12 وصفة سموزي للفطار تحضريهم في اقل من 5 دقايق
لو بتدوري على وجبة فطار بسيطة وصحية وفي نفس الوقت سريعة ومتاخدش منك وقت ، السموزي هيكون الاختيار المثالي ليكي ، هي مش بس مليانة بالعناصر الغذائية ، ولكن كمان تحضري تحضريها بسرعة ، ومع المزيج الصح من المكونات هتفضلي نشيطة طول اليوم ، والنهاردة من خلال موضوعنا هنشارك معاكم وصفات سموزي للفطار صحية ولذيذة ومغذية وتحضريها في اقل من 5 دقايق.
فوايد السموزي للفطار:
– غني بالمغذيات: يعتبر السموزي طريقة ممتازة للحصول على جرعتك اليومية من الفواكه والخضروات ، ولانه سهل الهضم ، جسمك هيمتص بكل سهولة وبسرعة كل الفيتامينات والمعادن والعناصر الغذائية ، وده هيكون مهم جدا الصبح لما جسمك يكون محتاج لزيادة سريعة في الطاقة.
– الترطيب: العصاير هتحافظ على رطوبة جسمك ، لان الماية والسوايل مهمة جدا الصبح ، لانها ضرورية للتخلص من السموم واعادة ترطيب جسمك بعد فترة نوم طويل بالليل ، اضافة فواكه وخضروات بتحتوي على نسبة عالية من الماية للسموزي ، زي الخيار والبطيخ ، مش بس هتعلي القيمة الغذائية للعصير ، ولكن كمان هتساعدك في الحفاظ على رطوبة جسمك طول اليوم.
– الطاقة: العصاير تعتبر اختيار مثالي للفطار لانها غنية بالالياف والبروتين ، وده معناه انها هتساعدك على الشعور بالشبع لحد وقت الغدا ، وبما انها مليانة بالعناصر الغذائية فهي هتمد جسمك بالطاقة طول اليوم (خصوصا لو ضيفتي لها بروتين زيادة).
افضل المكونات لسموزي الفطار:
– الفواكه والخضروات: على حسب المفضل عندك ، بالاضافة للفواكه والخضروات الموجودة حسب الموسم ، ومن الفواكه والخضروات المفضلة للسموزي ، التوت, الموز, السبانخ, اللفت, الجزر, الكرفس.
– البروتين: عنصر تاني مهم تضيفي للعصاير هو البروتين ، البروتين بيساعد على الشعور بالشبع لفترة اطول ، بالاضافة انه بيدي الجسم طاقة طول اليوم ، ممكن تضيفي البروتين من منتجات الالبان زي اللبن, الزبادي اليوناني ، او البروتينات النباتية زي بذور الشيا, زبدة الجوز ، ولو عايزة تزودي جرعة البروتين ممكن تضيفي بروتين بودر للسموزي.
– السائل: هتحتاجي طبعا لاضافة سائل للسموزي ، ممكن يبقى ماية او لبن او حليب جوز الهند او عصير الفاكهة ، ولو عايزة تزودي نسبة البروتين في العصير ممكن تضيفي زبادي يوناني او لبن.
– التحلية: لو لقيتي ان السموزي مش حلو كفاية ، ممكن تضفي مُحلي طبيعي زي العسل او شراب القيقب ، وممكن كمان تضيفي الموز او التمر لتحلية العصير بشكل طبيعي.
وصفات سموزي للفطار:
1- سموزي التوت الازرق والموز:
المكونات:
– 1 كوباية من حليب الصويا (ممكن تستخدمي لبن عادي).
– 1 كوباية توت مجمد.
– 1 كوباية سبانخ صغيرة نية.
– 1 موزة كبيرة متقطعة شرايح.
حطي كل المكونات في الخلاط واضربيهم مع بعض لحد ما يبقى عندك خليط ناعم.
2- سموزي حليب جوز الهند:
المكونات:
– 1 ½ كوباية من حليب جوز الهند.
– 1 موزة مجمدة.
– 2 كوباية سبانخ صغيرة نية.
اخلطي المكونات مع بعض في الخلاط لحد ما تبقى ناعمة ، وممكن تضيفي له تلج عشان تخلي السموزي سميك اكتر.
3- سموزي الطاقة الصباحي:
المكونات:
– ½ موزة مجمدة.
– ¾ كوباية حليب لوز او لبن عادي.
– ½ كوباية كالي متقطع.
– ¼ كوباية زبادي يوناني خالي الدسم.
– 1 معلقة كبيرة زبدة لوز او زبدة فول سوداني.
– 2 معلقة كبيرة بروتين بودر.
– 1 معلقة كبيرة من بذور الكتان المطحون.
اضربي كل المكونات مع بعض في الخلاط ، لحد ما يبقى الخليط ناعم وكريمي ، وممكن تضيفي تلج عشان تخلي السموزي سميك اكتر.
4- سموزي التمر واللوز:
المكونات:
– ¼ كوباية تمر منزوع النوى ، ومتقطع.
– 1 معلقة كبيرة من زبدة اللوز.
– 1 موزة مجمدة.
– ½ كوباية من حليب اللوز.
– 1 معلقة كبيرة من البروتين البودر.
اضربي كل المكونات مع بعض في الخلاط لحد ما تبقى خليط ناعم.
5- سموزي الموز والبروتين:
المكونات:
– 1 معلقة كبيرة كاكاو.
– 1 معلقة كبيرة بروتين بودر بطعم الشوكولاتة.
– 1 موزة متوسطة.
– ¼ كوباية فراولة طازة متقطعة مكعبات.
– 1 معلقة كبيرة من زبدة الفول السوداني.
– ½ كوباية من حليب جوز الهند او اللبن العادي.
– تلج حسب الرغبة.
اضربي المكونات مع بعض في الخلاط ، ولو حسيتي ان العصير سميك ممكن تضيفي له لبن لحد ما يوصل لقوام مناسب.
6- سموزي الشوكولاتة وزبدة الفول السوداني:
المكونات:
– ¼ كوباية من حليب اللوز او اللبن العادي.
– 1 موزة مجمدة.
– 2 معلقة كبيرة من زبدة الفول السوداني.
– 1 معلقة كبيرة كاكاو.
– 1 معلقة صغيرة عسل.
اضربي المكونات كلها مع بعض في الخلاط ، ولو حسيتي ان السموزي سميك ممكن تضيفي لبن زيادة لحد ما توصلي للقوام المطلوب.
7- سموزي الزبادي وبذور الشيا:
المكونات:
– 2 معلقة كبيرة من بذور الشيا.
– 1 كوباية عصير برتقان من غير سكر.
– ½ كوباية فراولة طازة.
– 1 ½ كوباية توت طازة (ممكن تستخدمي انواع مختلفة من التوت مع بعض ½ كوباية من كل نوع).
– 1 موزة كبيرة متقطعة.
– 2 معلقة كبيرة عسل.
– ¼ معلقة صغيرة قرفة.
– 2 كوباية زبادي يوناني سادة.
في طبق صغير اخلطي بذور الشيا مع عصير البرتقان ودخليه التلاجة لحد ما تشرب السوايل وتتحول لجل ، اثناء الوقت ده اضربي باقي المكونات مع بعض في الخلاط ، خرجي بذور الشيا من التلاجة وضيفيها لباقي المكونات في الخلاط واضربيهم تاني مع بعض ، لحد ما يمتزجوا كويس.
8- سموزي التوت والنعناع وبذور الكتان:
المكونات:
– 1 معلقة كبيرة من بذور الكتان.
– 2 كوباية من حليب اللوز او اللبن العادي بارد.
– ¼ كوباية من التوت طازة او مجمد.
– 1 معلقة كبيرة عسل.
– 2 ورقة نعناع طازة.
اضربي كل المكونات مع بعض في الخلاط لحد ما يبقى عندك خليط ناعم.
9- سموزي البروتين:
المكونات:
– 1/3 كوباية فراولة مجمدة.
– ½ كوباية توت مجمد.
– ½ حبة تفاح متقطعة.
– 2 معلقة كبيرة من زبدة الفول السوداني.
– 1 كوباية من حليب اللوز او لبن عادي.
– 2 معلقة كبيرة بروتين بودر.
– ¼ كوباية تلج.
اضربي المكونات مع بعض في الخلاط لحد ما يبقى عندك خليط ناعم وسميك.
10- سموزي القرع:
المكونات:
– ½ كوباية قرع مهروس.
– ½ موزة مجمدة.
– 1 كوباية من حليب اللوز او لبن عادي.
– 2 معلقة كبيرة بروتين بودر بنكهة الفانيليا.
– 1 معلقة كبيرة عسل (اختياري).
– 1/8 معلقة صغيرة قرفة.
– مكعبات تلج.
اضربي كل المكونات مع بعض في الخلاط ، لحد ما يبقى عندك خليط ناعم.
11- سموزي الموز والافوكادو:
المكونات:
– 1 موزة مجمدة متقطعة شرايح.
– ½ كوباية عنب مجمد اي لون.
– ½ حبة افوكادو متقشرة ومتقطعة.
– 1 كوباية سبانخ.
– 1 كوباية كالي.
– 2 معلقة كبيرة من بذور الشيا.
– 1 ½ كوباية شاي اخضر مبرد ومن غير سكر.
– تلج حسب الرغبة.
ضيفي المكونات كلها في الخلاط ماعدا التلج واضربيهم مع بعض لحد ما يبقى عندك خليط ناعم ، وبعدها ضيفي التلج.
12- سموزي الشوكولاتة والموز:
المكونات:
– 1 كوباية من حليب اللوز او حليب جوز الهند او لبن عادي.
– 1 موزة مجمدة او طازة.
– 2 معلقة كبيرة كاكاو.
– 1 معلقة صغيرة قرفة.
– 2 معلقة كبيرة من زبدة الفول السوداني.
– 1 معلقة كبيرة من زيت جوز الهند.
– مكعبات تلج.
اضربي المكونات كلها مع بعض في الخلاط ، لحد ما يبقى السموزي سائل ورغوي ، وممكن تضيفي مكعبات التلج مع باقي المكونات في الخلاط لو مش هيأثر على السكينة بتاعته او تضيفيه بعد كده في الاخر.
