وصفة فطيرة ايس كريم البطيخ
من اسهل الوصفات الصيفية اللي ممكن تعمليها ، هي وصفة فطيرة ايس كريم البطيخ ، سهلة وسريعة التحضير ومن غير فرن ، ومن الحلويات الباردة اللي تهون علينا حر الصيف ، تعالوا نشوف الطريقة مع بعض بالخطوات.
فطيرة ايس كريم البطيخ:
المكونات:
– 400 جرام بطيخ متقطع.
– 250 جرام اي نوع بسكويت سادة تفضليه.
– 100 جرام زبدة ، سايحة.
– 250 جرام جبنة كريمي, ناعمة.
– 2 معلقة كبيرة سكر.
– 554 جرام ايس كريم.
– 2 معلقة كبيرة عصير ليمون.
– 2 معلقة كبيرة توت مجروش.
– بطيخ متقطع، للتقديم.
– توت مشكل ، للتقديم (ممكن تستبدليه بالفراولة).
طريقة التحضير:
1- حطي البطيخ المتقطع على صينية مبطنة ، ودخليه الفريزر لمدة ساعتين او لحد ما يتجمد.
2- اثناء الوقت ده ، اطحني البسكويت في محضر الطعام لحد ما يبقى ناعم ، ضيفي له الزبدة واضربيهم مع بعض كويس ، حطي خليط البسكويت في صينية مقاس 24 سم وتكون القاعدة بتاعتها ممكن تنفصل عن باقي الصينية ، وزعي خليط البسكويت على الصينية كلها بالتساوي وعلى الجوانب واضغطي عليه بكوباية عشان تكبسيه كويس ، دخليه الفريزر لمدة 30 دقيقة عشان يتماسكمع بعضه.
3- في الخلاط اضربي البطيخ المجمد لحد ما يبقى قوامه ناعم ، وبعدها صفية على مصفى في طبق كبير.
4- باستخدام مضرب كهربائي ، في طبق اضربي الجبنة الكريمي والسكر لحد ما المزيج يبقى ناعم ، وبعدها ضيفي الايس كريم ، واضربيهم تاني لحد ما المكونات تمتزج مع بعض كويس والخليط يبقى ناعم ، ضيفي لهم البطيخ المهروس وعصير الليمون واضربي المزيج لحد ما يتجانس تماما ، حطي الخليط ده على طبقة البسكويت اللي حضرناها ووزعيه بالتساوي ، دخلي الصينية الفريزر لمدة 4 ساعات على الاقل او لحد ما يتماسك.
5- صفي التوت من خلال منخل ناعم ، خدي السائل بس اللي هينزل منه ، وقطعي البطيخ على شكل كور باستخدام سكوب الايس كريم ، حطي فطيرة البطيخ في طبق التقديم ، رشي عليها عصير التوت ، ووزعي فوقيها كرات البطيخ والتوت المشكل ، قطعيها لمثلثات وقدميها.
