طريقة عمل كاساديا الفراخ
الكاساديا من اشهر الاكلات المكسيكية الشعبية اللذيذة ، والنهاردة هنقولك طريقة عمل كاساديا الفراخ السهلة والسريعة ، تقدري تعمليها كوجبة عشا سريعة او حتى غدا لو عايزة اكلة سهلة وفي نفس الوقت مغذية لان فيها فراخ وخضار وجبنة بالاضافة للخبز.
طريقة عمل كاساديا الفراخ:
الكمية دي هتعملك 6 كاساديا.
وقت التحضير والطبخ 30 دقيقة.
المكونات:
– 6 خبز تورتيلا.
– 2 كوباية جبنة شيدر مبشورة.
– 1 كيلو صدور فراخ متقطعة قطع صغيرة.
– 1 معلقة زيت.
– ½ حبة فلفل اي لون ، متقطعة صغير.
– ½ حبة بصل متقطعة مكعبات.
– 1 معلقة كبيرة بهارات تاكو ، ولو مش متوفرة تقدري تستخدمي اي توابل تفضليها.
– 2 معلقة كبيرة زبدة غير مملحة.
– ملح وفلفل اسود ، حسب الرغبة.
طريقة التحضير:
1- في طاسة على نار هادية سخني معلقة الزيت ، وضيفي الفراخ والتوابل والملح والفلفل الاسود ، وقلبيهم وسيبيهم لمدة 4 دقايق.
2- ضيفي الفلفل والبصل ، وقلبيهم مع بعض وسيبيهم لمدة 5 دقايق كمان ، او لحد ما الخضار والفراخ ياخدوا لون ، بعدها ارفعيهم من على النار.
3- في طاسة نضيفة ضيفي الزبدة وحطي فوقها خبز التورتلا ، على نص التورتيلا ضيفي الجبنة, خليط الفراخ, وبعدها غطيها بطبقة تانية من الجبنة ، واتني التورتيلا نصين عشان تقفليها.
4- بمجرد ما التورتيلا تاخد لون دهبي اقلبيها على الجنب التاني لمدة كام دقيقة كمان لحد ما يبقى لونه دهبي من الجانبين ، واتأكديان الجبنة ساحت ، كرري نفس الخطوات مع باقي خبز التورتيلا.
5- كده التورتيلا تبقى جاهزة ، قطعيها وقدميها ، ممكن تقدمي جنبها اي صوص تفضليه, صوص افوكادو, ساور كريم, بصل مخلل, خيار مخلل, هالبينو مخلل.
لو في اي كمية باقيه تقدري تشيليها في التلاجة وتطلعيها في اي وقت تسخنيها في صينية في الفرن وغطيها بورق فويل عشان ما الخبز ماينشفش.
