طريقة عمل صدور الفراخ بالسبانخ والجبنة Hasselback Chicken
لو عايزة اكلة سهلة وسريعة التحضير ، جربي الوصفة اللي معانا النهاردة وهي صدور الفراخ بالسبانخ والجبنة ، تابعي السطور الجاية واعرفي الوصفة بالخطوات والفيديو.
صدور الفراخ بالسبانخ والجبنة:
المكونات:
الكمية دي تكفي فردين.
– ¼ كوباية (50 جرام) سبانخ.
– ¼ كوباية (50 جرام) جبنة ريكوتا.
– 2 صدور فراخ.
– ¼ كوباية (20 جرام) جبنة شيدر مبشورة.
– 1 معلقة صغيرة بابريكا.
– ملح حسب الذوق.
– فلفل اسود حسب الذوق.
طريقة التحضير:
1- في طاسة على نار متوسطة رشيها زيت واطبخي السبانخ لمدة 3 – 5 دقايق لحد ما تتدبل شوية.
2- ضيفي لها الجبنة الريكوتا وقلبيها مع السبانخ لمدة 30 – 60 ثانية ، وارفعيها من على النار وسيبيها تبرد.
3- باستخدام السكينة اعملي فتحات في صدور الفراخ حوالي 1 سم ، لكن ماتقطعيهاش بالكامل ، تبقى ماسكة في بعضها من تحت.
4- احشي الفتحات بخليط السبانخ والجبنة الريكوتا ، وممكن تضيفي شرايح بيكون بقري وشرايح طماطم حسب رغبتك.
5- تبلي الفراخ بالملح والفلفل الاسود.
6- رشي فوقيها الجبنة الشيدر المبشورة.
7- ورشي عليها رشة بابريكا لاضافة لون ونكهة.
8- حطي الفراخ على صينية ودخليها فرن سخنة على درجة حرارة 200 درجة مئوية لمدة 20 – 25 دقيقة ، لحد ما الفراخ تستوي والجبنة تدوب.
9- وكده الفراخ تبقى جاهزة ، ممكن تقدمي جنبها بطاطس مخبوزة في الفرن.
