6 نصايح للعناية ببشرتك في الصيف
اغلب النصايح بتبقى عن طرق العناية بالبشرة في الشتا واهمية ترطيبها ، ولكن في الصيف كمان البشرة بتكون معرضة اكتر للمشاكل بسبب حرارة الجو والرطوبة اللي بتأثر بشكل سلبي على بشرتنا ، والنهاردة من خلال موضوعنا هنتعرف على 6 نصايح للعناية ببشرتك في الصيف تدخليهم في روتينك اليومي.
نصايح للعناية ببشرتك في الصيف:
1- حماية بشرتك من الشمس:
كلنا عارفين ان الشمس من اكتر الحاجات اللي ممكن تضر بشرتك ، عشان كده لازم تتأكدي من استخدام واقي الشمس قبل ما تخرجي من البيت ، ممكن تستخدمي واقي شمس كريم للوش ، واقي سبراي للجسم.
2- اعتني بالساقين:
لو هتحلقي الساقين ، اتأكدي انك تعملي ده بشكل صح ، اتأكدي من تقشير بشرتك لفتح المسام ، عشان يبقى سهل الوصول لبصيلات الشعر اثناء الحلاقة ، جربي الحلاقة بمنتج طبيعي زي زيت جوز الهند بدل الجل او الصابون ، عشان الجلد يبقى ملمسه انعم وشكله صحي اكتر ، وبعد الحلاقة اتأكدي من ترطيب بشرتك عشان تمنعي جفاف الجلد.
3- التحكم في المسام:
النصيحة دي مهمة للوش ولكن هي مناسبة كمان لاي جزء في جسمك ، اتأكدي من تقشير الجلد دايما لازالة خلايا الجلد الميتة اللي بتكون طبقات على البشرة ، لان الطبقات الاضافية من الجلد دي بتسد المسام ، اتأكدي من تنضيف بشرتك بالغسول المناسب واستخدام التونر والترطيب مرتين في اليوم لتقليل حجم المسام الواسعة.
4- استخدام ماسك البشرة:
استخدمي ماسكات مختلفة عشان تفيدي بشرتك بقدر الامكان ، سواء ماسكات للنضارة, تنضيف المسام, تهدئة البشرة خصوصا بعد التعرض للشمس فترة طويلة ، ومن افضل الماسكات للصيف هي ماسكات الفحم, النعناع, جل الصبار.
5- التقليل من المكياج:
في الصيف بيكون صعب ان المكياج يستمر فترة طويلة بسبب حرارة الجو والرطوبة ، عشان كده افضل نصيحة ليكي هي تقليل المكياج ، في بعض الاوقات ، بيكون القليل اكتر ، كل ما قل المكياج اللي بتستخدميه ، زادت قدرة بشرتك على التنفس ، كمان لو انتي بره البيت وبدأتي تعرقي المكياج مش هيتأثر بشكل كبير ، لان مش حاطه من الاول مكياج كتير ، ولاختيار اخف على بشرتك في الصيف استخدمي BB كريم بدل كريم الاساس ، وتينت ملون للشفايف بدل الروج.
6- اشربي ماية كتير:
كلنا عارفين ان شرب الماية مهم جدا ، ولكن للاسف معظمنا مش بيشرب كمية ماية كفاية في اليوم ، مهم جدا تجديد بشرتك وافضل طريقة تحققي بيها ده هو شرب الماية ، لانه بيحتوي على كل العناصر الغذائية اللي بشرتك محتاجاها.
لو مشيتي على ال 6 نصايح دول هتحافظي على بشرتك صحية خلال فصل الصيف.
