البلاشر الطريقة الاولى انك تحطيه من اول عضمة الخد وتمديه لحد الودن, او تحطيه من اول اعلى عضمة الخد وتمديه لحد منابت الشعر, وممكن نحط لمسة بلاشر على الجزء الامامي من الدقن لان ده هيخفف من طول الوش وهيخليه يبان اقصر.
6- الوش الماسي:
لو انتي وشك على شكل ماسة يبقى هتركزي انك تبرزي الجزء اللي تحت من الوش, وفي الحالة دي حطي البلاشر على طول اعلى عضمة الخد ودمجه لحد الودن عشان ترسمي منطقة العين وتدي اضاءة لعضمة الخد.
اكتر 6 غلطات للبلاشر بتقعي فيهم !
