7 طرق لازالة اي حاجة دخلت في عينك بشكل آمن
عادة رموشنا وجفونا ودموعا تعتبر درع واقي لمنع اي حاجة من دخول عينينا او طردها بسرعة لو دخلت ، ومع ذلك ، بيحصل انه ممكن يدخل في العين رملة او ذرة تراب ، وده لو اهملتيه ممكن يأدي لتلف سطح قرنية العين ، واللي ممكن يكون مؤلم ، عشان كده مهم انك تعرفي ازاي تخرجيها في اسرع وقت ممكن ، والنهاردة من خلال موضوعنا هنشارك معاكم طرق لازالة اي حاجة من العين بآمان من غير ما تأذيها.
طرق لازالة اي حاجة من العين:
– اعرفي امتى تطلبي رعاية طبية:
في اوقات مش هتكوني قادرة انك تخرجي الحاجة اللي مهيجة عينك بنفسك ، وهيكون ضروري تطلبي مساعدة طبية فورا ، حطي في اعتبارك الحالات دي:
– لو دخل مذيب كيميائي لعينيكي.
– جسم غريب بيطير في العين بسرعة عالية.
– دخول جزء زجاجي او معدني في العين.
في حالة لو في رملة او تراب ممكن تحاولي ازالته بنفسك الاول ، ولكن لو استمر الاحساس بالاعراض زي الاحمرار, الرؤية غير الطبيعية, الالم بعد التنضيف ، في الحالة دي روحي للدكتور فورا.
1- اغسلي ايدك قبل ما تلمسي عينك:
دايما بننسى الخطوة دي ، خصوصا في حالة انك عايزة تشيلي اللي دخل في عينك بسرعة ، ولكن مهم جدا ان ايديكي تكون خالية من الجراثيم قبل ما تلمسي عينك ، ده هيقلل من خطر الاصابة بالبكتيريا غير المرغوب فيها ، او حتى تدخلي اوساخ اكتر في عينيكي.
2- حاولي ترمشي وتخلي دموعك تغسل عينك ، من غير ما تفركيها:
فرك العين هو رد فعل طبيعي منك مجرد ما تحسي ان حاجة دخلت في عينك ، ولكن الحقيقة ان ده ممكن يسبب ضرر اكتر لعينك ، عشان كده حاولي انك تقاومي الرغبة انك تعمل ده وحاولي تزيلي الرملة او التراب بانك ترمشي كذا مرة ورا بعض ، لان دي الطريقة العادية اللي جسمك بيحمي بيها عينك من اي حاجة ممكن تدخل فيها وتكون خطر ، والحيلة دي ممكن تساعدك في ازالة الحاجة اللي دخلت في عينك.
3- اعرفي هل تقدري تحددي ايه اللي دخل في عينك:
بمجرد ما تبقي في مكان اضاءته كويسة ، بصي لفوق وتحت وللجوانب ، واعرفي هل قادرة تشوفي اللي دخل في عينك ولا لا ، لو مقدرتيش تشوفيه على طول ممكن يكون جوه الجفن ، وعشان تفحصي تحت الجفن العلوي ، حطي عود قطن على الجفن من بره واتني الجفن على طرفه بالراحة ، وبعدين بصي لتحت وشوفي لو قدرتي تشوفي اللي دخل في عينك ، اما بالنسبة للجفن اللي تحت ، بصي الاول للجفن وامسكيه بالراحة واسحبيه بالراحة لتحت.
4- خرجي حبيبات الرملة او التراب بحركة دائرية باستخدام عود قطن:
لو لقيتي حاجة جوه جفنك ، ممكن تحاولي تخرجيها بعود قطن مبلول ، امسكي جفنك بصوباع واحد ، وحطي عليه عود القطن ، وبحركة دائرية بالراحة ، شيلي اللي جوه عينيكي.
5- اغمري عينك في ماية نضيفة:
لو عندك كوب عين متاح استخدميه ، اول حاجة اشطفي كوب العين بالماية ، امليه لحد نصه بماية نضيفة او بغسول العين ، وبعدين حطي الكوب مباشرة على العين ، واضغطي على الكوب على بشرتك لمنع اي تسرب ماية ، ميلي راسك لورا وافتحي عينك على الاخر ، حركي عينك من جنب للتاني وفوق وتحت عشان تخلي الماية تغسل كل اجزاء العين.
لو كوب العين مش متاح عندك او هتخافي تستخدميه ، اعتمدي على الطريقة دي ، هاتي طبق املية بالماية وحطي راسك فيه وعينيكي مفتوحة ، وحركي عينك عشان الماية تغسل كل الاجزاء ، اول ما تخرجي راسك من الماية ، ارمشي كذا مرة عشان تعرفي لو اللي في عينيكي خرج ولا لا.
الاختيار التالت هو انك تحطي عينك تحت الماية الجارية ، اما تحت الحنفية او الدش ، امسكي الجفن اللي تحت واسحبيه بايدك شوية مع امالة راسك لجنب واحد ، وخلي الماية تطرد اللي دخل في عينك.
6- اغسلي عينك مدة وقت مناسبة:
مهم تعرفي انتي محتاجة وقت قد ايه لشطف عينك ، لو دخل في عينك اي حاجة خفيفة زي صابون الايد او الشامبو ، شطف العين لمدة 5 دقايق هتكون كافية ، اما لو دخل فيها اي مواد كيميائية ، اتأكدي من شطف عينيكي لمدة 15 دقيقة على الاقل ، اما لو دخل فيها مادة قلوية زي هيدروكسيد الصوديوم او الكاسيوم ، اشطفيها لمدة 60 دقيقة على الاقل ، وافتكري دايما ان لو دخلت اي مواد كيميائية في عينك ، اطلبي العناية الطبية.
7- اطلبي مساعدة شخص:
ممكن تطلبي من شخص يساعدك ويفحص عينك بالنيابة عنك ، لان الشخص التاني هيكون اهدا منك ومش متوتر زيك وهيدور على الحاجة اللي دخلت عينك بهدوء اكتر ، اسحبي جفنك وبصي لتحت وفوق ببطء عشان تسمحي للشخص بفحص عينك كويس ، واتأكدي انه يغسل ايده قبل ما يفحص عينك.
تعملي ايه لو فركتي عينك وايدك مكانها فلفل حار:
الافضل ماتغسليش العين بالماية لان ده هيزود الحرقان ، في الحالة دي استخدمي اللبن لانه حامضي وهيفكك الكابسيسين في الفلفل الحار ، وبالتالي هيخفف الالم ، اول حاجة اغسلي ايدك بالصابون وبعدين انقعيهم في اللبن للتخلص من اي اثار من الفلفل الحار ، وبعدها بللي منديل باللبن واعملي بيه ضغط بالراحة على العين.