وصفات مذهلة بمية الارز لجمال البشرة والشعر
كلنا بنشوف بشرة الاسيويات قد ايه بتكون صافية ونقية وشعرهم ناعم وبيلمع وده لان الارز حاجة اساسية في نظامهم الغذائي, لكن مش اكل الارز بس هو اللي مفيد كمان هما بيستخدموا مية الارز لجمال بشرتهم وشعرهم لانه غني بالفيتامينات والمواد المغذية المفيدة جدا, الارز بيحتوي على فيتامين E, B, C, والمعادن, وال8 احماض الامينية الاساسية اللي بتساعد على تعزيز الصحة العامة وجمال البشرة والشعر, عشان كده احنا النهاردة جايبين لكم سر من اسرار جمال بشرة وشعر الاسيويات باستخدام وصفات بمية الارز هنعرفها مع بعض من خلال مقالنا والميزة انه مكون متوفر في كل بيت ومش مكلف لان كل اللي هتحتاجيه هو ارز ومية بس.
– تعالوا نعرف الاول ازاي نعمل مية الارز:
هنعمله بطريقتين الاولي بطريقة السلق والتانية من غير سلق.
1- طريقة مية الارز بالسلق:
اغسلي كوباية ارز بالمية كويس جدا وبعدين حطيه في حلة وضيفي عليه 3 كوبايات مية وحطيه على النار من غير ما تغطيه وسيبيه لحد ما يستوي, هاتي طبق صفي فيها المية وسيبيها لحد ما تبرد خالص وبعدين حطيها في اي ازازة او برطمان عندك واحتفظي بيها في التلاجة والكمية دي ممكن تقعد معاكي لحد اسبوع.
خدي من 1 – 2 معلقة من مية الارز دي ضيفيها على كوباية مية عادية وقلبيها كويس واستخدميها.
2- طريقة مية الارز من غير سلق:
حطي كوباية ارز في طبق وضيفي عليهم كوبايتين مية وسيبيه منقوع من 15 – 30 دقيقة قلبيه كويس وبعدين صفي المية في طبق تاني, وبعدين حطيها في اي ازازة واحتفظي بيها في التلاجة لحد ما تيجي تستخدميها وممكن تقعد معاكي من 3 – 4 ايام, ورجيها قبل كل استخدام.
وممكن تحتفظوا بالمية في درجة حرارة الغرفة لمدة يومين عشان تتخمر قبل ما تحطيها في التلاجة عشان تعلمي مية مخمرة وتستفادي منها اكتر, ولما تيجي تستخدميها ضيفي مية الارز المخمرة دي مع المية العادية بنسبة من 3:1 قبل الاستخدام يعني تكون المية العادية اكتر من مية الارز تلات مرات يعني لو هتحطي معلقة من مية الارز ضيفي عليهم 3 معالق مية عادية.
وكده مية الارز تبقى جاهزة عشان نستخدمها.
– وصفات بمية الارز لجمال البشرة والشعر:
1- وصفة لتحسين صحة الشعر:
مية الارز بتساعد على تنعيم الشعر وبتخليه اقوى وبيديه لمعة وبيخلي شكله صحي, لان الشعر بيتكون من البروتين وبالتالي البروتين الموجود في مية الارز هيكون مفيد جدا لصحة الشعر وبيقوي جذوره وبيملى فراغات الشعر, وكمان المية بتحتوي على عنصر الاينوزيتول وده نوع من انواع الكربوهيدرات اللي بتمنع تلف الشعر وبتحافظ عليه صحي وناعم, وبيمنع تساقط الشعر وبيزود معدل نموه وبيحافظ عليه.
بعد ما تغسلي شعرك بالشامبو بالطريقة العادية هتصبي مية الارز المخفف بالمية العادية على الشعر زي ما قولنا تاخدي من 1 – 2 معلقة من مية الارز على كوباية مية عادية ولو هتزودي كمية المية العادية حسب طول وكثافة شعرك زودي كمية مية الارز وهكذا, وبعدين دلكي مية الارز في الشعر وفروة الراس باطراف صوابعك كويس لمدة 10 دقايق وبعدين اشطفي شعرك بالمية العادية, كرري الوصفة دي من 2 – 3 مرات في الاسبوع لافضل النتايج.
ولو عايزة تغذية اضافية للشعر ممكن تضيفي على خليط مية الارز قبل الاستخدام كام نقطة من اي نوع من الزيوت الاساسية زي زيت اكليل الجبل, اللافندر وغيرها من الزيوت حسب اختيارك, وممكن كمان تضيفي شاي اخضر.
2- لعلاج الشعر الهايش والمجعد:
مية الارز من الحاجات المفيدة جدا في علاج مشكلة تجعد وهيشان الشعر لانه بيرطب الشعر بعمق وبيحسن مرونة الشعر وبيقلل من احتكاك الشعر, وفي دراسة اتنشرت في المجلة الدولية لعلوم التجميل سنة 2010 الباحثين عملوا ابحاث عن سر جمال شعر المرأة اليابانية بشكل خاص واتوصلوا ان السبب في ده هو انهم بيغسلوا شعرهم بمية الارز بشكل يومي تقريبا.
اغسلي شعرك بالشامبو واشطفيه بالمية العادية وبعدين ضيفي مية الارز المخمرة للمية العادية بنسبة من 3:1 زي ماقولنا فوق واشطفي شعرك بالمية دي كشطفة نهائية للشعر, كرري الوصفة من 1 – 2 مرة في الاسبوع لافضل النتايج.
3- ترطيب البشرة وعلاج الالتهاب والتهيج:
النشا اللي موجود في مية الارز يعتبر من العلاجات الفعالة جدا لامراض جلدية زي الاكزيما وعلاج الجلد الجاف, وكمان بيهدي تهيج الجلد والالتهابات, وفي دراسة اتعملت سنة 2002 اثبتت ان الاستحمام بمية الارز مرتين يوميا لمدة 15 دقيقة حسنت قدرة شفاء تلف الجلد بنسبة 20% تقريبا.
وعشان تعملي الحمام ده وتعالجي اي تهيج او التهاب في الجلد وتعالجي تلف الجلد املي البانيو مية دافية وضيفي عليه كام كوباية من مية الارز وانقعي جسمك في المية دي من 15 – 20 دقيقة مرتين في اليوم, ولو عايزة تعمليها لوشك بس بلي قطنة بمية الارز وادهني بيها بشرتك وسيبيها 15 دقيقة وبعدين اغسليه وكرريها كذا مرة في اليوم.
4- شد وتقليل مسام البشرة:
مسام البشرة الكبيرة والمفتوحة مش بس بتشوه شكل البشرة لكن كمان هي بتكون سبب رئيسي في ظهور بثور البشرة وحب الشباب والرؤوس السودا ومية الارز تعتبر من الحاجات الفعالة جدا في علاج المشكلة دي لانه قابض طبيعي للبشرة, وبيشد الجلد, وبيقلل من المسام الواسعة, وبيساعد على توازن درجة الحموضة في الجلد.
اخلطي كميات متساوية من مية الارز مع المية العادية, بلي قطنة بالخليط ده وامسحي بيها بشرتك وسيبيها من 15 – 20 دقيقة وبعدين اغسليها بمية عادية, ولافضل نتايج كرري الطريقة دي يوميا بعد غسل بشرتك.
5- تحسين وتفتيح وتنقية البشرة:
مية الارز بتحسن البشرة جدا وبتخليها صحية وخالية من العيوب وبتفتحها, وكمان بتطرد السموم من الجلد, بتحسن مرونة الجلد, بتقلل من الالتهاب, بتمنع بقع الشيخوخة وفرط تصبغ البشرة.
اخلطي كميات متساوية من مية الارز مع المية العادية وبلي قطنة بالخليط وامسحي بيها بشرتك وسيبيها من 5 – 10 دقايق وبعدين دلكي بشرتك بحركات دائرية لمدة كام دقيقة كمان وبعدين اغسلي بشرتك بمية دافية, كرري الوصفة مرة واحدة يوميا.
6- تنعيم البشرة:
مية الارز بتحافظ جدا على نعومة ورطوبة البشرة, لان البروتين اللي فيها بيمنع فقدان المية وبالتالي ده بيحافظ على ان البشرة تفضل رطبة لفترة اطول, كمان بيحتوي على مضادات الاكسدة اللي بتساعد على منع ضرر الجذور الحرة اللي بتحصل بسبب الشيخوخة او التعرض لاشعة الشمس وعوامل الجو المختلفة يعني بتحافظ على شباب البشرة وبتخليها صحية.
اخلطي معلقة مية ارز مع معلقتين مية عادية بلي فوطة صغيرة بالخليط ده وحطيها على بشرتك او بقطنة وامسحي بيها البشرة وسيبيها 15 دقيقة على الاقل, وبعدين اغسلي بشرتك بباقي مية الارز وبعدين اشطفيها بمية عادية, كرري الوصفة مرة واحدة يوميا.
– نصايح لاستخدام مية الارز:
1- ممكن تستخدمي اي نوع ارز يعني الابيض او الاسمر او اي نوع متوفر عندك.
2- متنسيش تغسلي الارز قبل ما تستخدميه عشان تاخدي المية بتاعته عشان تتخلصي من اي حاجة مش نضيفة فيه.
3- حاولوا تستخدموا الارز الاورجانيك هو بيكون سعره اعلى شوية بس هيبقى افيد لانه مافيش فيه مواد كيماوية, ولو مش متوفر استخدموا العادي بس زي ما قولنا اغسلوه كويس قبل الاستخدام.
4- متستخدميش مية الارز على الشعر من غير ما تخففيها بالمية العادية زي ما قولنا بالنسب في الوصفات, عشان متتراكمش وتعمل كتل على شعرك مع الوقت.
اعرفي كمان ازاي تستخدمي البنجر لجمال البشرة والشفايف والشعر
