طريقة عمل الفلفل المحشي بالارز المطبوخ واللحمة المفرومة
كلنا عارفين الطريقة التقليدية لمحشي الفلفل بخلطة الارز ، ولكن الطريقة اللي معانا النهاردة مختلفة وهي الفلفل المحشي بالارز المطبوخ واللحمة المفرومة ، الوصفة دي هتنفعك جدا لو عندك باقي ارز مطبوخ مش عارفة تعملي بيه ايه ، الطريقة دي هتخليكي تستفادي منه بشكل مختلف ، تابعي معانا السطور الجاية الطريقة بالخطوات.
الفلفل المحشي بالارز المطبوخ واللحمة المفرومة:
المكونات:
– 6 حبات فلفل رومي (يفضل استخدام الفلفل الاحمر والاصفر لانه بيكون طعمة احلى مع الوصفة دي).
– 2 كوباية ارز مطبوخ.
– 1 كيلو لحمة مفرومة.
– 2 معلقة كبيرة زيت زيتون.
– 1 بصلة كبيرة متقطعة مكعبات.
– 2 جزرة كبيرة مبشورة.
– 1 معلقة كبيرة ملح حسب الذوق.
– 1 معلقة صغيرة فلفل اسود حسب الذوق.
– 1 كوباية عصير طماطم.
– 1 كوباية شوربة فراخ.
الطريقة:
1- قطعي كل حبة فلفل لنصين بالطول ، وشيلي الجذع والبذور ، وقطعي البصل مكعبات ، وابشري الجزر.
2- على نار متوسطة سخني الزيت وضيفي له الجزر والبصل لحد ما لونه يبقى بني دهبي.
3- في طبق كبير ، اخلطي الارز المطبوخ واللحمة المفرومة والملح والفلفل الاسود وخليط البصل والجزر.
4- احشي كل نص من الفلفل بالخليط ، ورصيهم في صينية.
5- اخلطي عصير الطماطم مع الشوربة.
6- صبي خليط الطماطم على الفلفل ، غطي الصينية بغطا او ورق فويل ، ودخليه الفرن على درجة حرارة 210 درجة مئوية ، لمدة 45 دقيقة تقريبا لحد ما الفلفل يستوي ، ممكن قبل ما تدخليه الفرن ترشي على الوش جبنة شيدر او موتزاريلا.
7- ممكن تقدمي جنبه اي نوع خضار تفضليه.
