طريقة عمل بينك صوص باستا Pink Sauce Pasta
لو بتحبي الباستا بالوايت صوص وكمان الباستا بالصوص الاحمر ، النهاردة جمعنا الاتنين في وصفة واحدة وهي بينك صوص باستا ، بتكون كريمية ولذيذة جدا وطعمها مميز ، والاكتر كمان انها سهلة التحضير ، تقدري تعمليها كوجبة غدا او عشا سريعة.
بينك صوص باستا:
المكونات:
– 250 جرام مكرونة.
– 2 معلقة كبيرة زبدة.
– 2 حبة متوسطة بصل ، متقطعة مكعبات صغيرة.
– 2 فص ثوم مفروم ناعم.
– ¼ معلقة صغيرة شطة (اختياري).
– 1 كوباية عصير طماطم.
– 200 مل كريمة طبخ.
– ½ كوباية لبن.
– 6 – 8 اوراق ريحان طازة (اختياري).
– ½ كوباية جبنة بارميزان مبشورة.
– 1 معلقة كبيرة بقدونس مفروم.
– ملح وفلفل اسود حسب الذوق.
طريقة التحضير:
1- اسلقي المكرونة في ماية بملح ، واحتفظي بكوباية او اتنين من ماية سلق المكرونة قبل ما تصفيها.
2- اثناء الوقت ده في حلة على نار متوسطة ضيفي الزبدة ولما تدوب ضيفي لها البصل والثوم وشوحيهم لمدة 2 – 3 دقايق او لحد ما البصل يطرى.
3- ضيفي الشطة وعصير الطماطم وسيبيها على نار هادية تغلي.
4- بعدها ضيفي لها كريمة الطبخ واللبن وسيبي الخليط يغلي لمدة 1 – 2 دقيقة ، لو حسيتي ان الصوص سميك اوي ممكن تخففيه بماية سلق المكرونة.
5- بعد كده ضيفي اوراق الريحان لو هتستخدميها ، والجبنة البارميزان المبشورة ، وتبيلها بالملح والفلفل الاسود.
6- ضيفي المكرونة المسلوقة للصوص ، قلبيها لحد ما الصوص يغطي المكرونة كلها ، وضيفي لها البقدونس.
7- كده المكرونة بتاعتنا جاهزة ، قدميها ورشي عليها من فوق جبنة بارميزان مبشورة.
– تقدري تضيفي للصوص قبل اضافة المكرونة فراخ او جمبري لو حابه تزودي بروتين للطبق.
– ممكن كمان تضيفي توابل ايطالية لو حابه تضيفي للنكهة.
– تقدري تستغني عن كريمة الطبخ وتخلي الكمية كلها لبن او العكس تستغني عن اللبن وتضيفي كريمة طبخ بس ، او تعملي باشميل خفيف كبديل لكريمة الطبخ واللبن.