علاج فعال للندبات بزيت جوز الهند
كتير من الاشخاص ممكن يعانوا من ندبات في اماكن مختلفة في الجسم ، ممكن تكون بسبب اصابات, عمليات جراحية, حروق, واضطرابات الجلد زي حب الشباب ، ولان الندبات شائعة جدا ، فاكيد في كتير دايما بيدوروا على الحلول العلاجية الفعالة ، ومن الحاجات اللي ثبت فعاليتها في علاج الندبات هو زيت جوز الهند ، والنهاردة من خلال موضوعنا هنشارك معاكم طريقة علاج الندبات بزيت جوز الهند.
فوايد زيت جوز الهند العامة للبشرة:
زيت جوز الهند ليه تأثير مرطب على الجلد (خصوصا الجلد الجاف) ، وهو يعتبر زيت ممتاز جدا لاستخدامه في تدليك الجلد ، بالاضافة انه بيساعد على منع جفاف وتقشر الجلد وبالتالي ليه استخدامات كتير في العناية بالبشرة ، وخاصية الترطيب الموجودة في زيت جوز الهند هي اللي بيكون ليها دور في علاج الندبات ، خصوصا لو الجلد جاف وتالف.
والابحاث اثبتت انه لما بيتم وضع زيت جوز الهند على المناطق المصابة بيشكل طبقة كيميائية وبيحمي الجلد المصاب من التراب الخارجي والبكتيريا والفيروسات ، وبالتالي زيت جوز الهند فعال جدا على الكدمات لانه بيسرع عملية التئام الانسجة التالفة.
دراسة تانية كمان اثبتت ان زيت جوز الهند ممكن انه يعزز من انتاج الكولاجين ويساعد انسجة الجلد على الشفاء بسرعة ، وده بيشجع على نمو الانسجة الجديدة ، بالاضافة كمان ان زيت جوز الهند ممكن انه يحسن لون البشرة ويقلل الاحمرار الناتج عن الندبات.
الخلاصة ان المكون القوي ده بيساعد في التئام الندبات ، وممكن استخدامه كعلاج فعال.
طريقة علاج الندبات بزيت جوز الهند:
ممكن تستخدمي زيت جوز الهند مرتين في اليوم ، مرة الصبح ومرة بالليل ، اعملي الاول اختيار حساسية على جزء صغير من البشرة عشان تعرفي اذا كان عندك حساسية من الزيت ولا لا.
– حطي كمية من الزيت على ضهر ايدك.
– استخدمي ضمادة لتغطية المنطقة.
– لو ماحصلش اي التهاب او تهيج في الجلد خلال 24 ساعة ، تقدري تستخدمي زيت جوز الهند بأمان.
وصفة باستخدام زيت جوز الهند لعلاج الندبات:
1- سخني كام معلقة من زيت جوز الهند لحد ما يدوب.
2- دلكي الزيت بحركات دائرية خفيفة على مكان الندبة لمدة 10 دقايق على الاقل ، وتقدري كمان تضيفي لزيت جوز الهند اي زيوت حاملة تانية او زيوت عطرية.
3- خلي الجلد يمتص الزيت كويس لمدة 60 دقيقة على الاقل.
4- كرري العملية دي على الاقل من 2 – 4 مرات في اليوم للحصول على افضل النتايج.
نصيحة: ما تنسيش اثناء فترة العلاج ، انك تستخدمي واقي من الشمس كل يوم لمنع اضرار اشعة الشمس ومنع الندبة انها تغمق ، استخدمي واقي بعامل حماية 30 او اعلى.
الاثار الجانبية المحتملة:
زيت جوز الهند عموما من انواع الزيوت اللي مش بتسبب مشاكل للاشخاص من كل الفئات العمرية ومن كل انواع البشرة ، ومع ذلك ، ممكن يعاني بعض الاشخاص من ردود فعل شديدة لو بيعانوا من حساسية من جوز الهند (اعملي اختبار حساسية الاول زي ما قولنا فوق) ، كمان زيت جوز الهند البكر بيحتوي على كميات عالية من مضادات الاكسدة زي فيتامين E اللي لو اتطبق على الندبات الجراحية ممكن يسبب التهاب الجلد التماسي.
