5 علاجات طبيعية للشعر لمشاكل شعرك المختلفة
الروتين الاسبوعي للعناية بالشعر مهم عشان تحافظي على شعرك صحي وبيلمع ، والتحكم في كل مشاكل الشعر ، بما فيهم الهيشان, تساقط الشعر, قشرة الراس وغيرها من المشاكل ، والنهاردة من خلال موضوعنا جمعنالكم 5 علاجات طبيعية للشعر لحل مشاكل الشعر المختلفة ، وكلها بمكونات متوفرة بسهولة في مطبخك.
علاجات طبيعية للشعر:
1- للشعر الخفيف والضعيف:
المكونات:
– ثمرة افوكادو مهروسة.
– 1 معلقة كبيرة زيت زيتون.
– 4 – 5 معالق كبيرة لبن رايب.
طريقة التحضير والاستخدام:
اخلطي المكونات كلها مع بعض كويس ، ووزعي الخليط على شعرك من الجذور للاطراف ، سيبيه لمدة 20 – 30 دقيقة وبعدها اغسليه بماية فاترة.
2- لتساقط الشعر:
المكونات:
– ½ كوباية من بذور الحلبة.
– 2 – 3 نقط من اي زيت عطري تفضليه زي زيت اللافندر, الروزماري, او زيت شجرة الشاي.
طريقة التحضير والاستخدام:
انقعي الحلبة في الماية وسييها لمدة 10 ساعات على الاقل طول الليل ، بعدها اتخلصي من الماية واطحني البذور لحد ما تتكون عندك عجينة ، امزجي معاها الزيت العطري وقلبيهم كويس مع بعض ، وزعي الماسك على الشعر وعلى فروة الراس ، سيبيه لمدة 25 – 30 دقيقة وبعدها اغسليه بماية باردة او فاترة.
3- للشعر الهايش والمتشابك:
ماسك البيض وزيت الزيتون:
المكونات:
– بيضة واحدة.
– 1 معلقة كبيرة زيت زيتون.
طريقة التحضير والاستخدام:
اخلطي البيض مع زيت الزيتون ، وزعي الخليط على الشعر وسيبيه لمدة 30 دقيقة على الاقل ، ، وبعدها اغسلي شعرك بماية دافية وشامبو خفيف.
ماسك العسل والزبادي:
المكونات:
– 2 معلقة كبيرة زبادي.
– 1 معلقة كبيرة عسل.
طريقة التحضير والاستخدام:
اخلطي الزبادي مع العسل كويس ، وزعي الخليط على الشعر ودلكيه لمدة ماتقلش عن 5 دقايق ، سيبيه على الشعر لمدة 30 دقيقة وبعدها اغسليه بماية دافية.
4- لقشرة الراس:
المكونات:
– 3 – 4 معلقة كبيرة من جل الصبار.
– 2 معلقة صغيرة عسل.
– 2 معلقة صغيرة من خل التفاح (او زيت جوز الهند).
طريقة التحضير والاستخدام:
اخلطي المكونات كلها مع بعض كويس لحد ما الخليط يبقى ناعم مافيش فيه اي كتل ، بالفرشة او بصوابعك وزعي الخليط على شعرك كله ، سيبيه لمدة 30 دقيقة ، وبعدها اغسليه.
5- للشعر التالف:
المكونات:
– ½ كوباية من العسل.
– ¼ كوباية من زيت الزيتون.
طريقة التحضير والاستخدام:
رطبي شعرك بالماية ، واخلطي العسل مع زيت الزيتون وسخنيهم مع بعض على النار لمدة 20 ثانية ، بعد ما الخليط يبرد وزعيه على الشعر وفروة الراس ، دلكي فروة راسك في حركات دائرية ، البسي قبعة الاستحمام او كيس بلاستيك وسيبيه لمدة 30 دقيقة ، بعدها اغسلي الشعر بالماية وشامبو خفيف.
