اكتر 6 غلطات للبلاشر بتقعي فيهم !

البلاشر خطوة مهمة في خطوات المكياج بتاعنا لانه يعتبر اللمسة النهائية اللي بتدي حياة لمكياجنا, بس ساعات بنقع في غلطات واحنا بنحط البلاشر ممكن تبوظ لوك المكياج كله ويطلع شكلنا مش حلو, احنا هنقول لكل بنات حوا النهاردة ايه هي اكتر الاخطاء اللي ممكن نقع فيها واحنا بنطبق البلاشر عشان منقعش فيها تاني ومنكررهاش.

تعالوا نعرف مع بعض اكتر 6 غلطات للبلاشر ممكن نقع فيهم:

1- المبالغة في البلاشر:

ساعات بعد ما نحط البلاشر نلاقي اللون خفيف فنحط تاني ونزود اللون على الخدود بشكل مبالغ فيه ويبقى اللون زيادة اوي على خدودنا وبيبقى الشكل مش حلو خالص, حطي دايما البلاشر بشكل معقول عشان ندي بس حياة للمكياج ولون طبيعي للخدود يعني حاجة بسيطة هتكفي جدا.

2- تطبيق البلاشر فوق عن منطقة الخدود اوي او تحت اوي:

من الغلطات بردوا اللي ممكن نقع فيها واحنا بنحط البلاشر اننا نحطه فوق منطقة الخد اوي قريب من العين او تحت عن منطقة الخد اوي وطبعا الشكل هيطلع مش حلو, الطريقة الصح انه يطبق على تفاحة الخدين لحد منابت الشعر عشان يطلع مظبوط معانا.

3- عدم دمج البلاشر:

من اكتر الغلطات اللي بنعملها اننا مندمجش البلاشر كويس على البشرة ويبقى البلاشر عبارة عند دايرتين على الخدود ويطلع شكل الوش مش طبيعي ويبقى شكلنا زي العروسة اللعبة :) , مفتاح نجاح البلاشر وانه يطلع بشكل حلو ومظبوط هو دمجه كويس على البشرة باننا نحطه على تفاحة الخد ودمجه بالفرشة على طول عضمة الخد لحد منابت الشعر, وممكن تستخدمي سفنجة عشان تدمجيه كويس والشكل يطلع طبيعي.

4- استخدام بلاشر مش مناسب لنوع بشرتك:

من الحاجات اللي ممكن تخلي البلاشر يطلع مش حلو على الوش هو اختيار البلاشر الغلط اللي مش مناسب لينا, عشان كده لازم تعرفي نوع بشرتك عشان تستخدمي البلاشر المناسب ليها لان كل نوع بشرة ليها البلاشر اللي يناسبها ما بين البلاشر البودر اوالبلاشر الكريمي او المضغوط , واحنا اتكلمنا قبل كده بالتفصيل عن انواع البلاشر و ازاي تحطي البلاشر حسب نوع بشرتك وشكل وشك.

5- استخدام اداة غلط:

من الحاجات اللي بتأثر على شكل البلاشر هي الفرشة يعني انك تستخدمي فرشة كبيرة اوي زيادة عن اللزوم او صغيرة اوي ده هيخلي البلاشر يطلع مش مظبوط معانا, استخدمي دايما الفرشة اللي حجمها متوسط وشعرها ناعم وطويل, نوع واحد من البلاشر ممكن تحطيه بصوابعك هو نوع البلاشر الكريمي لانه مينفعش يتحط بالفرشة.

شوفوا معانا انواع فرش المكياج واستخداماتهم.

6- اختيار لون مش مناسب للون بشرتك:

اختيار اللون الصح في البلاشر مهم جدا لازم نختار اللون اللي يليق على لون بشرتنا لان اكيد الالوان اللي بتليق على البشرة البيضا غير السمرا غير القمحية, عشان كده لازم نختار اللون اللي يناسبنا عشان الشكل يطلع حلو في النهاية, يعني بالنسبة للبشرة البيضا يليق عليها الوان البلاشر الفاتحة زي درجات الوردي, والبشرة المتوسطة اللون الخوخي والمرجاني انسب الالوان ليها, وبالنسبة للبشرة السمرا اللون الروز الغامق والتوتي من الالوان اللي بتبقى حلوة جدا عليها.

وتقدروا تشوفوا بالتفصيل هنا ازاي تختاري لون البلاشر المناسب للون بشرتك.