5 علاجات تجميلية في البيت وهنعرف اي واحد منهم الافضل تعمليه عند المتخصصين
في علاجات تجميلية كتير بنصرف عليها فلوس في صالونات التجميل ، وهي ممكن نعملها في البيت بنص التكلفة او اقل كمان وهتدينا نفس النتايج، والنهاردة من خلال موضوعنا هنشارك معاكم 6 علاجات تجميلية تقدري تعمليهم في البيت بتكلفة قليلة ، وهنقولك ايه الفعال فيهم في البيت ، وايه منهم الافضل تعمليه في صالون التجميل.
علاجات تجميلية في البيت:
1- تصفيح الشعرHair lamination:
العلاج ده في صالون التجميل عادة بيكون مكلف والجلسة بتاخد حوالي من ساعتين لساعتين ونص ، والعلاج ده وظيفته انه بيعيد بناء الشعر الضعيف وبيحميه ، والجلسة بيتم فيها غسل الشعر بالشامبو والبلسم ، وبعدها بيتم وضع ماسك الشعر لمدة 20 – 30 دقيقة وبعدها بيتم لفة بورق فويل وتسخينه بمجفف الشعر ، في المتوسط ، تأثير العلاج بيستمر من 3 – 6 اسابيع ، والعلاج ده تقدري تستبدليه بعلاج الجيلاتين الطبيعي في البيت.
كل اللي هتعمليه اخلطي 3 معالق كبيرة من الجيلاتين ، و 9 معالق كبيرة ماية ، و 3 معالق كبيرة بلسم ، وزعي الماسك على الشعر المبلول ، وغطيه بكيس بلاستيك وفوطة ، وبعد 35 دقيقة ، اغسليه.
النتيجة: الماسك هيدي الشعر نعومة ولمعان ، ولكن مش بنفس تأثير علاج تصفيح الشعر في صالون التجميل.
2- مساج الكوبايات للسيلوليت:
مساج الكوبايات او المعروف بالحجامة ، بيتم فيها استخدام اكواب زجاجية او بلاستيك او سيليكون بتمتص جزء من الجلد ، وده بيزود الدورة الدموية في المنطقة ، والتدليك ده بيساعد على علاج السيلوليت ، ولتحقيق نتايج ملحوظة هتحتاجي حوالي 10 جلسات علاج على الاقل.
عشان توفري تقدري تشتري اكواب المساج وزيت مساج وتعمليها في البيت بتكلفة اقل وهيديكي نفس النتيجة ، ولكن بننصح تجنبها للاشخاص اللي بيعانوا من الدوالى, مرضى السكر, او مشاكل في القلب والاوعية الدموية.
3- الباديكير:
الباديكير او العناية بالقدمين وضوافر القدمين ، من الحاجات اللي تقدري تعمليها بنفسك بسهولة في البيت وتوفري فلوس صالون التجميل ، لو ماعندكيش اي مشاكل معينة في ضوافرك او القدمين بننصحك تعمليه بنفسك في البيت.
4- المانيكير:
المانيكير وهو العناية بالايد وضوافر الايد ، زي الباديكير بالظبط تقدري تعمليه في البيت بتكلفة اقل بكتير من الصالون وهيديكي تقريبا نفس النتيجة.
5- علاج البارافين للايدين:
علاج البارافين بيدي الايد ترطيب ونعومة مكثفة للبشرة ، وغالبا هتحتاجي ل 5 جلسات بارافين على الاقل عشان تديكي نتايج فعالة ، والجلسة بتم على 4 مراحل تقشير جلد الايدين, دهن البشرة بالزيت, وضع البرافين, ولبس الجوانتي لمدة 40 دقيقة قبل ازالته.
ده من العلاجات اللي تقدري تعمليها في البيت من غير ما تروحي للصالون وبتكلفة اقل ، استخدمي اول حاجة مقشر للايدين ، بعدها ادهني ايدك بخليط زيوت ، وبعدها حطي ايدك في البارافين الدافي ، وبعدين لفيهم بكيس بلاستيك والبسي جوانتي ، سيبيه لمدة 40 دقيقة ، هيديكي نعومة وترطيب للايد ولمعان للضوافر.
