14 ماسك للشعر للحصول على شعر ناعم ومترطب
المكونات الطبيعية ليها تأثير فعال جدا لمشاكل الشعر ، والنهاردة من خلال موضوعنا هنشارك معاكم مجموعة ماسكات علاجية للشعر رائعة جدا لتهدئة واصلاح الشعر التالف من الصبغة ، ومن استخدام ادوات التصفيف بالحرارة ، والماية المالحة وحتى الكلور ، وكلها من مكونات طبيعية موجودة في مطبخك.
ماسكات علاجية للشعر:
1- ماسك زيت جوز الهند:
زيت جوز الهند بيساعد على تنعيم الشعر الجاف والتحكم في الهيشان ، الشعر بيمتصه بسهولة بسبب الاحماض الدهنية الموجودة فيه ، وبيحتوي على فيتامين E لزيادة نمو الشعر ، وبيحتوي على فلتر للاشعة فوق البنفسجية لمنع اضرار اشعة الشمس ، وخصائصه المرطبة بتحمي الشعر من الجفاف.
في طرق كتير تقدري تستخدمي بيها زيت جوز الهند للشعر ، على سبيل المثال ، تقدري تستخدميه على الشعر قبل الشامبو ب 10 دقايق لو بتستخدميه كعلاج لتقوية الشعر ، ولو هتستخدميه كعلاج ترطيب عميق ، استخدميه بدل البلسم وحطيه من نص الشعر لحد الاطراف للترطيب وازالة الهيشان ، كمان فرك زيت جوز الهند على فروة الراس ليه تأثير مضاد للميكروبات ، وده بيساعد على منع قشرة الراس ، وازالة انسداد المسام ، وزيادة نمو الشعر ، ومهما كانت الطريقة اللي هتستخدمي بيهازيت جوز الهند دوبيه الاول بفركة بين ايديكي واستخدمي مشط واسع لتوزيعه على فروة الراس وخصلات الشعر بالتساوي ، وزيت جوز الهند يعتبر زيت تقيل عشان كده استخدمي الكمية المناسبة لنوع وكثافة شعرك ، للشعر الناعم استخدمي معلقة صغيرة ، وللشعر الكثيف استخدمي معلقة كبيرة.
2- ماسك اللبن والعسل:
لو عايزة ماسك يساعد على علاج تلف الشعر ، استخدمي مزيج اللبن والعسل ، العسل بيحتوي على الكيراتين للمساعدة في تقوية الشعر ومنع التكسر الناتج عن الشعر الضعيف والمتقصف ، بالاضافة انه بيشجع تجديد الخلايا للحصول على فروة راس صحية ، وليه خصائص مضادة للالتهابات ممكن تهدي التهيج ، ولما بيمتزج بالبروتين المليان بالفيتامينات والاحماض الامينية وفيتامين ب 12 والحديد والزنك ، والاتنين مع بعض بيساعدوا على تنعيم الشعر ودعم بنيته.
اخلطي كوباية من اللبن مع معلقة كبيرة من العسل وحطيهم في ازازة سبراي ورشيه على الشعر ، سيبيه لمدة 10 – 20 دقيقة ، بعدها اغسلي شعرك بالشامبو واشطفيه بالماية الدافية للحصول على افضل النتايج.
كل ما كان شعرك اكتر كثافة استخدمي لبن يكون دسم اكتر ، على سبيل المثال لو شعرك خشن استخدمي لبن كامل الدسم ، ولو شعرك خفيف ، استخدمي اللبن خالي الدسم.
3- ماسك الموز وزيت الزيتون:
الموز بيرطب الشعر الباهت والتالف والجاف ، لانه غني بالفيتامينات والمعادن (زي البوتاسيوم) اللي ممكن يقوي الشعر ويوازن درجة الحموضة في فروة الراس ، وزيت الزيتون غني بالدهون الصحية وفيتامين E وده بيخلي الشعر اكتر لمعان ونعومة, بيرطب الشعر ويعالج التلف اللي ممكن يتسبب في تقصف الاطراف وانقسامها.
عشان تعملي ماسك الموز ، استخدمي موزة تكون مستوية مع معلقة كبيرة من زيت الزيتون امزجيهم مع بعض واهرسي الموز كويس لحد ما يبقى ناعم خالي من التكتلات ، لازم الماسك يكون كريمي وناعم جدا ، اثناء الاستحمام حطي الماسك على فروة الراس والشعر ، سيبيه لمدة 15 – 20 دقيقة وبعدها اشطفيه.
4- ماسك الافوكادو وزيت الزيتون:
الافوكادو بيحتوي على المعادن المفيدة للشعر ، وكمان البروتينات والفيتامينات لتغذية وتنعيم الشعر ، وزيت الزيتون هيضيف لمعان ونعومة اضافية على الشعر التالف ، لتحضير الماسك ، استخدمي ½ حبة افوكادو و ½ كوباية زيت زيتون اهرسيهم مع بعض باستخدام شوكة ، وحطي الماسك على الاطراف المتقصفة بس ، وسيبيه لمدة نص ساعة وبعدها اغسليه.
5- ماسك صفار البيض:
صفار البيض غني بالفيتامينات E, A والبيوتين والفولات اللي بتخلي الشعر مقاوم اكتر للتلف ، ودي بعض العناصر الغذائية اللي تم ربطها بنمو الشعر وصحة الشعر ، وضع صفار البيض على فروة راسك ممكن انه يغذي جذور شعرك.
لعمل الماسك ، لازم الشعر يكون نضيف وجاف ، حطي صفار البيض على فروة الراس ودلكيه بصوابعك ووزعيه على الشعر لحد الاطراف ، سيبيه لمدة ساعة واشطفيه بالماية الباردة.
6- ماسك الزبادي:
حمض اللاكتيك الموجود في الزبادي بيساعد على ترطيب الشعر ، ومنع التلف والهيشان ، وبيساعد كمان على ازالة خلايا الجلد الميتة اللي ممكن تتراكم على بصيلات الشعر ، ممكن تخلطي الزبادي مع مكونات تانية كتير على حسب اللي انتي محتاجاه لشعرك ، ممكن تمزجي الزبادي مع زيت جوز الهند لعلاج تساقط الشعر ، او تخلطيه مع العسل للاحتفاظ بالرطوبة ، او مع الافوكادو لتقوية الشعر واضافة اللمعان ، او مع الليمون لموازنة درجة الحموضة في فروة الراس.
وبننصحك بخلط كوباية من الزبادي مع معلقة كبيرة من زيت الزيتون لاضافة اللمعان والنعومة لشعرك ، حطيه على الشعر لمدة 10 دقايق وبعدها اشطفيه بالماية الدافية.
7- ماسك خل التفاح:
خل التفاح ليه فوايد كتير للشعر ، ممكن يساعد على فك تشابك الشعر الطويل والناعم ، ممكن كمان يساعد على قفل المسام للشعر المصبوغ ، وبالتالي تقليل تلاشي اللون بسرعة ، كمان ممكن يساعد على التحكم في الهيشان ، وده بيخليه علاج طبيعي فعال للي بيعانوا من مشكلة الهيشان ، كمان بينضف الشعر من تراكم المنتجات وبيساعد على تقليل تساقط الشعر ، ولكن لو شعرك جاف خليكي حذره في استخدامه لان الافراط في استخدامه على الشعر ممكن يسبب جفاف اكتر عن طريق ازالة كمية كبيرة من الزيوت الطبيعية اللي بتغذي الشعر.
عشان تعملي ماسك خل التفاح ، اخلطي كوباية من خل التفاح مع معلقة كبيرة عسل (العسل يعتبر عامل ربط للحفاظ على الرطوبة في الشعر وفروة الراس) حطي الخليط في ازازة سبراي ورشيه على الشعر ، سيبيه لمدة 10 دقايق وبعدها اشطفيه بماية دافية.
لما تخففي خل التفاح بالماية اخلطي 4 معالق من خل التفاح مع كوباية ماية ، وتقدري تزودي او تقللي التخفيف حسب المناسب لنوع شعرك ، اعرفي ان الشعر الجاف بيحتاج خل تفاح اقل والشعر الدهني ممكن يحتاج خل تفاح اكتر.
8- ماسك السكر البني وزيت جوز الهند:
الماسك ده هيكون مفيد ليكي جدا لو بتعاني من فروة راس جافة وحكة ، الحبيبات الموجودة في السكر بتساعد على تقشير فروة الراس من غير ما تكون قاسية اوي ، وده هينضف فروة الراس من اي قشور وممكن انه يساعد على تقليل قشرة الراس والحكة ، وزيت جوز الهند هيساعد على تحفيز نمو الشعر وابطاء التساقط لانه بيتغلغل بعمق في بصيلات الشعر ، والسكر البني بيعزز من صحة فروة الراس وبيحارب حشرات الشعر وقشرة الراس ، بالاضافة ان زيت جوز الهند بيرطب الشعر وبيضيف له لمعان وبيساعد على منع تكسر الشعر وتقصف الاطراف ، وده بدوره بيساعد على نمو الشعر.
اخلطي 2 معلقة كبيرة من السكر البني مع معلقة كبيرة من زيت جوز الهند ، حطيه على الشعر بعد ما تغسليه بالشامبو مع التركيز على فروة الراس ، بعدها اشطفيه واستخدمي البلسم.
9- ماسك زيت الزيتون وزيت جوز الهند:
زيت الزيتون وزيت جوز الهند يعتبروا من المطريات الطبيعية للشعر اللي بتحافظ على ترطيب الشعر وبتحافظ على نعومتة ولمعانه ، ولو اطراف الشعر جافة بشكل خاص زيت الزيتون هيساعد على ترطيبها ، وبننصحك بخلط ¼ كوباية من زيت الزيتون مع معلقة كبيرة من زيت جوز الهند السخن (دفي الزيت قبل استخدامه ده هيفتح المسام ويخترق الشعر بشكل اعمق) سيبيه على الشعر لمدة 10 دقايق متغطي بكيس بلاستيك وبعدها اشطفيه بماية دافية.
10- ماسك الليمون وبياض البيض:
لو بتستخدمي منتجات كتير على شعرك من منتجات تصفيف ومثبت الشعر واي منتجات تصفيف تانية ، فاكيد هتكوني بتعاني من تراكم على فروة الراس ، والماسك ده هيساعد على تنضيف الشعر من التراكمات ، كمان بياض البيض غني بالبروتينات والفيتامينات اللي بتقوي الشعر التالف ، وبتساعد على ازالة التراكمات ، وده بيخليه رائع لصحة الشعر الدهني وفروة الراس ، والليمون بيساعد على موازنة درجة الحموضة في فروة الراس ، وبيساعد على زيادة نمو الشعر وتقليل تساقط الشعر ، وممكن كمان يضيف لمعان.
اخلطي بياض بيضة مع عصير ليمونة ، وحطي الخليط على الشعر وفروة الراس ويكون نضيف وجاف ، سيبيه لمدة ساعة وبعدها اغسليه.
11- ماسك القرفة:
للاشخاص اللي بيعانوا من ضعف الشعر ومحتاجين لتنضيف وتقوية الشعر وفروة الراس هيستفادوا جدا من ماسك القرفة ، القرفة تعتبر من المحفزات اللي ممكن تزود من تدفق الدم لفروة الراس ، وده هيأدي لتسريع عملية نمو الشعر.
اخلطي معلقة صغيرة من القرفة مع 3 معالق كبيرة زبادي ، وزعي الخليط من فروة الراس للاطراف وغطيه بالكامل بالخليط ، سيبيه لمدة 10 دقايق وبعدها اغسليه بالشامبو.
12- ماسك الشاي الاخضر:
الشاي الاخضر يعتبر من مضادات الاكسدة للشعر وفروة الراس ، بيحمي الشعر من الجذور الحرة ، بيساعد على ابطاء عملية التساقط اللي بتحصل اثناء الدورة الطبيعية لنمو الشعر ، والاشخاص اللي شعرهم باهت او خفيف او فروة راس دهنية هيستفيدوا من ماسك الشاي الاخضر.
انقعي اوراق الشاي الاخضر في ماية مغلية لمدة 5 دقايق وسيبيه يبرد ، بعدها ضيفي له كام نقطة من العسل للترطيب واللمعان ، صبي الخليط في ازازة سبراي ورشيه على فروة الراس والشعر ، دلكي فروة الراس والشعر لحد الاطراف لحد ما يتشبع بالكامل من الخليط ، سيبيه لمدة 10 دقايق وبعدها اشطفيه.
13- ماسك الارز والافوكادو:
لو عايزة شعر اقوى واطول ، ده الماسك المناسب ليكي ، الارز بيحتوي على حمض الفوليك اللي بيساعد على تقوية الشعر ، وفيتامينات E, B, C والاينوزيتول اللي بيساعد على نمو الشعر, تنعيم الشعر, اصلاح التلف ، بالاضافة للخصائص المغذية والمقاومة للتطاير والهيشان الموجودة في الافوكادو ، مع ذلك الاشخاص اللي شعرهم مساميته منخفضة يكونوا حذرين من استخدام علاجات البروتين التانية لان الارز بيحتوي على بروتينات خاصة بيه.
عشان تعملي الماسك ده انقعي كوباية من الارز المغسول في 2 كوباية ماية لمدة 24 ساعة وبعدها صفيه (تقدري تحطي ماية الارز دي في ازازة سبراي وتستخدميه على الشعر لوحده كعلاج) ، وممكن تهرسي حبة افوكادو وتخلطيها مع ماية الارز وتوزعي الخليط على الشعر وسيبيه لمدة 20 – 30 دقيقة ، وبعدها اغسليه.
14- ماسك صودا الخبز:
الشعر الصحي بيبدأ بفروة راس صحية ، وصودا الخبز (الكربوناتو) هي البطل المجهول لفروة راس صحية ، صودا الخبز تعتبر مقشر طبيعي ، بيزيل تراكمات فروة الراس ، وبيزيل الزيوت الزيادة ، وبيعيد توازن درجة حموضة فروة الراس ، بيعالج قشرة الراس, مهديء للتهيج, بيساعد على تنعيم الشعر, وزيادة لمعانه.
للاستخدام اخلطي صودا الخبز مع الماية او الشامبو لتكوين عجينة ، دلكي المعجون ده على فروة الراس والجذور ، واشطفيه بعد دقايق.
