وصفة يخنة الفراخ مع السجق الاسبانية السهلة
وصفة يخنة الفراخ مع السجق الاسبانية من الوصفات السهلة وسريعة التحضير وطعمها لذيذ ، ومناسبة كوجبة غدا او حتى عشا ، والميزة ان الوصفة مش تقيلة ومناسبة لفصل الصيف ، ممكن تقدميها مع الارز, البطاطس, المكرونة, خبز, او حتى مع طبق سلطة بس ، تعالوا نشوف مع بعض الوصفة بالخطوات.
وصفة يخنة الفراخ مع السجق الاسبانية:
المكونات:
– 6 افخاد فراخ بالعضم.
– ملح وفلفل اسود.
– 2 معلقة كبيرة زيت زيتون.
– 450 جرام سجق متقطع شرايح.
– 1 بصلة كبيرة متقطعة شرايح رفيعة.
– 2 حبة فلفل احمر منزوعين البذر ومتقطعين شرايح رفيعة.
– 2 فص ثوم مفروم.
– 4 اعواد زعتر طازة او 1 معلقة صغيرة زعتر مجفف.
– 1 معلقة صغيرة بابريكا مدخنة.
– 1 معلقة صغيرة كمون مطحون.
– 2 ورق غار (ورق لوري).
– 3 كوبايات شوربة فراخ.
– 500 جرام (2 كوباية) عصير طماطم.
– 1 معلقة كبيرة صلصة طماطم.
– ½ كوباية زيتون اخضر منزوع النواه (ممكن تخليه سليم او تقطعيه شرايح حسب اللي تفضليه).
طريقة التحضير:
1- تبلي افخاد الفراخ بالملح والفلفل الاسود.
2- في طاسة كبيرة على نار متوسطة – عالية ضيفي زيوت الزيتون ، ولما الزيت يسخن ، شوحي الفراخ من كل الجوانب لحد ما يبقى لونه بني (ممكن تشوحيه على دفعات لو الطاسة صغيرة) ، حوالي من 7 – 8 دقايق ، وبعدها انقليه في طبق على جنب.
3- في نفس الطاسة ضيفي السجق ، وحمريه لمدة 2 – 3 دقايق ، لحد ما يبقى لونه بني وينزل الدهون بتاعته في الطاسة ، ضيفي البصل والفلفل الاحمر وقلبيهم مع بعض لحد ما يدبلوا والبصل يبقى لونه شفاف (حوالي 5 دقايق) ، مع الاستمرار في التقليب عشان ما يتحرقش.
4- بعدها ، ضيفي الثوم, الزعتر, البابريكا, الكمون, ورق الغار ، لما التوابل ريحتها تطلع (حوالي دقيقة) ، ضيفي الشوربة وقلبي كل المكونات مع بعض كويس.
5- ضيفي عصير الطماطم وصلصة الطماطم ، وقلبيهم ، ورجعي الفراخ للطاسة مع باقي المكونات (ممكن كمان لو حابه تحطي اضافات زيادة تضيفي بطاطس متقطعة مكعبات وحمص او فاصوليا بيضا ، تقدري تضيفي اي خضار او بقوليات تفضليها).
6- سيبي الخليط يغلي وبعدين خففي النار خليها هادية ، وغطي الطاسة وسيبيه لحد ما يستوي لمدة 50 دقيقة تقريبا لحد ما الفراخ تستوي.
7- لو حسيتي ان الصلصة خفيفة بعد ما الفراخ تستوي ، طلعي الفراخ وزودي النار خليها عالية وسيبي الصلصة على النار تغلي شوية لوحدها لحد ما تقل وتتقل شوية وبعدين رجعي فيها الفراخ تاني.
8- اخر حاجة ضيفي شرايح الزيتون الاخضر مع الفراخ والسجق وقلبيهم مع بعض ، قدميها سخنة مع الارز, البطاطس, المكرونة . الخبز, او السلطة.
