وصفة Sfogliatelle:من الذ وصفات الحلويات الايطالية
وصفة Sfogliatelle من وصفات المعجنات الايطالية اللذيذة جدا ، واللي ممكن تتحشي بحشوات مختلفة زي الكريم شانتي, الكسترد, حتى ان بعضها ممكن يتحشي بعجينة اللوز بدل الكسترد ، تعالوا نشوف مع بعض في السطور الجايه الوصفة بالخطوات والفيديو.
وصفة Sfogliatelle الايطالية:
مكونات العجينة:
– 500 جرام (4 كوبايات) دقيق.
– رشة ملح.
– 175 مل (3/4 كوباية) ماية ، وممكن نزود لو العجينة احتاجت.
– 25 جرام (3 ½ معلقة كبيرة) عسل.
مكونات الحشو:
– 450 مل (1.9 كوباية) لبن كامل الدسم.
– 100 جرام (1/2 كوباية) سكر.
– رشة ملح.
– 150 جرام (1 كوباية) دقيق سميد.
– 500 جرام (2 كوباية) جبنة ريكوتا.
– 1 بيضة كبيرة.
– ½ معلقة صغيرة من مستخلص الفانيليا.
– رشة قرفة.
– 50 جرام (2/3 كوباية) قشر برتقان مفروم ناعم.
للتزيين:
– 150 جرام (10 معالق كبيرة) زبدة غير مملحة.
– سكر بودرة.
طريقة التحضير:
1- هنحضر العجينة ، في طبق كبير اخلطي الدقيق والماية والملح والعسل ، اعجنيهم مع بعض لحد ما تتكون عندك عجينة تكون قوامها قاسي ، ضيفي لها ماية زيادة بالتدريج.
2- حطي العجينة على الرخامة واعجنيها لحد ما تبقى طرية وناعمة ، غلفيها بغلاف بلاستيك ودخليها التلاجة لمدة 30 دقيقة.
3- بعد 30 دقيقة قسمي العجينة 4 قطع متساوية ، هاتي قطعة واحدة منهم وابدأي افرديها بالنشابة او لو متوفر عندك مكنة مكرونة دخلي العجينة وافرديها ، وبعدين اتنيها نصين وافرديها تاني ، كرري نفس الخطوة مع كل قطع العجين ، لحد ما تبقى ناعمة وسمكها رفيع.
4- خدي كل قطعة من العجينة حطيها على الرخامة وادهنيها زبدة ، وافرديها بالراحة بايدك من الجناب وابرميها على شكل اسطوانة رفيعة.
5- افردي كل قطعة عجين بنفس الطريقة ، ولفيها على اول واحدة عملتيها ، لحد ما تشكل اسطوانة واحدة كبيرة، ادهنيها زبدة ، ولفيها بغلاف بلاستيك ودخليها التلاجة لمدة من 1 – 2 ساعة لحد ما العجينة تتماسك.
6- دلوقتي هنعمل الحشوة ، في حلة على النار ضيفي اللبن, السكر, الملح وقلبيهم مع بعض وسيبي الخليط لحد ما يغلي ، ضيفي دقيق السميد وقلبي لحد ما الخليط يبقى ناعم وسميك ، بعد ما يبرد انقليه في طبق ، وضيفي باقي المكونات مع التقليب المستمر لتكوين حشوة ناعمة وسميكة ، خليها على جنب ، والافضل تدخليها التلاجة.
7- سخني الفرن على درجة حرارة 200 درجة مئوية.
8- هاتي العجينة وقطعيها قطع بسمك 1 سم ، وباستخدام صوباعك مدهون زبدة اضغطي على نص العجينة بحيث تعملي شكل مخروطي.
9- اغرفي معلقة كبيرة من الحشو واحشي بيه العجينة ، واضغطي على الحروف بتاعتها عشان تقفليها ، كرري نفس الطريقة مع باقي العجينة ، ورصيهم جنب بعض على صينية متبطنة بورق زبدة.
10- دخلي الصينية الفرن لمدة 30 دقيقة تقريبا ، لحد ما تتحول للون الدهبي.
11- طلعيها من الفرن وسيبيها تبرد كام دقيقة وبعدها رشيها بالسكر البودرة ، وقدميها.