نصايح وافكار تعملى ايه لو بتكرهى وظيفتك

بقلمآية حسان فيمنوعات visibility330

انك تكونى بتكرهى وظيفتك مش حاجة حلوة ولا حاجة سهلة ابدا لسببين مهمين، الاول هو انه صعب جدا انك تقومى كل يوم و تلبسي و تضربى مشوار علشان تروحى تقضى تقريبا كل يومك بتعملى حاجة مابتحبيهاش فى مكان مابترتاحيش فيه، والسبب التانى لو انتشر خبر انك بتكرهى شغلك دى حاجة ممكن تأثر عيكى سلبيا بشكل كبير، و بتبقى بتشتغلى و بتعملى كل مجهود تقدرى عليه لكن مش حاسة بأى سعادة و على طول تعيسة و بتكرهى شغلك للاسف، وعلشان نساعدك  تتخطى المرحلة الصعبة دى فى كاريرك، فى المقال ده اعرفى  مع بنات حوا نصايح تعملى ايه لو بتكرهى وظيفتك ..

نصايح وافكار تعملى ايه لو بتكرهى وظيفتك …

1- ماتصرحيش بكرهك لوظيفتك : 

حتى لو كنتى بتكرهى وظيفتك خلى الموضوع ده لنفسك وممكن تتشاركيه مع عيلتك واصحابك، لكن مش مع زمايلك جوه الشغل ابدا ولا تحطيه على السوشال ميديا، لانه غالبا هيقع فى ايد الشخص الغلط اللى ممكن يستخدم ده ضدك خصوصا لو كنتى من مستخدمى تويتر لانه التويتس بتبان فى سيرش جوجل و ده ممكن يأثر عليكى بشكل سلبى بأنه مديرك الحالى يشوفه وياخد اجراء ضدك و تطردى ! او انه مديرك المستقبلى يشوفه و ياخد عنك انطباع سئ.. خليكى هادية. 

ماتصرحيش بكرهك لوظيفتك

2- اعرفى انه المشكلة مش فيكى : 

انك تبقى الشخض اللى وصل لمرحلة انه يصرح بـ ” انا بكره شغلى” دى حاجة ممكن تحصل لأى حد فينا، لانه ببساطة الشغل ممكن يكون مش زى ما توقعتى، او ممكن تكون طبيعة الشغل نفسها كويسة لكن مديرك بيكرهك فيه او زمايلك مش كويسين و الجو العام او بيئة العمل مش مساعداكى نفسيا. 

لو وصلتى -بعد تفكير- لنقطة انك فعلا بتكرهى وظيفتك ومش قادرة تكملى فيها ماتضايقيش، فى الآخر دى مش حاجة وحشة و مش نهاية الدنيا، ده معناه انك محتاجة تبدأى تستعى علشان تاخدى خطوة جديدة. 

اعرفى انه المشكلة مش فيكى

3- ماتقدميش استقالتك و خلاص : 

ماتتسرعيش وتقدمى استقالتك وخلاص، لانك اكيد مش عايزة تقدمى استقالتك و بعدين تندمى ، الخطوة دى لازم تيجى بعد تأنى و تفكير عميق و مدروس، ابدأى فكرى فى الـ Options المتاحة قدامك ولازم تفهمى نفسك و تشوفى المشاكل اللى مكرهاكى فى الشغل ممكن تتحل ولا خلاص  وصلتى لحيطة سد؟ فى اى حاجة ممكن تعمليها علشان تحببك فى الشغل او تخلى الوقت اللى بتقضيه هناك وقت لطيف؟ ممكن تكونى بتمرى بظروف صعبة هى اللى مأثرة عليكى و المشكلة مش فى الشغل نفسه؟ حاولى تجاوبى على الاسئلة دى الاول لانه خلينا نقول الحقيق، انك تلاقى شغل دى مش حاجة سهله ابدا. 

ماتقدميش استقالتك و خلاص

4- استعدى للبحث عن وظيفة تانية :  

لو خلاص مفيش امل انك تكملى ، مفيش مشكلة، بس برده لسه ما تقدميش استقالتك دلوقتى.. اصبرى شوية و ابدأى استعدى للبحث عن شغل جديد ، الموضوع هيبقى اسهل لما تلاقى وظيفة جديدة وانتى لسه بتشتغلى لانه لو انتى من الاشخاص اللى متعودة او مابتحبش قعدة البيت ، لو استعجلتى و قدمتى استقالتك قبل ما تلاقى وظيفة جديدة الموضوع هيضايقك جدا، بدل ما تعملى كده خدى وقتك علشان تعملى UPDATE لـ الـ LinkedIn Profile الخاص بيكى وكمان الـ CV، اعرفى من هنا 9 حاجات لازم تحذيفيهم من الـ CV بتاعك دلوقتى !

استعدى للبحث عن وظيفة تانية

5-  ابدأى تدوير على شغل جديد :

بعد ما عملتى update لسيرتك الذاتية و اتأكدتى انه كل حاجة سليمة، دلوقتى جه وقت انك تدورى على شغل جديد، ولازم تعملى ده بهدوء و فى سرية تامة، ماينفعش تذيعى فى المكتب خالص انك قررتى تستقيلى و خلاص بتدورى على شغل جديد او ان بتكرهى وظيفتك ايا كانت الاسباب، ابدأى قدمى الـ CV  بتاعك للشركات اللى بتعرض وظايف تناسب خبرتك و مؤهلاتك علشان تبقى فرصك اعلى فى انك تلاقي شغل . 

ابدأى تدوير على شغل جديد

6- خدى بالك من كلامك : 

لما تبدأى تفكرى فى الاستقالة بشكل جدى بتبقى غالبا عايزة تاخدى القرار و تنفذيه و تعرفيه لكل الناس من حواليكى علشان تخلصى، بس لازم تاخدى بالك من كلامك فى الموضوع ده مع زمايلك فى المكتب و حاولى ماتصرحيش برغبتك فى الاستقاله الا لما يبقى قرارك نهائى فعلا، لانه الكلام بيتنقل و بيتحور و مش شرط يوصل  للأشخاص التانيين بالضبط زى ما قلتيه، و الشركات دايما بيسألوا عن الـ references و ممكن يسألوا فى شغلك القديم عنك و عن تصرفاتك فى المكتب، علشان كده مهم جدا تسيبي انطباع كويس عنك قبل ما تمشي و ماتعيبيش فى رؤسائك او فى حد من زمايلك ابدا. 

خدى بالك من كلامك

7- استقيلى بطريقة صح : 

لو لقيتى انه كل المحاولات فشلت و خلاص كل الطرق مسدودة و المحاولات مابقاش فيه منها فايدة، و قررتى انك تستقيلى يبقى لازم تستقيلى بطريقة صح و بشياكة او زى ما بيقولوا الاجانب resign in class ، لازم تقدمى انذار بالاستقالة قبلها بأسبوعين  او two weeks notice  و تعرضى انك تقدمى المساعدة او التدريب للموظفة اللى هتيجى مكانك علشان تفهميها طبيعة الشغل، و طبعا علشان ماتسيبيشش اى انطباع سئ عنك  و تمشي من غير اى مشاكل. 

استقيلى بطريقة صح
استقيلى بطريقة صح

اعرفى معانا كمان نصايح : ازاى تقدمى استقالة من الشغل صح لو بتعملى كده لاول مرة.