طريقة عمل لوشن للجسم باستخدام الجلسرين
ترطيب الجسم مهم جدا عشان نحافظ على الجلد رطب وصحي ، ومافيش افضل من منتجات العناية بالبشرة اللي بنعملها بنفسنا في البيت من مكونات طبيعية ، لانها بتبقى خالية من اي مواد كيميائية او عطور او مواد حافظة ممكن تضر البشرة ، والنهاردة من خلال موضوعنا هنشارك معاكم طريقة عمل لوشن للجسم بالجلسرين.
لوشن للجسم بالجلسرين:
الجلسرين معروف انه مرطب قوي جدا للبشرة ، لانه بيجذب الرطوبة من البيئة للمحيطة للبشرة ، وبيحبس الرطوبة في طبقات البشرة ، وده بيحافظ على خلايا بشرتنا رطبة وصحية.
الوصفة اللي معانا النهاردة هتعملك تقريبا 3 كوبايات من اللوشن.
المكونات:
– ½ كوباية ماية ورد.
– ½ كوباية من جل الصبار.
– ½ كوباية من زيت جوز الهند.
– ¼ كوباية من زيت اللوز الحلو.
– 2 معلقة كبيرة من شمع العسل.
– 1 معلقة كبيرة جلسرين نباتي (من الصيدلية).
– 1 معلقة كبيرة من زيت فيتامين E.
– 25 نقطة من زيت الجيرانيوم العطري”زيت ابرة الراعي” (لو مش متوفر ممكن تستخدمي زيت الورد او اي زيت عطري تفضليه).
طريقة التحضير:
1- على حمام ماية سخنة دوبي شمع العسل وزيت جوز الهند مع زيت اللوز الحلو.
2- بمجرد ما المكونات تدوب ، سيبي الخليط على جنب يبرد لمدة 10 دقايق ، المفروض ان الخليط يبقى دافي مش سخن اوي.
3- في اثناء الوقت ده اخلطي ماية الورد مع جل الصبار في حلة على نار متوسطة منحفضة ، لحد ما الخليط يبقى دافي ، المفروض يبقى في نفس درجة حرارة خليط الزيت وشمع العسل.
4- ودلوقتي امزجي الخليطين مع بعض واضربيهم في الخلاط لحد ما يبقى عندك خليط كريمي لونه ابيض.
5- ضيفي الجلسرين وفيتامين E واستمري في الخلط لحد ما المكونات تمتزج مع بعض كويس ، حوالي 10 دقايق تقريبا.
6- اخر حاجة ضيفي الزيت العطري المفضل ليكي واضربي الخليط مرة كمان ، وممكن تزودي او تقللي من كمية الزيت العطري حسب رغبتك وحسب قوة الريحة اللي انتي عايزاها.
7- كده يبقى اللوشن جاهز ، صبيه في برطمان او علبة كبيرة او قسميه على برطمانات صغيرة حسب الاحجام المتوفرة عندك.
8- احفظيه في مكان جاف وبارد ، هيقعد معاكي لحد 6 شهور.
