5 وصفات طبيعية لبشرة نضرة ومشرقة في الصيف
مع دخول فصل الصيف ، بنحاول نهتم ببشرتنا بشكل اكبر ، ونحميها من الرطوبة والحرارة واشعة الشمس ، ومن اسهل الطرق للعناية بالبشرة هي استخدام الماسكات ، اللي مش بتتطلب مننا نصرف فلوس كتير ، لان كل مكوناتها طبيعية وموجودة في مطبخك ، والنهاردة هنشارك معاكم 5 وصفات طبيعية لبشرة نضرة في الصيف هتساعد على تجديد شباب بشرتك في اقل من 30 دقيقة.
وصفات طبيعية لبشرة نضرة في الصيف:
1- الماسك الدهبي:
المكونات:
– 1 معلقة صغيرة كركم.
– 1 معلقة صغيرة عسل.
– 1 معلقة صغيرة لبن.
امزجي الكركم مع العسل وبعدين ضيفي لهم اللبن لحد ما تتكون عندك عجينة سميكة ، وزعيها على بشرتك ، وسيبيها لما تنشف اغسلي البشرة بالماية.
الكركم يعتبر مكون رائع للبشرة بسبب خصائصه المضادة للاكسدة والمضادة للالتهابات والبكتيريا ، ولما بيتخلط مع العسل واللبن فوايده بتضاعف كمرطب ومقشر للبشرة.
2- ماسك التفتيح الليلي السريع:
المكونات:
– 1 معلقة كبيرة عصير طماطم.
– 2 معلقة كبيرة من حليب جوز الهند.
اخلطي عصير الطماطم مع حليب جوز الهند ، ووزعي الخليط غي البشرة في 3 طبقات ، وسيبي كل طبقة تنشف قبل ما تحطي الطبقة التانية فوقيها ، سيبي الماسك على بشرتك طول الليل ، واغسليه الصبح.
عصير الطماطم ممكن يعمل المعجزات لبشرتك ، وده بيحصل بشكل خاص لما تخلطيه مع حليب جوز الهند ، حمض الفاكهة الممزوج بحمض اللاكتيك في اللبن بيدي بشرتك تأثير تفتيح وتنضيف.
3- ماسك التفتيح الليلي:
المكونات:
– 1 معلقة كبيرة عصير ليمون.
– 1 معلقة كبيرة من زيت جوز الهند.
اخلطي المكونات مع بعض ، وزعي الخليط على بشرتك بالتساوي مع التدليك ، وسيبيه طول الليل واغسليه الصبح ، طبقيه على الاقل 3 مرات عشان تبدأي تشوفي النتايج.
كمان نفس المكونين عصير الليمون وزيت جوز الهند ، ممكن يستخدموا للشعر كماسك تفتيح وترطيب.
4- ماسك مضاد للالتهابات:
المكونات:
– 2 معلقة كبيرة عسل.
– 2 معلقة كبيرة زبادي.
– 1 بياض بيضة صغيرة.
– 1/3 كوباية شوفان مطحون.
– ½ كوباية ماية سخنة.
امزجي الشوفان المطحون مع الماية ، وبعدها ضيفي باقي المكونات وقلبيهم مع بعض كويس ، وزعي الخليط على بشرتك ، سيبيه لمدة 15 دقيقة وبعدها اغسليه.
الماسك ده مفيد جدا لعلاج الالتهابات والاحمرار والتهيج ، لانه بيساعد على تبريد البشرة وبيخفف الالتهابات.
5- ماسك لاضاءة ونضارة البشرة:
المكونات:
– 1/3 كوباية كاكاو.
– ¼ كوباية عسل.
– 3 معالق كبيرة كريمة خفق تقيلة.
– 2 معلقة كبيرة من دقيق الشوفان.
امزجي المكونات مع بعض لحد ما تتكون عندك عجينة سميكة ، وزعيها على بشرتك ، سيبيها لمدة 15 دقيقة ، وبعدها اغسلي البشرة بماية فاترة.
الكاكاو غني بمضادات الاكسدة اللي بتساعد على منع تلف خلايا البشرة ، وفاعلية الماسك بتزيد لما تجمعيه مع باقي المكونات.
الماسكات ال 5 دي مثالية للتخلص من اي احمرار وتهيج, ولترطيب البشرة, واكيد لتحضير بشرتك لفصل الصيف والحصول على بشرة نضرة ومضيئة.