نصايح كورية لتفتيح البشرة والحفاظ عليها صحية

الكوريين معروفين بالعناية بالبشرة ، وصحة ولمعان بشرتهم مش صدفة ، ولكن ده بيرجع لعنايتهم لبشرتهم بشكل كبير ، لو انتي عايزة توصلي لنفس بشرتهم الزجاجية ، فانتي في المكان الصح ، النهاردة من خلال موضوعنا هنشارك معاكم بعض النصايح الكورية اللي هتساعدك على تفتيح البشرة والحفاظ عليها صحية.

- التنضيف المزدوج:

واحدة من الخطوات اللي بتخلي بشرة الكوريين صافية وخالية من العيوب هي التنضيف المزدوج ، والخطوة دي بتشمل غسل البشرة بغسول زيتي لازالة كل الشوائب وبقايا المكياج الموجودة على البشرة ، وبعدها استخدام غسول رغوي.

وتقدري تعملي الغسول الزيتي بنفسك بمزج زيت اساسي مع زيت ناقل ، وتنضيف البشرة بالخليط.

- تدليك البشرة:

تدليك البشرة في حركات دائرية بيساعد على تحسين الدورة الدموية وده بيساعد على اصلاح مشاكل الجلد بشكل اسرع من المعتاد ، وتقدري تعتمدي على التدليك اللي بينضف البشرة وبيعزز عملية تجديد الخلايا.

- التقشير:

تقشير البشرة بيساعد على ازالة الشوائب من المسام وتنضيفها ، استخدمي مقشر مايكونش قاسي على البشرة عشان مايسببش اي ضرر للجلد.

- التونر:

التونر بيساعد على موازنة درجة حموضة البشرة ، وبيساعد كمان في تقليل حجم المسام وحمايتها من التلف ، التونر بيساعد كمان على ترطيب البشرة وده بيساعد في اضافة توهج لبشرتك زي بشرة الكوريين.

- الايسنس:

يعتبر من اهم مستحضرات العناية في الروتين الكوري ، وهو عبارة عن سائل مغذي مليان بالعناصر الغذائية ، ومعظمه بيحتوي على حمض الهيالورونيك اللي بيزود من مرونة الجلد.

وعشان تزودي تأثيره ممكن تمزجي الايسنس مع امبولات البشرة ، وهي عبارة عن سوائل سميكة مليانة بالفيتامينات والمعادن اللي بتساعد على تحسين حالة الجلد بشكل دائم.

- مرطب ماء الارز:

ماء الارز من الحاجات الاساسية في روتين العناية بالبشرة الكورية من سنين طويلة ، ماء الارز تعتبر مرطب طبيعي للبشرة, بيساعد على تفتيح البشرة, وتقليل الهالات السودا.

- ماسك البشرة الطبيعي:

الماسك الطبيعي بيساعد على تغذية البشرة بالعناصر الغذائية اللي محتاجاها ، وتحسين حالة بشرتك ، ممكن تستخدمي مكونات زي الخميرة, الشاي الاخضر, الافوكادو, عشب البحر, الحلزون ، للحصول على البشرة الكورية.

- كريم العين:

الجلد حوالين العين بيكون رقيق جدا ومحتاج عناية خاصة ، وللسبب ده الكوريين بيدوا اهتمام كبير لمنطقة تحت العين ، مهم انك تستخدمي كريم عين لتحسين الدورة الدموية والحفاظ على صحة منطقة تحت العين.

- الترطيب:

للحصول على توهج البشرة الكورية ، ماتهمليش الترطيب ، الترطيب بيضيف نعومة وليونة للجلد ، حسب نوع بشرتك تقدري تختاري المرطب المناسب ليها تقدري تختاري مرطب كريم (لو بشرتك عادية), او جل (لو بشرتك دهنية او مختلطة), او زبدة (لو بشرتك جافة).

- واقي الشمس:

بغض النظر عن التنضيف والترطيب ، مهم انك تنهي الروتين باستخدام واقي الشمس ، ومجرد استخدام اي واقي شمس مش كافي ضروري تستخدمي واقي شمس بيحتوي على عامل حماية عالية لاضافة طبقة حماية لبشرتك ، اتأكدي ان واقي الشمس بيحتوي على عامل حماية 50 واكتر.