7 منتجات تجميل دكاترة الجلدية ضافوها للقائمة السودا للمنتجات اللي ممكن تضر البشرة
كلنا اتعملنا اننا نثق دايما في منتجات التجميل اللي مكتوب عليها “موافق عليه من قبل اطباء الجلدية” ، ونصايح واراء الاخصائيين مهمة لانها بتكون مهنية ، والنهاردة من خلال موضوعنا هنشارك معاكم 7 منتجات تجميل مضرة للبشرة حسب توصيات دكاترة الجلدية.
منتجات تجميل مضرة للبشرة:
1- لوشن الايد والجسم:
الكريمات عادة بتكون اتقل واكتر لزوجة من اللوشن ، الكريمات بتخترق الجلد وبتكون حاجز بيمنع فقدان الرطوبة من الجلد ، في حين ان اللوشن مش بيعمل ده ، اما لوشن الجسم بتحتوي عادة على نسبة عالية من الماية ، اللوشن هيكون مفيد للبشرة غير الجافة بشكل مفرط او لو بشرتك دهنية ومش عايزة ملمس دهني على الجلد.
2- ماسكات الفحم:
ماسكات الفحم ليها معارضين كتير من دكاترة الجلدية ، لان النوع ده من الماسكات مش بس مؤلمة ، ولكن كمان بتضر بنية الجلد ، مكونات الماسك ده بتكون قاسية جدا على البشرة ، لانها بتزيل خلايا الجلد والشعر الرقيق والزيوت الطبيعية من الجلد ، والافضل انك تستخدمي بدالها ماسكات الطين افيد والطف على البشرة.
3- سبراي واقي الشمس:
السبراي الواقي من الشمس اكيد هو سهل جدا في الاستخدام ، لكن الافضل استخدام الكريمات ، لانه مستحيل انك هتعرفي تحطي من السبراي طبقة سميكة على البشرة وبالتالي مش هيعمل طبقة حماية كافية ، بالاضافة ان عند رشه المنتج بيفقد جزئيا عناصره النشطة قبل الوصول للجلد ، كمان دكاترة الجلدية بينصحوا بمنتجات الوقاية من الشمس اللي بتحتوي على اكسيد الزنك لانها بتكون الطف على الجلد واكتر فاعلية ، وبتعكس الاشعة فوق البنفسجية ومش بتمتصها.
4- زيت التان:
دكاترة الجلد مش بينصحوا كمان بزيت التان او زيت التسمير ، لانها بتوفر حماية قليلة من الاشعة فوق البنفسجية وكمان بتسد المسام ، وده هيأدي لزيادة مشاكل الجلد وهيضره.
5- كريم الهيدروكورتيزون:
الكريم ده هو عبارة عن منتج ستيرويد قوي ، والمفروض يتم استخدامه لما الشخص يكون بيعاني من امراض جلدية خطيرة ، ومع ذلك ، في اشخاص كتير بيستخدموه على حب الشباب من غير وصفة طبية وده مضر جدا لانه ممكن يسبب طفح جلدي, ترقق الجلد, التهاب الجلد, حب الشباب ، بعد استخدامه فترة طويلة.
6- ماسكات القدمين:
دكاترة الجلدية مش ينصحوا باستخدام ماسكات القدمين المرطبة او المغذية ، الكريمات ليها نفس التأثير واسهل في الاستخدام ، وبالتالي ماسكات القدمين مش عملية ومش مريحة بشكل كافي.
7- زيت جوز الهند:
زيت جوز الهند ليه شعبية كبيرة في عالم التجميل ، سواء للبشرة او الشعر ، ولكن هو مش الاختيار الافضل لاستخدامه للوجه ، لانه بيخلي البشرة دهنية وبيسد المسام ، ونتيجة لده هيأدي لظهور حب الشباب والتصبغ.
