اعرفي معانا رسمة العين السموكي المناسبة لشكل كل عين

احنا اتكلمنا قبل كده عن اختيار رسمة العين المناسبة لشكل كل عين وازاي ترسميها, النهاردة من خلال المقال ده جايبين لكل بنات حوا ازاي نرسم العين سموكي حسب شكل كل عين عشان نظهر جمالها ونبرزها.

تعالوا نشوف مع بعض طرق رسمة العين السموكي المناسبة لشكل كل عين:

1- العيون الغير متناظرة:

العيون اللي بتكون مش زي بعض بالظبط يعني ساعات في ناس عندهم بيكون في عين اصغر من عين او عين اوسع من عين, اللي بتبقى عيونهم كده انسب رسمة سموكي ليهم اننا نحط اللون لون ايشادو غامق قريب من منطقة الحاجب وندمجه مع باقي الوان الايشادو على العين الطريقة دي هتظبط شكل العين, وانسب الالوان لاستخدامها هتكون الوردي والارجواني والدهبي والاسود القاتم.

2- العيون المتقاربة:

العيون اللي بتكون قريبة من بعض انسب رسمة سموكي ليها اننا نستخدم لون فاتح مضيء عند الزاوية الداخلية للعين, ولون دهبي عند نص الجفن, ونحط لون بني غامق عند الزاوية الخارجية للعين, وندمج الالوان مع بعض كويس, وممكن نرسم خط بقلم العين الاسود على الجفن اللي تحت.

3- العيون المتباعدة:

العيون اللي بتكون بعيدة عن بعض او في مساحة كبيرة بين العيون, بيكون انسب سموكي ليها اننا نحط لون سيلفر او فضي على الجفن اللي فوق وندمج معاه لون برونزي, ونرسم بقلم العين الاسود على خط الرموش اللي فوق.

4- العيون الصغيرة او الضيقة:

انسب سموكي للعيون الصغيرة او الضيقة عشان تبان اوسع واكبر اننا نستخدم الوان ايشادو فاتحة وخفيفة, ممكن نحط اللون الفاتح على الزاوية الداخلية للعين وعلى نص الجفن والزاوية الخارجية ممكن نستخدم الايشادو بدرجة اغمق شوية, وبالنسبة للعيون الصغيرة الافضل منرسمش بالقلم خالص على الجفن اللي تحت عشان ده هيضيق العين اكتر.

5- العيون اللوزية:

الجليتر سموكي هيكون مناسب اوي للعيون اللوزية , هنحط الجليتر ايشادو على الجفن اللي فوق وندمج معاه لون برونزي عشان يدي للعين شكل اعمق, وبقلم العين الاسود هنرسم على خط الرموش اللي فوق, ونحط ايشادو مضيء على الجفن اللي تحت.

6- العيون الـ Monoled او الصينية:

بالنسبة للعيون اللي الجفن بتاعها بيكون مش باين او اللي هي العيون الأسيوية في الرسمة بتاعتها ابدأي مع ايلاينر اسود من الزاوية الخارجية للعين وتبدأي تفتحي وتستخدمي درجات الوان ايشادو فاتحة وانتي داخلة على الزاوية الداخلية للعين يعني تعملي تأثير الاومبري بالايشادو.

7- العيون ذات الجفون المغطاه:

العيون ذات الجفون المغطاه اللي هي بتكون عضمة الحاجب مغطية على جفن العين, ابعدي عن استخدام الوان الايشادو الغامقة على الجفن كله, استخدمي الوان فاتحة عند الزاوية الداخلية للعين لحد نص الجفن كده, وممكن تحطي لون غامق عند الزاوية الخارجية للعين بس عشان تظهري العين اوسع.

8- العيون العميقة:

العيون اللي بتكون داخلة لجوه شوية وعضمة الحاجب فيها بارزة, عشان نظهرها يبقى لازم نظهر الجفن ونقلل من حجم عضمة الحاجب, هنستخدم لون ايشادو فاتح على الجفن اللي فوق كله, وحطي لون اغمق شوية تحت عضمة الحاجب, وارسمي خط باللون الغامق على الجفن اللي تحت.

9- العيون الجاحظة:

العيون الجاحظة لبره شوية, انسب سموكي ليها هنرسم خط سميك بالايلاينر على طول خط الرموش اللي فوق, وهنحط لون الايشادو الغامق من اول الزاوية الخارجية لحد نص الجفن, ونحط لون فاتح عند الزاوية الداخلية للعين.

10- العيون اللي نازلة لتحت:

العيون اللي بتبقى الزاوية الخارجية بتاعتها نازلة لتحت شوية, هنرسم بالايلاينر عند الزاوية الخارجية للعين رسمة عين القطة او الـ Cat Eye وتكون بخط سميك عشان نرفع العين, ونرسم ايشادو فاتح على الزاوية الداخلية للعين , والغامق عند الزاوية الخارجية.

11- العيون المقلوبة:

العيون دي بتكون فيها المساحة بين العين والحاجب كبيرة وبتكون العين مسحوبة لفوق, وهتكون انسب رسمة ليها ان الجفن هيتقسم نصين من اول الزاوية الداخلية لحد نص الجفن هنحط ايشادو فاتح, والنص التاني للجفن لحد الزاوية الخارجية للعين هنحط ايشادو غامق.

شوفي من هنا ازاي تعملي مكياج العيون السموكي