ديتوكس الشعر: اتخلصي من سموم الشعر في 6 خطوات للحصول على شعر صحي
ديتوكس الشعر ، او التخلص من سموم الشعر بشكل كامل ، هو تكنيك هدفه التخلص من كل الاضرار والغبار والاوساخ المتراكمة على الشعر ، وبيساعد على علاج خصلات الشعر من خلال التدليك ، تابعي معانا السطور الجاية واتعرفي على خطوات ديتوكس الشعر للحصول على شعر صحي وبيلمع.
خطوات ديتوكس الشعر:
ديتوكس الشعر بيساعد على تعزيز نمو الشعر بشكل غير مباشر عن طريق تحسين صحة فروة الراس وبصيلات الشعر ، من خلال ازالة التراكمات وتعزيز الدورة الدموية لفروة الراس ، وده بيخلق بيئة صحية لنمو الشعر.
1- غسل الشعر بالشامبو:
اول خطوة هي غسل الشعر بالشامبو ، ضروري جدا تنضيف الشعر من كل الزيوت والاوساخ والغبار ، لان تأخير غسل الشعر ممكن يضعف روابط شعرك ، وده هيخليه معرض للتقصف شكل اكبر ، عشان كده خطوة التنضيف مهمة ابدأي باستخدام كمية وفيرة من الشامبو الخالي من الكبريتات والبارابين ، استخدمي الشامبو وممكن تكرري باكتر من غسلة لحد ما تتخلصي تماما من زيوت الشعر قبل ما تنتقلي للخطوة التانية ، وعشان تتأكدي ان الشامبو نضف الشعر كويس ، دلكيه في فروة راسك بحركات دائرية لحد ما يعمل رغوة ، وبعدها اشطفي شعرك بالماية كويس.
2- الترطيب العميق:
الترطيب مهم جدا للحفاظ على رطوبة ونعومة الشعر ولمعانه ، الافضل تستخدمي بلسم يكون بيحتوي على مكونات زي الكيراتين, زيت المارولا, فيتامينات C, E لمنع الهيشان وترطيب الشعر.
اتأكدي من وضع البلسم بالتساوي على الشعر كله من جوه ومن بره ، وبمجرد ما تخلصي ماتستعجليش في غسله سيبيه على شعرك لتغذية بصيلات الشعر وتنعيمها واضافة لمعان لشعرك.
ممكن في الخطوة دي تستخدمي بلسم بترطيب عميق, او حمام كريم ، او ماسك لاصلاح الشعر.
3- التدليك:
الخطوة التالتة هي التدليك ، عشان تخلي البلسم يتغلغل كويس في شعرك ، دلكيه بأطراف صوابعك على فروة راسك بحركات دائرية لمدة 15 دقيقة ، التكنيك ده هيأدي لزيادة الدورة الدموية وترطيب الشعر بشكل عميق ، وهيضمن كمان توزيع العناصر الغذائية الموجودة في البلسم في كل مكان.
4- البخار:
البخار بيساعد ان فروة الراس تمتص كل العناصر الغذائية الموجودة في البلسم بشكل افضل ، ممكن تستخدمي جهاز بخار مباشرة على الشعر لو متوفر عندك ، او تغمسي فوطة صغيرة في ماية سخنة وتعصريها عشان تتخلصي من الماية الزيادة وغطي بيها شعرك ، سيبي الفوطة السخنة على الشعر لمدة ماتزيدش عن 15 دقيقة ، لان الحرارة الزيادة ممكن تسبب تهيج فروة الراس ، وبمجرد ما تشيلي الفوطة سيبي شعرك يرتاح لمدة 2 – 3 ساعات بعد البخار قبل ما تنتقلي للخطوة اللي بعد كده.
5- غسل الشعر مرة تانية:
اغسلي شعرك مرة كمان بالشامبو والبلسم كويس جدا ، ولازم تغسليه كويس عشان كل الخطوات اللي عملناها فوق تجيب نتيجة وماتضيعيش مجهودك على الفاضي.
6- تجفيف الشعر:
بعد غسل الشعر من البلسم او الماسك ، استخدمي ايدك لعمل Scrunch للشعر للتخلص من الماية الزيادة ، واستخدمي سيروم على الشعر وهو لسه رطب وبعدها سيبيه ينشف بشكل طبيعي في الهوا ، السيروم هيضمن لك عدم فقدان الرطوبة من الشعر طول اليوم ، وهيحافظ على خصلات شعرك خالية من الهيشان وبتلمع.
المفروض تكرري ديتوكس الشعر حسب احتياج شعرك ، بالنسبة للاشخاص اللي بيعانوا من تراكم المنتجات بشكل مفرط او مشاكل في فروة الراس ، هيكون مفيد انك تكرري الديتوكس كل 4 – 6 اسابيع ، غير كده ممكن العلاج الشهري او الربع السنوي هيكون كافي للحفاظ على صحة الشعر وفروة الراس.
