5 غلطات ممكن تسبب العطش اثناء الصيام .. وايه الاكلات اللي تتجنبيها عشان تمنعي العطش
الاحساس بالجوع ممكن كتير من الاشخاص يقدروا يتغلبوا عليه ، ولكن المشكلة هي الاحساس بالعطش وخصوصا في درجات الحرارة العالية ، والنهاردة من خلال موضوعنا هنعرف 5 غلطات بتسبب العطش اثناء الصيام , وازاي تتغلبي عليه ، وايه اكتر الاكلات اللي بتسبب العطش عشان تتجنبيها.
غلطات بتسبب العطش اثناء الصيام:
العطش ممكن يحصل لاسباب نفسية او اسباب حقيقية او بسبب عاداتنا الغذائية الغلط ، الاسباب النفسية بتتلخص في الارتباط بالحرمان ، زي ما احنا بنقول الممنوع مرغوب ، وبمجرد احساسنا ان شرب الماية بقى ممنوع ، بنحس برغبة مش حقيقية اننا عايزين نشرب ماية.
ولكن الاسباب الحقيقة هي ان العطش بيحصل بسبب انخفاض تركيز الماية في كل انسجة وخلايا الجسم ، ودخول الجسم في حالة جفاف على نهاية اليوم.
اما العادات الغذائية الغلط هي اللي هنعرفها دلوقتي مع بعض:
1- شرب كميات كبيرة من الماية على وجبة الفطار والسحور بس ، واهمال شرب الماية في الفترة بين الفطار والسحور.
2- الافراط في الاطعمة والمشروبات اللي تعتبر مدرات للبول خصوصا وقت السحور زي القهوة, الشاي, المشروبات الغازية, الحلبة, البرتقان.
3- السحور بيكون خالي من الاكلات اللي بتحتوي على البوتاسيوم اللي بيحافظ على ترطيب الجسم وبيقلل الاحساس بالعطش.
اكلات بتزود الاحساس بالعطش:
1- الاكلات اللي بتحتوي على كمية كبيرة من البهارات ، لانها بتأدي لزيادة الاحساس بالعطش.
2- الموالح, المخللات بتزود الاحساس بالعطش سواء اكلتيها على الفطار او السحور ، الافضل تستبدليهم بالسلطة لانها بتحتوي على الالياف اللي بتمنع العطش ، وبتساعد على تحمله لفترة طويلة.
3- السكريات بتسبب زيادة الاحساس بالعطش ، ممكن تستبدليها بالفواكة الطازة اللي بتحتوي على عناصر غذائية بتمنع العطش.
4- المقليات ، لانها بتمنع الجسم من امتصاص الماية.
ازاي تتغلبي على الاحساس بالعطش:
1- وزعي كمية الماية يوميا على الفترة ما بين الفطار والسحور.
2- عدم الافراط في شرب الماية وقت السحور ، لان ده بيعمل نتيجة عكسية ، وبيزود من تركيز الماية اكتر من حاجة الجسم ، وفي الحالة دي الجسم بيحاول يتخلص منه بسرعة عن طريق التبول ، وبالتالي الجسم هيفقد رطوبته بسرعة ، وتبدأي تحسي بالعطش من بداية اليوم.
3- كلي الاطعمة الغنية بالبوتاسيوم في السحور ، زي الموز, الافوكادو, البقول, الخضروات الورقية, الطماطم, الفلفل الالوان, التمر, والفواكة المجففة.
4- اتجنبي على السحور اكل الاطعمة المالحة, المسبكة, المخللات.
5- اتجنبي الاطعمة والمشروبات المدرة للبول اللي قولناها فوق.
6- نظمي يومك بشكل صح ووزعي المهام اللي وراكي على مدار اليوم بشكل متوازن ، عشان ما تفقديش طاقتك وترطيب جسمك من بداية اليوم.
7- زودي من اكل الخضروات الطازة على الفطار والسحور لانها بتحتوي على الالياف اللي بتمنع الشعور بالعطش لانها بتفضل فترة طويلة في المعدة.
8- ابعدي عن استخدام الخل او الملح في السلطة الخضرا ، وممكن تستبدليهم بالليمون.
9- اتجنبي الاطعمة اللي بتزود العطش زي الاسماك المملحة.
10- اتجنبي اكل المقليات.
11- ممكن تشربي عصير ليمون, نعناع, بطيخ على وجبة السحور لانها بتساعد على تقليل الاحساس بالعطش خلال فترة الصيام.
12- كلي زبادي او لبن رايب في وجبة الفطار والسحور ، لانها بتساعد على مد الجسم بالطاقة اثناء الصيام.
