ازاي تعملي Plopping للشعر للحصول على كيرلي مثالي من غير حرارة
البنات اللي شعرهم كيرلي ، اكيد عارفين ان تصفيفه بيحتاج مجهود ووقت للحصول على كيرلي مثالي ، وواحدة من اسهل التقنيات لعمل الشعر كيرلي من غير حرارة هي تقنية ال Plopping ، في حين ان الاسم ممكن يبقى غريب ، الا انه زي السحر للشعر المموج والكيرلي ، وهو مناسب سواء شعرك قصير او طويل ، تعالوا نشوف مع بعض طريقة عمل Plopping للشعر للحصول على شعر كيرلي مثالي من غير حرارة.
ايه هو ال Plopping:
ال Plopping هو طريقة تجفيف بتستخدم للحفاظ على تجعيد الشعر ، والتقنية دي بتستخدم فيها تيشرت قطن او فوطة مايكروفايبر او من الالياف الدقيقة للحفاظ على تجعيدات الشعر متحددة اثناء ازالة الماية الزيادة من الشعر ، وتقدري بعد فك الشعر تستخدمي السيشوار على درجى حرارة منخفضة او الديف يوزر لنتايج افضل.
ايه هو افضل وقت لعمل ال Plopping:
افضل وقت هو بعد وضع منتجات تصفيف الشعر سواء موس او جل الشعر ، ولكن بالنسبة للبنات اللي شعرهم ناعم الافضل يعملوا ال Plopping قبل وضع المنتجات لازالة الماية الزيادة اللي بتقل الشعر.
طريقة عمل Plopping للشعر:
1- اول حاجة اغسلي شعرك ورطبيه بالبلسم ، اهم حاجة اختيار الشامبو والبلسم المناسبين لشعرك ، وحاولي تخلي على الشعر كمية صغيرة من البلسم على الشعر ، بما يكفي بس لاحساس ناعم على الشعر ، ده هيضيف ترطيب لشعرك وهيبقى اساس لمنتجات تصفيف الشعر.
2- ابدئي في تجعيد الشعر بعد الغسيل ، بعد ما تخرجي من الحمام هتحسي بشعرك مبلول اوي ، لكن ماتعصريش منه الماية بدل كده ، اقلبي راسك وخلي شعرك كله لقدام وهزيه بالراحة من جنب للتاني من غير ما تلمسي تجعيد الشعر ، ده هيأدي للتخلص من الماية الزيادة من غير ما تفكي تجعيدات الشعر ، الشعر المفروض يكون رطب ، مش مبلول اوي قبل ال Plopping.
3- هاتي منتجات تصفيف الشعر المناسبة ، حطي كمية من الجل/ او كريم خاص بالشعر الكيرلي/ او Leave-in conditioner على ايدك ووزعيه بالتساوي على شعرك ، وجعدي الشعر لفوق من الاطراف لناحية الجذور مع عصر الكمية الماية الزيادة في نفس الوقت ، تجعيد الشعر في المرحلة دي هيساعد على تحديد شكل الكيرلي.
4- حطي على سطح مستوي على السرير او على ترابيزة فوطة او تيشرت قطن بأكمام قصيرة ونزلي شعرك في النص ، ولفي الفوطة او التيشرت على الشعر من قدام بالعكس واربطي الطرفين في بعض.
5- سيبي شعرك ملفوف بالفوطة من 15 – 45 دقيقة ، ممكن كمان تنامي بيه وتفكيه الصبح ، مع التجربة هتعرفي ايه الانسب ليكي وبيعتمد كمان على نوع الكيرلي اللي انتي عايزاه ، هتحتاجي تختاري الوقت اللي هيديكي تجعيد واسع مرن او تجعيد قوي ، بالنسبة للبنات اللي شعرهم مجعداوي وهايش الافضل مايفضلوش لافين الشعر فترة طويلة.
نصيحة: للحصول على افضل النتايج ، اتأكدي انك تخلي الفوطة او التيشرت فضفاض بدرجة كافية عشان مايبوطش الكيرلي ، وفي نفس الوقت يبقى مشدود بدرجة كافية عشان يحافظ على الشعر في مكانه ومايقعش من الفوطة.
هل ممكن تعملي Plopping للشعر الويفي؟
تقدري تعملي التقنية للشعر الويفي بنفس الخطوات اللي احنا قولناها فوق للشعر المجعد.
هل ممكن عمل Plopping للشعر الاملس؟
بشكل عام التقنية دي للشعر المجعد ، ولكن لو شعرك تقدري تستخدميه لو عايزة تضيفي تجعيدات بسيطة لشعرك.
كام مرة ممكن تعملي ال Plopping لشعرك؟
الهدف من التقنية دي هي تسريع عملية تجفيف الشعر والحفاظ على شكل الكيرلي متحدد ، وبالتالي تقدري تعمليها فيها كل مرة تغسلي شعرك.
الطريقة بالفيديو:
@marisascurls How to plop curly hair #plopping #plop #plopcurls #ploppingtutorial #ploppingmycurls #curls #curlyhair #curlyhairtutorial #curlytutorial #curlytips
