10 نصايح للشعر الكيرلي لازم تعرفيهم
الشعر الكيرلي بيحتاج عناية خاصة عشان تحافظي على ترطيبه وشكل التجعيدات بتاعته متحددة ، والنهاردة من خلال موضوعنا هنساعدك في العناية بيه من خلال 10 نصايح للشعر الكيرلي هيفرقوا معاكي.
نصايح للشعر الكيرلي:
1- استخدمي Leave-in Conditioner:
لو متعودة تحطي جل عشان تحافظي على شكل الكيرلي وتثبتيه ، بننصحك تخلطي كمية من ال Leave-in conditioner مع جل تصفيف الشعر ، الطريقة دي هتحافظ على شكل تجعيدات الشعر وعلى نعومة الخصل ، ال Leave-in conditioner مش بس بيمنع تشابك الشعر ، ولكن كمان بيمنع الضرر الناتج عن اشعة الشمس والهوا الجاف.
2- ماتستخدميش منتجات كتير:
بننصحك ماتستخدميش اكتر من منتجين على شعرك عشان ماتتقليش الشعر ومايبقاش فيه Volume، وما تحطيش المنتج على فروة الراس مباشرة ، لان ده هيأدي لتراكم الدهون ، بدل كده حتى المنتج بعيد عن فروة الراس لحد اطراف الشعر.
3- استخدمي الساتان والحرير:
عشان تحافظي على الشعر الكيرلي اثناء النوم وتصحي تاني يوم بشعر ناعم من غير تشابك ولا هيشان ، البسي كاب حرير لتغطية الشعر اثناء النوم ، ده هيساعد على تقوية تجعيد الشعر وهيخليكي تصحي بشعر بيلمع وحيوي وسهل التحكم فيه ، او نامي على كيس مخدة ساتان او حرير.
4- اعملي ماسك للشعر:
اكيد انتي مش هتقدري تتحكمي في الجو ولا في الحرارة والرطوبة ، ولكن انتي تقدري تتحكمي في شعرك وتنقذيه من الجفاف عن طريق الترطيب بشكل صح باستخدام ماسك لترطيب الشعر.
5- استخدمي واقي من الحرارة:
تجفيف الشعر وتصفيفه بالحرارة بيضر شعرك وبيزود من تقصف الاطراف وتفكك بروتين الشعر ، ولكن لحسن الحظ ان في منتجات كتير ممكن تساعدك على حماية شعرك من الحرارة ، عشان كده في الايام اللي ماعندكيش فيها وقت انك تسيبي شعرك ينشف بشكل طبيعي ، اتأكدي من وضع واقي من الحرارة قبل تصفيف الشعر.
6- استخدمي مشط للشعر المجعد:
الامشاط اللي اسنانها واسعة بتمنع التقصف وبتحافظ على شكل تجعيد الشعر ، وده هيحافظ على شعرك صحي ، والانواع دي من الامشاط مناسبة لكل انواع الشعر وخصوصا لتجعيد الشعر ، الامشاط اللي اسنانها واسعة بتساعد على فك تشابك الشعر بطريقة الفرشة ماتقدرش تعمله.
7- سرحي الشعر من الاطراف للجذور:
ابدأي دايما تمشيط الشعر من الاطراف ، واطلعي للجذور ، الطريقة دي هتفك تشابك العقد بسهولة وهتحمي شعرك من التقصف والتكسر.
8- تمشيط الشعر اثناء وضع البلسم:
تمشيط الشعر بمشط اسنانه واسعة اثناء وضع البلسم يعتبر طريقة فعالة لفك عقد وتشابك الشعر ، ابدئي التمشيط من اطراف شعرك ، واطلعي للجذور ، الطريقة دي كمان بتفك عقد الشعر بسهولة وبتمنع التكسر ، وبعد استخدام البلسم اتأكدي من غسله كويس من الشعر لمنع تراكم البقايا على فروة الراس.
9- استخدمي منتجات الشعر الخالية من السلفات:
الشعر الكيرلي عادة بيكون جاف وبيحتاج ترطيب ، والسلفات في منتجات الشعر ممكن تبقى قاسية وتسبب جفاف الشعر ، وخصوصا الشعر الكيرلي ، السلفات بتسبب تلف خصلات الشعر ، وده بيخليها ضعيفة وهايشة ، عشان كده بننصحك تدوري على المنتجات المعمولة مخصوص للشعر الكيرلي ، بننصحك تستخدمي انواع شامبو داخل في مكوناتها زيوت زي زيت الارجان وخالي من السلفات.
10- قص الشعر:
الشعر المجعد بيتحول تماما وهو جاف عن وهو مبلول ، في طوله, قوامه, لونه ، وده بيخلي من الصعب على المتخصص تصور النتيجة النهائية لو قص الشعر وهو مبلول ، اما لو قص الشعر وهو جاف هيقدر يحدد مكان كل تجعيدة في الشعر ، وده هيخليه يقص بشكل مظبوط اكتر.