طريقة عمل رول البطاطس باللحمة المفرومة والجبنة
البطاطس من الاكلات اللي ليها طرق طبخ كتير جدا ، وتقدري تنوعي في تقديمها بأشكال كتير ، والنهاردة من خلال موضوعنا هنشارك معاكم طريقة مختلفة لعمل البطاطس وهي وصفة رول البطاطس باللحمة المفرومة والجبنة ، تقدري تقدميها كطبق جانبي او طبق رئيسي ، تابعوا معانا السطور الجايه وشوفوا الطريقة بالخطوات والفيديو.
رول البطاطس باللحمة المفرومة والجبنة:
الكمية دي هتكفي تقريبا 8 افراد.
المكونات:
– 6 حبات بطاطس.
– 2 كوباية (220 جرام) جبنة بارميزان مبشورة, متقسمين.
– 3 معلقة صغيرة ملح, متقسمين.
– 4 معلقة كبيرة زيت زيتون, متقسمين.
– 1 بصلة ، متقطعة مكعبات.
– 455 جرام لحمة مفرومة.
– 410 جرام طماطم ، متقطعة مكعبات.
– 4 معلقة كبيرة بقدونس مفروم, مفرومين.
– 1 معلقة صغيرة بابريكا.
– ½ معلقة صغيرة فلفل اسود.
– 6 كوبايات (240 جرام) سبانخ.
– 2 فص ثوم, مفرومين.
– 1 كوباية (25 جرام) جبنة ريكوتا.
– 1 كوباية (100 جرام) جبنة موتزاريلا مبشورة.
طريقة التحضير:
1- سخني الفرن على درجة حرارة 180 درجة مئوية.
2- قشري البطاطس وقطعيها شرايح رفيعة.
3- هاتي صينية كبيرة مستطيلة بطنيها بورق زبدة او ورق خبز ، ورشي عليه نص كمية الجبنة الباميزان ، ووزعيه لحد ما يغطي ورق الزبدة كله.
4- رصي شرايح البطاطس فوق الجبنة البارميزان ، بحيث تكون كل شريحة على طرف الشريحة اللي قبلها ، رصيهم لحد ما الصينية كلها تتملي بالبطاطس.
5- رشي باقي كمية الجبنة البارميزان بالتساوي فوق البطاطس ، وتبليها بمعلقة صغيرة ملح ، ودخليها الفرن لمدة 30 دقيقة ، لحد ما يبقى لونها دهبي والبطاطس تبقى مرنة ومقرمشة شوية.
6- في طاسة على نار متوسطة سخني 2 معلقة كبيرة من زيت الزيتون ، مجرد ما الزيت يسخن ضيفي البصل ، وقلبيه في الزيت لحد ما يتكرمل حوالي 15 دقيقة.
7- ضيفي اللحمة المفرومة للبصل وقلبيهم مع بعض ، لحد ما اللحمة لونها يتغير ، ضيفي الطماطم ، و 3 معلقة كبيرة بقدونس, البابريكا, 1 معلقة صغيرة ملح, والفلفل الاسود ، وقلبي لحد ما اللحمة تستوي ، وبعدها ارفعيها من على النار.
8- في طاسة تانية على نار متوسطة سخني 2 معلقة كبيرة من زيت الزيتون ، ضيفي السبانخ ، قلبيها في الزيت لحد ما تتدبل ، ضيفي 1 معلقة صغيرة ملح والثوم المفروم ، قلبي الخليط مع بعضه كويس ، وارفعيه من على النار.
9- في طبق ضيفي خليط السبانخ والجبنة الريكوتا ، واخلطيهم مع بعض وسيبيهم على جنب.
10- هاتي صينية البطاطس افردي خليط السبانخ والجبنة فوق البطاطس بالتساوي.
11- افردي خليط اللحمة المفرومة فوق السبانخ ، ورشي الجبنة الموتزاريلا فوق اللحمة.
12- لفي البطاطس على شكل رول ، واتأكدي ان المكونات ماتطلعش بره الرول.
13- مجرد ما تلفي البطاطس كويس ، حطيها على ورق الزبدة ، ودخليها الفرن لمدة 15 دقيقة ، لحد ما الجبنة الموتزاريلا تسيح.
14- طلعيها من الفرن ، ورشي عليها باقي كمية البقدونس المفروم للتزيين ، قطعيها شرايح وقدميها.
