7 خدع و نصايح سريعة لجمالك في الصيف .. اعرفيهم معانا
في فصل الصيف بشكل خاص بنحب نهتم بجمالنا وشكلنا اكتر من اي وقت تاني لانه موسم اجازات وخروجات وتقضية وقت حلو مع اصحابنا وعشان كده بنبقى عايزين يبقى شكلنا حلو وراضيين عن اللوك بتاعنا سواء في اللبس او المكياج او الشعر, واحنا النهاردة جايبين لكل بنات حوا خدع ونصايح سريعة هتضمن لكم انكم تظهروا بلوك حلو بخطوات بسيطة جدا والنصايح هتفيدك لاي وقت مش للصيف بس.
7 خدع و نصايح سريعة لجمالك في الصيف:
1- للعيون المرهقة والمنتفخة:
لو انتي بتعاني من قلة النوم او عيونك حساسة وشكلها مرهق وفيها انتفاخات ممكن تحلي المشكلة دي بخطوات بسيطة جدا.
– لو عينيكي مرهقة افركي ايدك في بعضها لحد ما تحسي انها سخنت وبعدين حطيها على العين عشان تمتص حرارة ايدك الحركة دي بتريح العين اوي وبشكل سريع وفوري.
– لو عندك هالات سودا او انتفاخات حطي على كل عين باكيت شاي اخضر سيبيه لحد ما يبرد وبعدين حطيه على عينك من 10 دقايق لربع ساعة, وممكن تحطي الباكيت في التلاجة شوية قبل ما تحطيه على العين لان ده بيجيب نتيجة افضل في تخفيف الانتفاخات.
– البطاطس المهروسة كمان مفيدة جدا للعيون المرهقة, اسلقيها واهرسيها ناعم اوي, نامي على ضهرك وغمضي عينك وحطي البطاطس على العين وسيبيها ربع ساعة وبعدين اغسليها, الوصفة دي بتهدي العين وتريحها جدا.
– ومن الحاجات طبعا الغنية عن التعريف للعين هو الخيار, مفيد جدا لعلاج الهالات السودا والانتفاخات, حطي شرايح الخيار على العين وبردوا ممكن تحطيها سقعة عشان الانتفاخات.
2- الاكسسوارات:
الملابس مش بتظهر ولا بيبان جمالها من غير الاكسسوارات متنسيش تنسقي مع لبسك الاكسسوارات المناسبة سواء عقد او سكارف, والاساور, والحلق الحاجات دي بتضيف للوك اوي وبتديه حياة.
شوفي من هنا ازاي تستغلي الاكسسوارات في تحسين اللوك بتاعك ؟!
3- مكياج العيون:
اهتمي بمكياج العيون لانهم هما اللي بيظهروا جمال الوش كله, حطي كريم اساس للعين نفس لون بشرتك وبعدين ابدأي طبقي الوان ايشادو تليق مع الوان لبسك, وممكن ترسمي العين سموكي ممكن تجربي تعملي السمدج ايلاينر, وفي الاخر حطي الماسكارا بتاعتك وممكن تجربي تستخدمي اداة تني الرموش “Lash Curler” عشان تديهم حجم اكبر واطول, ولما تيجي تختاري الوان الايشادو حاولي تختاري الوان زاهية ومشرقة عشان تمشي مع جو الصيف والاجازات اكتر وابعدي عن الالوان الغامقة.
4- مكياج الشفايف:
دلوقتي موضة الروج او احمر الشفايف هو الروج المات اللي بيكون سايل وبيتحول لمات بعد ما بتحطيه وماركات كتير دلوقتي بقت تنزل منه مجموعة الوان حلوة اوي زي مايبيلين, ونيكس, وميك اب فورايفر تقدري تختاري من مجموعاتهم اللي يناسبك والميزة في الانواع الجديدة انها كريمي ومش بتنشف الشفايف وبتديها لوك حلو اوي.
5- تسريحة الشعر:
من انسب تسريحات الشعر للصيف هي تسريحة الضفيرة, او رفع الشعر كحكة High bun وتضيفي لها اكسسوارات شعر او باندانا وممكن مع رفع الشعر تعملي قوصة من قدام التسريحات دي هتريحك اوي وفي نفس الوقت هتديكي لوك حلو ومختلف,, ممكن كمان تجربي تعملي شعرك هايلايت او خصل بس بدل ما تصبغيه كله وهيبقى تغيير سريع في اللوك بتاعك.
شوفي من هنا 27 تسريحة تجنن لشعرك في الصيف
6- الضوافر:
طبعا من الحاجات اللي لازم نهتم بيها ومنهملهاش لانها هتكمل اللوك بتاعنا, ممكن تختاري تصميم بسيط لضوافرك وتختاري الالوان اللي تمشي مع لبسك ومكياجك.
شوفي من هنا 14 طريقة مبتكرة لتصميم ضوافرك بالمانيكير في الصيف متفوتيهمش
7- القدمين:
طبعا في الصيف اغلب الوقت بنلبس حاجات مفتوحة عشان كده لازم نهتم ان رجلنا يكون شكلها حلو وناعمة ونشيل منها كل الجلد الميت, ونعمل تقشير للجلد لو هنلبس حاجة قصيرة والرجل هتبان منها, وممكن تدهني الرجل برونزر هتديها لون تان حلو اوي وهتخليها بتلمع.
شوفي كمان 23 نصيحة لجمالك عشان تستمتعي بالصيف
