حافظي على شعرك صحي باستخدام زيت الصبار
لو في مكون سحري واحد ممكن يعالج كل مشاكل بشرتك وشعرك ، هيكون هو نبات الصبار بفوايده الكتير اللي مالهاش عدد ، نبتة الصبار تعتبر حل شامل لكل مشاكل الشعر والجلد ، بسبب احتوائه على الفيتامينات والمعادن والاحماض الامينية ، والنهاردة من خلال موضوعنا هنتعرف مع بعض على فوايد زيت الصبار للشعر ، وطريقة استخدامه ، وازاي تعمليه بنفسك في البيت بطريقة سهلة.
زيت الصبار للشعر:
الصبار بيتم استخدامه من قرون طويلة لخصائصه العلاجية ، هو نبات مهديء بيفيد الشعر وفروة راسك بشكل كبير ، بيحتوي على فيتامين A, C, E وكلها تعتبر من مضادات الاكسدة ، بالاضافة انه مصدر طبيعي لفيتامين B ,واللي بيستخدم في كتير المكملات الجمالية للشعر والبشرة.
نبات الصبار بيحتوي كمان على معادن زي الكالسيوم, النحاس, السيلينيوم, المغنيسيوم بالاضافة للاحماض الامينية ، وفي حين ان استخدام جل الصبار من الحاجات المعروفة للشعر ، لكن هل سبق وجربتي زيت الصبار؟ لان الحقيقة مش بيتم تصنيع زيت الصبار ، لكن انتي تقدري تحضريه بنفسك بسهولة في البيت.
طريقة عمل زيت الصبار:
المكونات:
– 1 ورقة صبار.
– ½ كوباية من زيت جوز الهند.
طريقة التحضير:
1- هاتي ورقة الصبار ، اغسليها كويس ، قصي الاشواك الحادة من الجانبين بالمقص ، وافتحيها نصين.
2- خرجي الجل من الورقة بالمعلقة ، واضربيه في الخلاط لحد ما يبقى سايل.
3- في طاسة على النار ضيفي زيت جوز الهند والصبار وقلبي باستمرار ، سخني الخليط لحد ما الزيت يبدأ يتحول للون البني شوية.
4- بمجرد ما يتحول للون البني ، ارفعيه من على النار وسيبيه يبرد.
5- بمجرد ما يبرد ، صفي الزيت وخزنيه في ازازة.
طريقة استخدام زيت الصبار:
بعد ما حضرتي زيت الصبار ، استخدميه على الشعر بانتظام ، خدي كمية من الزيت ووزعيه بالتساوي على فروة راسك وشعرك كله لحد الاطراف ، ودلكيه على الشعر لمدة دقايق ، زي ما بتعملي مع اي زيت تاني ، استخدمي زيت الصبار مرة او مرتين في الاسبوع للحصول على نتايج فعالة.
ممكن كمان تسيبي زيت الصبار على الشعر طول الليل وتغسليه الصبح.
فوايد زيت الصبار للشعر:
1- بيرطب الشعر:
لو بتعاني من مشكلة الشعر الجاف ، استخدمي زيت الصبار بانتظام على شعرك ، المحتوى المائي العالي في جل الصبار مرطب عالي للشعر ، بالاضافة للانزيمات المحللة للبروتين الموجودة في الصبار بتساعد على ترطيب فروة الراس والشعر وحبس الرطوبة ، وده مفيد بشكل خاص للي بيعانوا من شعر جاف جدا وهش.
2- بيمنع الهيشان:
الصبار بيحتوي على احماض امينية ، ممكن تضيف لمعان للشعر الهايش المجعد وتخليه قوي ، لانه بيحبس الرطوبة في الشعر ، ده هيخلي الشعر اكتر نعومة ، واستخدام زيت الصبار على الشعر بانتظام هيأدي لحصول تغيير ملحوظ في مشكلة الهيشان.
3- بيزود نمو الشعر:
تساقط الشعر من اكتر المشاكل اللي كل البنات تقريبا بيعانوا منها ، لما يكون تساقط الشعر هو عدوك الاول ، هيكون استخدام زيت الصبار على الشعر هو افضل حل ليكي ، الصبار هيساعد على زيادة نمو الشعر عن طريق تجديد بصيلات الشعر وازالة خلايا الجلد الميتة من فروة راسك.
4- بيساعد على تنعيم الشعر:
المحتوى العالي من البروتين والفيتامنيات والمعادن في زيت الصبار بتساعد على تغذية بصيلات الشعر ، وده بيساعد على تحسين خصلات الشعر بشكل عام ، مع مرور الوقت ، الاستخدام المنتظم للصبار بيحافظ على صحة وتغذية الشعر ، وده بدوره هيخلي الخصلات اكتر نعومة وسهل التحكم فيها.
5- بيمنع الالتهابات الفطرية:
زيت الصبار ممكن يساعد في علاج الالتهابات الفطرية ، لو فروة راسك غير صحية بسبب الالتهابات الفطرية والبكتيرية ، استخدام زيت الصبار للشعر هيكون مفيد ، خصائصة المضادة للميكروبات ممكن انها تقتل البكتيريا المسببة للعدوى ، وخصائصه المضادة للفطريات ممكن انها تقلل من نمو الفطريات على فروة الراس ، وبالتالي الحفاظ على فروة راس نضيفة وصحية.
6- بيعالج قشرة الراس وحكة فروة الراس:
زيت الصبار بيساعد بشكل فعال على علاج القشرة والوقاية منها ، بيساعد على ترطيب فروة الراس وبيتخلص من الزيوت الزيادة اللي بتأدي لتراكم القشرة على فروة الراس ، وبالتالي بيساعد في علاج قشرة الراس ، وبيساعد كمان في التخلص من حكة فروة الراس.
