7 حاجات ممكن تحرك مؤشر الميزان لكن مش معناها انك اكتسبتي وزن زيادة
وزننا ممكن يتغير على مدار اليوم على حسب مجموعة متنوعة من العوامل ، اللي ممكن تتسبب في زيادة الوزن بشكل مؤقت ولكن مش بيكون زيادة وزن فعلية ، والنهاردة من خلال موضوعنا هنشارك معاكم سبب عوامل بتسبب زيادة مؤقتة للوزن.
عوامل بتسبب زيادة مؤقتة للوزن:
الميزان هو وسيلتنا عشان نتابع وزننا ، ولكن اكيد مش اداة مثالية او دقيقة لانه اعتمادا على مجموعة متنوعة من العوامل ، ممكن الوزن يبقى مختلف تماما في نفس اليوم ، الرقم اللي موجود على الميزان بيعتمد على عوامل كتير بما فيهم مدى رطوبتك, واخر حاجة اكلتيها قبل ما تتوزني, امتى اخر مرة دخلتي الحمام ، ومن خلال السطور الجاية هنتعرف على 7 عوامل ، بعضها خارج ارادتك وبعضها لا ، وده هيساعدك انك تعرفي الوقت المناسب في اليوم او الاسبوع عشان توزني نفسك للحصول على رقم واقعي اكتر.
1- لسه مخلصة تمارين حالا:
في حاجة مهمة لازم تعرفيها ، لو انتي فاكرة ان التمرين والعرق ده هيديكي رقم مثالي على الميزان ، ده مش صحيح لان الوزن بعد التمرين ممكن يأدي لرفع الميزان ، خصوصا لو انتي لسه بادئة نظام تمارين رياضية بالتالي انتي بتحطي ضغط اضافي على عضلاتك ، وده ممك نيسبب التهاب قصير المدى ، لكن ماتخافيش ده يعتبر نوع جيد من الالتهاب بيأدي بدوره لاستجابة مضادة للالتهابات ، وده ممكن يسبب بس احتباس مؤقت لوزن الماية في الجسم ، وبالتالي لما هتيجي توزني نفسك هتلاقي وزن زيادة.
2- وقت الدورة الشهرية:
الدورة الشهرية غالبا بتأدي لشعور بالانتفاخ ، واحتباس الماية في الجسم في الوقت ده ممكن يأدي لارتفاع الميزان مؤقتا ، ضيفي على ده التقلبات الهرمونية والرغبة الشديدة في الاكل ، عشان كده الافضل انك تتجنبي الميزان في الوقت ده والتركيز على العناية بجسمك ، كلي الياف كتير والكتروليتات عشان تنظمي جسمك وتدي نفسك وقت للراحة ، بالاضافة انتي في الوقت ده مش محتاجة لاجهاد اضافي اكتر من اللي انتي حاسه بيه بالفعل خلال فترة الدورة الشهرية.
3- بتاكلي اطعمة مالحة كتير:
لو في يوم اكلتي كمية كبيرة من الاكل فيها ملح كتير ، ده ممكن يكون ليه تأثير سريع على ميزانك ، الاكل المالح بيسبب احتباس الماية ، ولكن حتى لو ده كان امر عرضي بالنسبة لك ، فانتي لو بتستهلكي ملح كتير بشكل روتيني ، انتي محتاجة تقلليه ، الحد اليومي للملح لو انتي ماشية على نظام 2000 سعرة حرارية هو 2300 ملجم ، ولو زاد عن المسموح ده هيسبب لك زيادة وزن مؤقتة ، وممكن كمان يسبب لك انتفاخ وامساك ، عشان كده من الافضل ترطبي جسمك وتستني يوم او يومين عشان تدي فرصة لجسمك يتخلص من الماية الزيادة قبل ما توزني نفسك.
4- بتحاولي تشربي ماية اكتر:
لو انتي حددتي هدف انك تزودي من شرب الماية خلال اليوم ، ده يعتبر هدف رائع جدا ، ولكن لو دي خطوة كبيرة بالنسبة لك ده ممكن يحتاج بعض التعديلات الزمنية على الميزان (ومثانتك) ، عشان جسمك يقدر يتعامل مع كمية الماية الكتير اللي داخلة له على مدار اليوم ، وشرب الماية في الواقع ممكن يساعدك على تقليل الانتفاخ وحتى انقاص الوزن لو بتشربيه بدل المشروبات السكرية ، ولكن بس انتي محتاجة انك تظبطي الميعاد اللي توزني نفسك فيه لحد ما جسمك يتكيف مع كمية الماية.
5- اكلتي وجبة كبيرة قبل ما توزني نفسك على طول:
لو وزنتي نفسك بعد اكل وجبة كبيرة مباشرة ده اكيد هرفع الرقم على الميزان ، لان الاكل بياخد حوالي 8 ساعات عشان يمر من الجهاز الهضمي ويتهضم تماما ، وبالتالي جسمك هيبقى محتفظ بوزن زيادة لحد ما تنتهي عملية الهضم.
بالاضافة ان السكر والصوديوم ممكن يسبب احتباس اضافي في وزن الماية ، بالاضافة للانتفاخ ، عشان كده الافضل انك تدي نفسك استراحة من الميزان لليوم التاني ، وهتبقي افضل عقليا وجسديا لو شربتي ماية واتمشيتي شوية بدل من معاقبة نفسك بالوقوف على الميزان.
6- زودتي وزن عضلاتك:
ممارسة التمارين بانتظام هي طريقة عملية وفعالة لفقدان الوزن ، ولكن ده مش معناه ان الميزان هيكون ليه نفس الرأي ، وده بيعتمد على نوع التمارين الرياضية اللي بتعمليها ، ممكن تكوني بتفقدي وزن بالفعل اثناء بناء العضلات.
لان اثناء التمارين جسمك بيفقد الدهون وبيكتسب عضلات ، وعلى الرغم ان العضلات بتاخد مساحة اقل من الدهون ، الا انها على الميزان بتوزن اكتر من الدهون.
7- الهضم عندك مش شغال بشكل صح:
عادة القاعدة الاساسية عشان تاخدي وزن صح هو انك توزني نفسك الصبح قبل وجبة الفطار وبعد التبرز ، وبالتالي مش مثالي انك توزني نفسك قبل التبرز ، لان الامساك معناه وجود بقايا في الجهاز الهضمي ، وده هيسبب لك زيادة مؤقتة في الوزن ، وعشان تساعدي نفسك على الانتظام في الحمام ، هو انك تزودي من اكل الالياف في نظامك الغذائي, وتحافظي على رطوبة جسمك بشرب كمية كافية من الماية, وتمشي لمسافات طويلة قبل ما توزني نفسك.
في النهاية اهم حاجة انك تركزي على الانتظام على اسلوب حياة صحي ، زي انك تنامي كفاية, تاكلي خضروات اكتر, تمارسي نشاط بدني يوميا, ، بدل ما تبقي مركزة مع الميزان بس ركزي على نفسك ، لانه مهم انك تفتكري ان الوزن هو مجرد رقم ، وفي طرق تانية كتير تقدري من خلالها تقيمي صحتك ، زي انك حاسه بايه او حالتك ايه اخر اليوم؟ ايه مقدار طاقتك؟ هل عندك طاقة كفاية عشان تعملي الحاجات اللي بتحبيها؟ هل بتغذي جسمك بأطعمة صحية؟ العناية بنفسك وصحتك مهم جدا وده مش بينعكس في العدد اللي بتشوفيه على الميزان.
