5 اسباب خفية ممكن تسبب لك زيادة الوزن
في معظم الاوقات بنقدر نحدد اسباب زيادة الوزن ، سواء بسبب الافراط في الاكل, او عدم ممارسة الرياضة ، ولكن لو لقيتي نفسك زايدة في الوزن على الرغم من انك ماشية على نظام غذائي صحي وبتمارسي رياضة ، الحقيقة ان في اسباب غير مباشرة لزيادة الوزن ممكن ماتاخديش بالك منها ، والنهاردة هنعرف مع بعض 5 اسباب خفية لزيادة الوزن.
اسباب خفية لزيادة الوزن:
1- قلة النوم:
قلة النوم واحدة من الاسباب اللي ممكن تأدي لزيادة الوزن ، لان لما بناخد كفايتنا في النوم اجسامنا بتصلح نفسها, هرموناتنا بتتنظم, وبيتعافى من الضغوط اليومية.
لما الجسم بيتحرم من النوم ، في الحالة دي انتي بتحرمي جسمك من التعافي الحيوي اللي محتاجه عشان يشتغل بشكل صح ، وده معناه انك هتصحي من النوم ماعندكيش نشاط ولا طاقة وهتبقي حاسه بالتعب والارهاق.
قلة النوم كمان هتزود عنك الرغبة في انك تحتاجي مصادر وقود سريعة ، وهتفكري مباشرة في الكربوهيدرات العالية ، وخصوصا السكر المضاف ، لانك هتقومي من النوم هتحتاجي فورا زيادة سريعة في الطاقة ، قلة النوم دي كمان سبب ميولك لاكل وجبة خفيفة في وقت متأخر بالليل قبل النوم ، الشعور بالتعب والحرمان من النوم هيخليكي عندك رغبة اكتر للوجبات السريعة وانك تكسلي عن الرياضة.
بالاضافة انه كل ما زاد حرمانك من النوم ، زاد معاها مستويات هرمون الاجهاد الكورتيزول ، واللي مش بس بيزود شهيتك لكن كمان بيشجع على تخزين الدهون.
الشخص البالغ العادي بيحتاج من 7 – 9 ساعات من النوم كل ليلة ، ولو جدولك الزمني مش بيسمح ببساطة تنامي بشكل كافي ، حاولي انك تاخدي قيلولة في نص اليوم ، اتأكدي من اختيارات وجبات صحية ، ولو لقيتي نفسك عايزة تزودي طاقتك بسرعة ، اعتمدي على الاطعمة عالية الطاقة الصحية زي الفاكهة الطازة والمكسرات هتزود جسمك بالمواد المغذية والطاقة خلال يومك من غير ما تبوظلك وزنك.
2- مشروبات الدايت / السكر الصناعي:
السكر هو عدوك الاول ، والسوبر ماركت مليانة بالمنتجات المكتوب عليها خالية من السكر او فيها سكر دايت ، ولكن الحقيقة ان المحليات الصناعية ممكن تبقى اكتر حلاوة بما يصل 200 مرة من السكر العادي ، وبالتالي استهلاك المنتجات دي باستمرار هتأدي لزيادة الوزن ، وتحفيز مستقبلات السكريات في الدماغ هتخليكي تشتهي اكتر للسكر.
وعلى الرغم من عدم وجود سكر في مشروبات الدايت ، الا ان طعمها المسكر هيدي اشارة للدماغ لمعالجة السكر ، ومن غير سكر لمعالجة السكر ، وجسمك هيتسجيب عن طريق زيادة الشهية لسكريات اكتر ، ومع المرور الوقت انتاج الانسولين المفرط هيأدي لمقاومة الانسولين وزيادة الوزن وحتى كمان لمرض السكر ن النوع التاني.
عشان كده افضل حل انك تتجنبي السكريات وحتى المحليات الصناعية ، ولو انتي مش بتقدري تستغني عن السكر ، اعملي مشروباتك الخاصة منخفضة السعرات الحرارية ، ضيفي التوت او عصير الرمان للماية ، اشربي الشاي الاخضر مع العسل ، اعتمدي على المحليات الطبيعية.
3- التوتر:
الاجهاد امر لا مفر منه بنتعرض ليه في يومنا ، وكلنا بنتعامل معاه كل يوم ، وغالبا لما بيزيد التوتر ، بتبدأي تختاري اختيارات غذائية سيئة ومش صحية.
الاجهاد بيلعب دور رئيسي في انتاج هرمون الكورتيزول ، وهو هرمون هيأثر بشكل كبير علي جسمك وهيأدي لزيادة وزنك.
لتقليل التوتر في حياتك ، اعتمدي على انشطة تريح عقلك ، امشي في الطبيعة ، مارسي اليوجا ، مارسي التمارين الرياضية ، او اتفرجي على فيلم كوميدي ، مارسي التأمل ، او خدي استراحة لمدة 5 دقايق من الحاجة اللي مسببالك توتر.
اعملي حاجة يكون ليها تأثير مريح ، وخدي راحة لانعاش عقلك عشان تقدري تتعاملي بشكل افضل مع ضغوطات اليوم.
4- الحساسية من الاكل او عدم تحمله:
الحقيقة ان لحد دلوقتي مافيش اسباب واضحة عن حساسية الاشخاص لبعض انواع الاكل ، واعراض الحساسية او عدم تحمل الاكل بتختلف من شخص للتاني ، ولكن الاعراض الشائعة هي الانتفاخ, الغازات, عسر الهضم, الارهاق, الضباب العقلي, التهيج, تقلب المزاج, وزيادة الوزن.
وهنا هيكون الحل انك تمنعي تماما الاطعمة اللي بتسبب لك حساسية من نظامك الغذائي ، ممكن تعملي تحليل دم والدكتور يحددلك الاكلات اللي ممكن تسبب لك حساسية.
او تقدري بنفسك تختبري اطعمة معينة عن طريقى التخلص من الاطعمة الشائعة المسببة للحساسية ، زي منتجات الالبان او الجلوتين لمدة 6 اسابيع على الاقل عشان تشوفي جسمك هيستجيب ازاي ، لو اكتشفتي حساسية او عدم تحمل ، امنعيها من نظامك الغذائي ، وهتلاحظي تغير ملحوظ في مظهرك وصحتك.
5- التحكم في كمية الاكل:
ممكن يكون نظامك الغذائي مليان بالاكل النضيف ، ولكن السعرات الحرارية مازالت هي السعرات الحرارية رغم كل حاجة ، والمبالغة في اكلها هيأدي لزيادة الوزن ، واحنا هنا مش بنتكلم عن الخضار ، ولكن على سبيل المثال المسكرات هي تعتبر من السناكس الصحية ولكن لو زودتي الكمية هتزودي السعرات الحرارية ، حجم كمية من المكسرات حوالي 22 حبة بتساوي تقريبا 190 سعرة حرارية ، ولكن لو ضاعفتي الكمية عن كده اضربي السعرات الحرارية في اتنين يعني 380 سعر حراري يعني بمقدار وجبة صغيرة.
يعني ممكن جدا تكون سعراتك الحرارية نضيفة ، ولكن الكتير من الطعام النضيف مازال ممكن يزود وزنك ، مازال اكل كميات زيادة من الاطعمة الصحية هيأثر على وزنك ، فلو عايزة تقللي وزنك اتخلصي من الكميات الاضافية.
وفي طرق كتير عشان تقللي الكميات زي الاكل في طبق اصغر ، امضغي ابطء ، وقفي الاكل مجرد ما تحسي انك شبعتي ، اشربي ماية قبل الوجبة ، او تعرفي عدد السعرات الحرارية في الوجبة عشان تعرفي تحددي كمية كل وجبة.
