10 نصايح صحية سهلة هيفرقوا معاكي
كلنا عارفين ان “الصحة ثروة” ولازم نحافظ عليها ، ولكن معظمنا مازال مش بيمشي على العادات الصحية اللي تحافظ على صحتنا ، وانتي مش مضطرة تغيري اسلوب حياتك كله عشان تبقي اكتر صحة ، لانه الحقيقة من الصعب انك تعملي تغيير جذري في اسلوب حياتك كله ، وكمان الحفاظ عليها بيكون اصعب ، ولكن انتي تقدري تدمجي بعض التغييرات في روتينك اليومي هتفرق معاكي بمرور الوقت وهتحسي انك في صحة ولياقة افضل ، والنهاردة في المقال بتاعنا هنشارك معاكم 10 نصايح صحية سهلة تدخليهم في روتينك اليومي ، لانه من السهل انك تعتمدي تغييرات بسيطة وتنتظمي وتحافظي عليها.
نصايح صحية سهلة:
1- استخدمي السلم على قد ما تقدري:
مافيش شك ان الاسانسير والسلالم المتحركة بتساعد على توفير الوقت ، ولكن كمان للاسف انها بتساعد على تقليل نشاطنا البدني ، عشان كده بننصحك انك تحاولي تستخدمي السلم بدل من ركوب الاسانسير عشان تحافظي على لياقتك البدنية ، طلوع السلالم يعتبر تمرين قوي للاشخاص من جميع الاعمار.
طلوع السلم يعتبر طريقة رائعة جدا لتقوية عضلاتك, تحسين مستوى الطاقة, حرق الدهون, تقوية الساقين, تحسين صحة قلبك, ممكن كمان يقلل من خطر الاصابة بمرض السكر وارتفاع ضغط الدم وهشاشة العظام وامراض القلب.
حاولي انك تستخدمي السلالم بقدر الامكان سواء للطلوع او النزول ، لو في محطة القطر, محطة المترو, المول, او اي مكان عام ممكن تستخدمي فيه السلم بدل الاسانسير.
2- استخدمي القرفة بدل السكر في الشاي والقهوة:
بدل ما تستخدمي الكريمة والسكر ، جربي استخدام القرفة المطحونة لاضافة نكهة حلوة للشاي والقهوة ، القرفة مش بس تحتوي على سعرات حرارية اقل من الكريمة والسكر ، ولكن كمان ليها فوايد صحية كتير.
الدراسات اثبتت ان تناول 1 او 3 او 6 جرام من القرفة يوميا بيقلل من نسبة الجلوكوز في الدم ومستويات الكوليسترول الضار عند الاشخاص المصابين بمرض السكر من النوع التاني ، بتقلل من الدهون الثلاثية والبروتين الدهني منخفض الكثافة.
بالاضافة ان القرفة بتخفف من الاحتقان, بتقلل من تصلب العضلات والمفاصل, بتحارب الالتهابات, بتدعم صحة الجهاز الهضمي, وكمان بتعزز من وظائف المخ.
من ناحية تانية السكر مش بيحتوي على مغذيات او بروتينات او دهون صحية او انزيمات ، والافراط في اكل السكر ممكن يزود من خطر الاصابة بمرض السكر, امراض القلب والاوعية الدموية, امراض الكبد, الزهايمر, وكتير من المشاكل الصحية الخطيرة.
ولازم تعرفي ان السكر موجود بأشكال مختلفة بالاضافة للسكر المكرر العادي المتاح بسهولة ، يعتبر شراب الذرة وشراب القيقب من الاشكال السائلة للسكر.
3- جربي مضمضة الزيت:
صحة الفم والاسنان ليها تأثير مباشر على صحتك العامة ، حتى ان صحة الفم الجيدة بتقلل من مخاطر المشاكل الصحية زي السكتات الدماغية وامراض القلب ، ومضمضة الزيت تعتبر واحدة من طرق علاج الفم السهلة والبسيطة ، والدراسات اثبتت ان مضمضة الزيت بتساعد على تقليل تكوين البلاك, التهاب اللثة الناتج عن البلاك ، واثاره الايجابية بتمتد لكل اجزاء جسمك ، كل جزء من اللسان بيرتبط باعضاء مختلفة ، زي الكلى, الرئتين, الكبد, الامعاء الدقيقة, القلب, المعدة, القولون ، وبالتالي مضمضة الزيت بتساعد على ازالة السموم من الجسم كله.
واثبتت الدراسات ان عملية مضمضة الزيت يعتبر علاج وقائي وعلاجي لتنقية نظام جسمك كله ، لازم تعملي مضمضة الزيت على معدة فاضية ، ويفضل يكون اول حاجة الصبح ، امشي على الخطوات دي.
– هاتي معلقة كبيرة من زيت جوز الهند.
– مضمضي بيها حوالين الفم كله لمدة 20 دقيقة.
– بعدها اتخلصي من الزيت ، واتجنبي بلعه تماما.
– اشطفي الفم بالماية الدافية.
– واخر حاجة استخدمي الفرشة والمعجون والخيط لو بتستخدميه بالطريقة العادية.
4- خدي حمام بارد قبل النوم:
درجة حرارة الجسم المناسبة مهمة جدا للحصول على نوم جيد ، لما بتاخدي حمام بارد قبل النوم بتنخفض درجة حرارة جسمك ، وده هيساعدك على النوم بشكل اسرع ونوم افضل.
بالاضافة ان الحمام البارد بالليل بيحسن الدورة الدموية, بيقلل من التوتر, بيقلل من اعراض الاكتئاب.
النوم السليم ضروري للصحة الجسدية والعقلية ، في حين ان عدم النوم بشكل كافي ممكن يسبب السمنة, امراض القلب, ارتفاع ضغط الدم, السكتات الدماغية, مرض السكر.
عشان كده بننصحك قبل النوم تاخدي حمام بارد, اطفي كل الاجهزة الالكترونية ، واسمعي موسيقى هادية او اقري كتاب لتحسين كمية ونوعية نومك.
5- امشي على قاعدة 20/20/20 لعينيكي:
حافظي على عينيكي بقاعدة 20/20/20 وهي طريقة سهلة وفعالة جدا لصحة العين ، كتير من الاشخاص بيقضوا وقت طويل قدام الشاشات على اللاب توب او الموبايل او التليفزيون ، وده بيسبب ضغط كبير على العين وممكن يسبب ارهاق للعين.
واجهاد العين ممكن يأدي لحكة في العين, جفاف العين, عدم وضوح الرؤية, الصداع, زيادة الحساسية للضوء, ضعف التركيز.
ولتقليل اجهاد العين وتحسين نظرك ، امشي على قاعدة 20/20/20 ، وهي بكل بساطة ان كل 20 دقيقة هتقضيها قدام الشاشة ، خدي قصادها استراحة لمدة 20 ثانية ، وركزي عينيكي على اي حاجة على بعد 20 قدم على الاقل ، وفي نفس الوقت حاولي تغمضي عينيكي بشكل متكرر لمنعها من الجفاف.
6- مارسي التأمل لمدة 10 دقايق يوميا:
التأمل يعتبر من الممارسات القديمة اللي المفروض كلنا نجربها لمدة 10 دقايق على الاقل يوميا ، التأكل يعتبر نوع من الطب التكميلي للعقل والجسم ، لانه بيعمل حالة عميقة من الاسترخاء وتهدئة العقل.
التأمل بيساعد على تقليل التوتر ، وبيساعدك انك تشتغلي تحت ضغط بتوتر اقل ، التأمل المنتظم ممكن يأدي لتركيز افضل, وذاكرة افضل, ضغط ده منخفض, مناعة جيدة.
وفي طرق مختلفة للتأمل للمبتدئين ، ممكن تجربي تركزي انتباهك لمدة 10 – 15 دقيقة يوميا وزيادة مدة الجلسة بالتدريج ، في النوع ده من التأمل ركزي على حاجة واحدة محددة ، سواء تنفسك, احساس في جسمك او اي حاجة معينة خارجية.
7- خدي معاكي ماية ووجباتك الخفيفة:
اكتر حاجتين ممكن يأثروا على صحتك هما عدم شرب كمية كافية من الماية ووجبات خفيفة غير صحية.
ولحل المشكلة دي ، ابدأي تاخدي معاكي ازازة ماية كبيرة وبعض الوجبات الخفيفة الصحية في اي مكان تروحيه ، الماية ضرورية للترطيب ، لانها بتنظم درجة حرارة الجسم, بتلين المفاصل, بتحمي انسجة جسمك, بتساعد الجسم في ازالة الفضلات, بتحسن الهضم ، وانك تاخدي معاكي ازازة ماية في كل مكان تعتبر افضل طريقة لضمان الترطيب طول اليوم ، ده كمان هيخليكي تشربي الماية بدل المشروبات الغازية السكرية لو حسيتي بالعطش في اي وقت ، وممكن تظبطي منبه لشرب الماية على فترات منتظمة.
مع الماية خدي معاكي بعض الوجبات الخفيفة الصحية زي التفاح, البرتقان, العصير الطبيعي, المكسرات.
8- اشربي ماية بالليمون اول حاجة الصبح:
للحفاظ على صحتك بدل ما تشربي ماية عادية او قهوة او شاي او حاجة الصبح ، اشربي ماية بالليمون ، المشروب ده هيساعد على تحفيز اعضاءك ، لانه بيساعد على ازالة السموم من الجسم ، ومش بس الصبح ، شرب الماية بالليمون اي وقت خلال اليوم ممكن انه يساعد على تهدئة او تحييد الاحماض في الجسم.
الليمون مش قلوي بطبيعته ، ولكن بيحتوي على نسبة منخفضة من السكر ومحتوى عالي من المعادن القلوية ، وده بيوفر تأثير قلوي على الجسم ، بالاضافة ان حمض الستريك الموجود في الليمون بيساعد جسمك في التخلص من السموم الضارة ، وبيحسن الهضم.
الليمون بيحتوي على نسبة عالية من فيتامين سي ، واللي يعتبر ضروري للنمو والتطور الطبيعي ، وليه فوايد صحية كتير جدا.
عشان تحضري كوباية من ماية الليمون ، ببساطة اعصري ½ ليمونة على كوباية ماية فاترة ، وضيفي شوية عسل للتحلية واشربيه.
ملحوظة: استخدمي عصير الليمون الطازة بدل الجاهز المعبأ في زجاجات.
9- اختاري المنتجات الطازة بدل المعلبة:
حاولي دايما تاكلي المنتجات الطازة بدل المعلبة او المحفوظة للحفاظ على صحتك ، الفواكة والخضروات الطازة بتحافظ على قيمتها الغذائية بالاضافة ان طعمها افضل.
من ناحية تانية المنتجات المعلبة زي الخضار, الشوربة, البقوليات بتحتوي على مستويات اعلى من الصوديوم والسكر ، وكمان بتحتوي على مواد حافظة كيميائية ضارة ، بالاضافة ان طعم الاطعمة المعلبة مش بيكون بنفس جودة الطازة.
كمان الافضل لما تشتري الفواكة والخضروات الطازة اختاري المنتجات العضوية لمنع التعرض للمواد الكيميائية الضارة ، وعلى الرغم من ان المنتجات العضوية بتكون اغلى ، الا اننا مانقدرش نتجاهل فوايدها الصحية.
ضروري تغسلي المنتجات الطازة كويس تحت الماء الجاري قبل اكلها ، لان ده هيساعد في التخلص من الاوساخ والاتربة والكائنات الدقيقة اللي ممكن تكون مترسبة على سطحها.
10- استخدمي طبق اصغر للوجبات:
حيلة صحية تانية بسيطة وسهلة وهي اختيار طبق اصغر لوجباتك لتقليل السعرات الحرارية ومنع الافراط في الاكل ، اكل السعرات الحرارية العالية هو السبب الرئيسي للسمنة, ارتفاع الكوليسترول, امراض القلب.
ولانه مش دايما هتعرفي تحسبي عدد السعرات الحرارية اللي بتاكليها ، فأسهل طريقة تضمني بيها تقليل السعرات الحرارية هو انك تاكلي وجبتك في طبق اصغر.
لان الدراسات اثبتت ان الناس بيستخدموا عينيهم لحساب السعرات الحرارية مش معدتهم ، وبالتالي الاكل في طبق اصغر هيلعب دور مهم في منع الافراط في الاكل بشكل مش مقصود.
