طريقة عمل البان كيك الهش Fluffy Pancakes
البان كيك من افضل الوصفات لوجبة الفطار او كوجبة خفيفة ، مع الفواكه المفضلة ليكي ، او السيرب ، او الكريمة المخفوقة واستمتعي بالطعم اللذيذ ، والنهاردة هنشارك معاكم طريقة مختلفة وهي وصفة البان كيك الهش Fluffy Pancakes ، وهو مختلف شوية عن الطريقة التقليدية لانه البان كيك بيطلع خفيف ومنفوخ ، تعالوا نشوف الطريقة مع بعض بالخطوات والفيديو.
البان كيك الهش:
الكمية دي هتعمل تقريبا 4 فطائر بان كيك.
المكونات:
– 4 كوبايات دقيق (500 جرام), منخول.
– 4 معالق كبيرة بيكنج بودر.
– 4 كوبايات لبن (960 مل).
– ¾ كوباية زبدة (170 جرام), سايحة.
– 3 صفار بيض.
– 4 بياض بيض.
– سيرب للتقديم.
الطريقة:
1- في طبق كبير اخلطي الدقيق والبيكنج بودر مع بعض.
2- في طبق تاني ضيفي الزبدة, اللبن, صفار البيض ، وقلبيهم لحد ما يمتزجوا مع بعض.
3- في طبق تالت اضربي بياض البيض بمضرب يدوي لحد ما يبقى قوامه كريمي.
4- صبي خليط اللبن في خليط الدقيق وقلبيهم بمعلقة مطاطية لحد ما يمتزجوا مع بعض تماما ، بعدها ضيفي بياض البيض ، وقلبي الخليط كله بخفه.
5- على نار خفيفة سخني طاسة ضد الالتصاق بمقاس 20 سم ، صبي 1 ½ كوباية من خليط البان كيك في الطاسة ، ونعمي سطح البان كيك بالمعلقة بالراحة ، غطي الطاسة بغطا ، وسيبيه لحد ما يبقى لونه دهبي من تحت حوالي 20 دقيقة ، وممكن تدخلي خلة اسنان في نص البان كيك لو طلعت من غير عجينة كده يبقى استوى ، انقلي البان كيك لطبق ، وكرري نفس الطريقة مع باقي الكمية.
6- كده البان كيك يبقى جاهز ، قدميه مع سيرب maple syrup.
