6 طرق تستخدمي بيهم خل التفاح لعلاج القشرة
من بين كل مشاكل الشعر اللي ممكن نكون بنعاني منها ، لو في مشكلة واحدة صعبة ومش بتتحل بسهولة هتكون هي مشكلة قشرة الراس ، قشرة الراس من اكتر المشاكل اللي بيعاني منها كتير من البنات ، وممكن تبقى مشكلة اكبر انها تسبب كمان حكة وتقشير في فروة الراس ، وفي حين ان في مئات من انواع الشامبو المضادة للقشرة الموجودة في السوق ، الا انك مازلتي بتبقي مش راضية عن النتايج ، فده الوقت اللي تستخدمي فيه خل التفاح ، بسبب خصائصه المضادة للميكروبات ومضادات الاكسدة ، ده بيخليه مفيد للشعر بطرق كتير ، والنهاردة من خلال موضوعنا هنشارك معاكم 6 طرق لعلاج القشرة بخل التفاح.
ازاي خل التفاح بيعالج قشرة الراس:
– بيحتوي على خصائص مضادة للالتهابات: خصائص خل التفاح بتساعد على تقليل التهيج والاحمرار الناتج عن قشرة الراس.
– بيحتوي على خصائص مضادة للميكروبات: بيساعد على قتل البكتيريا والفطريات اللي بتسبب قشرة الراس ، بالاضافة انه بيتحكم في عدوى الخميرة اللي بتسبب قشرة الراس.
– موازنة مستويات الاس الهيدروجيني: لما بتستخدمي منتجات بتحتوي على درجة حموضة اعلى ، ده ممكن يهيج فروة الراس ، ويسبب الحكة والتقشير ، وخل التفاح ممكن انه يساعد في خفض مستويات الاس الهيدروجيني لفروة الراس ، وبالتالي بيقلل من اعراض قشرة الراس.
– ازالة تراكم المنتجات: واحدة من اسباب ظهور قشرة الراس هو تراكم المنتجات على قشرة الراس ، خل التفاح بيحافظ على فروة الراس نضيفة ، وبالتالي بيمنع قشرة الراس.
طرق لعلاج القشرة بخل التفاح:
قبل استخدام الوصفات لازم تعملي اختبار حساسية الاول ، لان خل التفاح هو مكون حمضي بطبيعته ، فلازم تعملي اختبار قبل استخدامه على شعرك ، هاتي كمية من خل التفاح المخفف بالماية بنسبة 1:5 يعني كمية الماية تكون اكتر من خل التفاح 5 مرات ، حطيه على ضهر ايدك ولاحظي لو هيحصل اي علامات احمرار او التهاب او تهيج ، لو ماحصلش اي رد فعل بعد 24 ساعة ، تقدري تستخدميه على شعرك بكل امان.
1- غسول خل التفاح:
الغسول ده مش بس هيساعد على ازالة قشرة الراس ، كمان هيزيل التراكم من فروة الراس ، وهيضيف لمعان لخصلات الشعر الباهتة ، بالاضافة انه بينضف الشعر وفروة الراس بعمق ، وهيدي شعرك التغذية اللي محتاجها.
اللي هتحتاجيه:
– 1 كوباية ماية.
– 2 معلقة كبيرة من خل التفاح.
طريقة التحضير:
اخلطي خل التفاح مع الماية ، اغسلي شعرك بالشامبو بالطريقة العادية ، بعد ما تغسلي شعرك بالبلسم ، حطي خليط خل التفاح على فروة راسك بالتساوي ودلكيه ، سيبيه كام دقيقة ، وبعدها اغسليه بالماية الباردة ، استخدمي الغسول ده مرة كل اسبوعين.
2- مساج خل التفاح وزيت شجرة الشاي:
زيت شجرة الشاي كمان من المكونات اللي بتساعد على علاج فروة الراس ، خصائصه المضادة للفطريات بتعالج نمو الخميرة في فروة راسك ، اللي بتسبب قشرة الراس ، بالاضافة انه يعتبر منعم طبيعي للشعر ، كمان بيمنع التقشر وبيلطف فروة الراس ، وخليط زيت شجرة الشاي مع خل التفاح يعتبر علاج مثالي للسيطرة على قشرة الراس.
اللي هتحتاجيه:
– 3 معالق كبيرة من خل التفاح.
– 3 نقط من زيت شجرة الشاي.
طريقة التحضير:
امزجي المكونين مع بعض ودلكي فروة راسك بالخليط ، سيبيه على فروة الراس لمدة 10 دقايق وبعدها اغسلي شعرك بالشامبو بالطريقة العادية ، كرري الطريقة دي مرة واحدة في الاسبوع للحصول على نتايج ملحوظة.
3- غسول الشعر بخل التفاح وشاي البابونج:
شاي البابونج مليان بمضادات الاكسدة ، وده بيخليه ممتاز للعناية بالشعر ، مقشر طبيعي ، بيساعد على التخلص من خلايا الجلد الميتة المتراكمة على فروة الراس ، ده بيساعد على تقليل قشرة الراس واعراضها زي الحكة.
اللي هتحتاجيه:
– 1 معلقة كبيرة من خل التفاح.
– 1 كوباية من شاي البابونج.
طريقة التحضير:
حضري كوباية من شاي البابونج وضيفي له خل التفاح ، بعد غسل شعرك بالشامبو والبلسم ، حطي الخليط على شعرك وسيبيه لحد ما ينشف ، وسيبيه على الشعر من غير ما تشطفيه ، كرري الطريقة دي مرة كل اسبوعين.
4- ماسك خل التفاح وجل الصبار:
الصبار من افضل المكونات الطبيعية المفيدة لكتير من مشاكل الشعر والبشرة ، بالاضافة لخصائصه العلاجية هو كمان بيخلص فروة الراس من خلايا الجلد الميتة ، وبالتالي بيساعد على علاج قشرة الراس ، بالاضافة انه بيرطب الشعر وفروة الراس وبيحافظ عليها نضيفة.
اللي هتحتاجيه:
– 5 معالق كبيرة من جل الصبار.
– 3 معالق كبيرة من خل التفاح.
– 1 كوباية ماية.
طريقة التحضير:
امزجي كل المكونات مع بعض كويس ، وزعي الخليط بالتساوي على فروة الراس وسيبيه لمدة 20 دقيقة ، بعدها اغسليه بالماية الباردة ، استخدمي الماسك ده مرة واحدة في الاسبوع للحصول على افضل النتايج.
5- ماسك خل التفاح وصودا الخبز:
صودا الخبز (الكربوناتو) تعتبر مكون تنضيف فعال بيساعد على تقشير فروة الراس والتخلص من خلايا الجلد الميتة ، ولما بتتخلط بخل التفاح بيبقى علاج فعال للتخلص من قشرة الراس والحفاظ على فروة الراس نضيفة وصحية.
اللي هتحتاجيه:
– 2 معلقة كبيرة من خل التفاح.
– 2 معلقة كبيرة من صودا الخبز.
طريقة التحضير:
امزجي المكونين لحد ما يشكلوا عجينة ، حطي المعجون ده على فروة راسك ودلكيه ، بعد 5 دقايق اغسلي شعرك بالماية الباردة.
6- سبراي خل التفاح:
لو قلقانة من استخدام خل التفاح بشكل مباشر على فروة الراس ، ممكن تستخدميه كسبراي للشعر.
اللي هتحتاجيه:
– ¼ كوباية ماية سخنة.
– ¼ كوباية من خل التفاح.
– 6 نقط من زيت شجرة الشاي.
– 5 اقراص اسبرين مطحون.
طريقة التحضير:
اخلطي كل المكونات مع بعض وصبيهم في ازازة ببخاخ ، مرة واحدة في الاسبوع قبل غسل شعرك ، رشي الخليط على فروة الراس بالكامل وسيبيه لمدة 20 دقيقة ، بعدها اغسلي شعرك بالشامبو والبلسم بالطريقة العادية.
بغض النظر عن الطريقة اللي هتختاريها لاستخدام خل التفاح ، اتأكدي انه مش هيحرق فروة راسك او هيهيجها ، ولو ده حصل وقفي استخدامه على شعرك فورا.