إزاي تختاري لون البلاشر المناسب لبشرتك؟

البلاشر, أو أحمر الخدود, أو الروجاجو من ابسط اللمسات في المكياج اللي بتغيير اللوك كله, وفيه بنات مش بتحط أي مكياج غير بس البلاشر عشان لما بنختار اللون الصح البلاشر بيدنا لوك الجمال الطبيعي اللي مش مبالغ فيه.. النهرده بنات حوا بتقدملك إزاي تختاري لون البلاشر المناسب لبشرتك.

أول حاجة عشان تعرفي فعلا ايه أكتر لو لايق ليكي إنتي, جربي إنك تقرصي خدودك! ايوة اقرصيها جامد وشوفي هيبقي لونها ايه, أو لون خدودك بيبقي ايه وإنتي خارجة من دش سخن.. ده بيبقي أكتر لون يليق علي لون  بشرتك ويديكي لوك نضر وطبيعي.

طيب ايه هو لون البلاشر المناسب للون بشرتي؟

1- ألوان بلاشر البشرة الفاتحة:

أصحاب البشرة الفاتحة لازم يبقوا حريصين جدا في اختيار اللون وفي الكمية اللي هيحطوها, بتليق عليهم الألوان الفاتحة الهادية, زي الخوخي, البينك الفاتح ودرجات البيجات والمرجاني.. يفضل انهم يحطوا طبقات رقيقة وخفيفة عشان شكلهم ميبناش مبالغ فيه وفي نفس الوقت تدي نضارة ولوك طبيعي جذاب.

2- ألوان بلاشر البشرة القمحية:

الوانهم قريبة من ألوان البشرة الفاتحة بس بدرجات أغمق, يعني الخوخي الغامق أو لون القرفة, البينك الغامق وممكن يبدأوا يدخلوا في درجات الموف بس الفاتح منه. وممكن يحطوا أكتر من طبقة لحد لما يوصلوا لدرجة اللون المطلوبة.

3- ألوان بلاشر البشرة السمرة:

البشرة السمرة ليها درجات كتيرة, والوانها اسمها الألوان الدافية “Warm Colors”, الألوان المفضلة هي البنيات بدرجاتها علي حسب لون البشرة وممكن نروح للبرونزيات الغامقة, البرتقالي والموف الغامق والفوشيا.