14 طريقة مبتكرة لتصميم ضوافرك بالمانيكير في الصيف متفوتيهمش

ريهام محمود
ريهام محمود
3565

في الصيف دايما بنحب نجدد في كل حاجة عشان نخرج من ملل طول السنة وبنهتم اكتربجمالنا وبشكلنا وننطلق عشان نستمتع باجازتنا وبالصيف واحنا مبسوطين, وفصل الصيف دايما مرتبط بالالوان الزاهية اللي كلها حيوية حتى في الوان المانيكير , ومن اكتر الوان المانيكير المناسبة للصيف هي الالوان النيون والباستيل والالوان الفاقعة زي الاحمر والاورانج والاصفر وكمان الابيض والازرق, لكن الالوان الغامقة الافضل نبعد عنها في فصل الصيف لانها مش هتبقى ماشية مع انطلاق وجو الصيف, حتى في التصاميم اختاري الرسومات المرتبطة بالصيف زي مثلا امواج البحر, الصدف, نجم البحر, اشجار النخيل, واحنا النهاردة اختارنا لكل بنات حوا مجموعة من تصاميم المانيكير عشان تستمتعي بالصيف بضوافر حلوة وملفتة.

تعالوا نشوف مع بعض 14 طريقة لتصميم ضوافرك بالمانيكير في الصيف:

1- الرسمة دي استخدمنا فيها تلات الوان هما الاصفر, والبينك, والابيض هتحطي الطبقة الاساسية بالاصفر وبعدين على الجزء اللي تحت من الضوفر هترسمي نص دايرة بالبينك وبعدين تحدديها بالابيض وتعملي عليها تلات خطوط.

14 طريقة مبتكرة لتصميم ضوافرك بالمانيكير 1
14 طريقة مبتكرة لتصميم ضوافرك بالمانيكير 1

2- الرسمة دي فيها مجموعة الوان زاهية وحيوية اوي هنستخدم فيها 5 الوان الابيض, والاصفر, والازرق الفاتح, والاحمر, والاسود, هنرسم نص دايرة على الضوفر من فوق باللون الابيض وبعدين هنعمل نص دايرة صغيرة جدا على طرف الضوفر ومن الجنبين نرسم نص دايرة بالازرق الفاتح والناحية التانية بالاصفر وفي النص نرسم مثلث باللون الاحمر وفي الاخر نحدد الرسمة من فوق ومن تحت باللون الاسود, ونرسم ضوفرين بس بالطريقة دي عشان متبقاش اوفر وباقي الضوافر ممكن نحط لها الوان عادية من اللي احنا استخدمناها كل ضوفر لون مثلا او بلون واحد حسب اختياركم وذوقكم.

14 طريقة مبتكرة لتصميم ضوافرك بالمانيكير 2
14 طريقة مبتكرة لتصميم ضوافرك بالمانيكير 2

3- الرسمة دي سهلة جدا هنستخدم فيها تلات الوان الابيض, والاحمر, والازرق هنحط الطبقة الاساسية باللون الابيض ونعمل خط بالازرق على الضوفر من فوق وعلى 2/3 الضوفر من تحت ونرسم ضوفر بالازرق واللي جنبه بالاحمر يعني نبدل بين الالوان, وفي الاخر نحط بين كل لون شرايط الضوافر عشان نقسم بين الالوان.

14 طريقة مبتكرة لتصميم ضوافرك بالمانيكير 3
14 طريقة مبتكرة لتصميم ضوافرك بالمانيكير 3

4- التصميم ده هنستخدم اللون الازرق والاحمر وشرايط بيضا, هنحط اللون الازرق على الضوفر كله وبعدين نقسم الضوفر بالشرايط ونقص الزيادات, وبعدين نرسم قلب صغير على الضوفر من فوق هنعمل نقطتين جنب بعض وبعدين نوصلهم ببعض من تحت على شكل حرف V هنلاقي اترسم عندنا شكل قلب.

14 طريقة مبتكرة لتصميم ضوافرك بالمانيكير 4
14 طريقة مبتكرة لتصميم ضوافرك بالمانيكير 4

5- الرسمة دي هنستخدم فيها الاورانج والابيض, هنحط الطبقة الاساسية بالاورانج ونرسم شكل وردة بالابيض زي ما هو باين في الصورة كده هنستخدم الاداة الرفيعة اللي بيترسم بيها النقط عشان نرسم النقط ولو مش متوفرة عندكم ممكن تجيبي قلم رصاص تحطي في الاستيكة بتاعته من تحت دبوس وترسمي بيه هيديكي نفس النتيجة وممكن تقسمي الرسمه بخلة السنان عشان تديكي شكل الوردة.

14 طريقة مبتكرة لتصميم ضوافرك بالمانيكير 5
14 طريقة مبتكرة لتصميم ضوافرك بالمانيكير 5

6- التصميم ده حلو اوي عامل استايل موج البحر هنستخدم فيه طريقتين كنا اتكلمنا عنهم قبل كده وهي طريقة الاومبري ومانيكير المية, هنستخدم اربع الوان بيج فاتح, وازرق بدرجتين فاتح واغمق منه شوية, والابيض, هنرسم الاول البيج والازرق الفاتح والغامق نرسمهم على الضوفر بطريقة الاومبري هنحط الالوان على سفنجة ونعملهم على الضوفر, والابيض هنحطه في طبق في مية ونحط فيه الضوافر عشان يدينا تأثير الموج وننضف حوالين الضوافر بالاسيتون بعد ما نخلص.

14 طريقة مبتكرة لتصميم ضوافرك بالمانيكير 6
14 طريقة مبتكرة لتصميم ضوافرك بالمانيكير 6

7- رسمة الايس كريم هنستخدم فيها تلات الوان الاخضر, والاحمر, والسيمون, هنحط الطبقة الاساسية باللون الاخضر ونرسم نص دايرة على الضوفر من فوق باللون السيمون وبعدين نرسم نقطة باللون الاحمر في نص الدايرة وبخلة سنان نحط نقط على الضوفر من فوق بشكل عشوائي بالالوان اللي احنا استخدمناها, وممكن في ضوفر نحط ابيض بدل السيمون.

14 طريقة مبتكرة لتصميم ضوافرك بالمانيكير 7
14 طريقة مبتكرة لتصميم ضوافرك بالمانيكير 7

8- الطريقة دي شبة طريقة مانيكير مية بس من غير مية هنجيب مجموعة الوان اي الوان نختارها ممكن نختار زي الصورة كده الاورانج مع الازرق مع الاخضر مع الموف ونجيب اي حتة بلاستيك نحط عليها نقطة من كل لون ونلخبطهم مع بعض بخلة السنان المانيكير هينشف ويعمل طبقة خفيفة كده شيليها وحطيها على الضوفر وبعدين شيلي الزيادات.

14 طريقة مبتكرة لتصميم ضوافرك بالمانيكير 8
14 طريقة مبتكرة لتصميم ضوافرك بالمانيكير 8

9- التصميم ده هنستخدم فيه الاستيكرات الجاهزة اللي بتتلزق على الضوافر ممكن نجيب الاشكال المناسبة للصيف زي الصدف ونجمة البحر هنعمل الضوافر اومبري الاول بالازرق والبيج وبعدين نلزق عليها الاشكال.

14 طريقة مبتكرة لتصميم ضوافرك بالمانيكير 9
14 طريقة مبتكرة لتصميم ضوافرك بالمانيكير 9

10- رسمة الغروب, هنستخدم فيها اللون الابيض, والاصفر, والفوشيا, والاسود, هنرسم طبقة اساسية بالابيض ونعمل عليه اومبري بالفوشيا والاصفر وبعدين نرسم نخلة او عصافير باللون الاسود.

14 طريقة مبتكرة لتصميم ضوافرك بالمانيكير 10
14 طريقة مبتكرة لتصميم ضوافرك بالمانيكير 10

11- التصميم ده هنستخدم فيه اربع الوان الاورانج, والبينك, والازرق, والاسود, هنحط الطبقة الاساسية باللون الاورانج وبعدين نعمل عليه اومبري باللون الاورانج والازرق والبينك وفي الاخر نرسم النخلة باللون الاسود.

14 طريقة مبتكرة لتصميم ضوافرك بالمانيكير 11
14 طريقة مبتكرة لتصميم ضوافرك بالمانيكير 11

12- التصميم ده هنستخدم فيه درجات اللون الازرق من الفاتح للغامق هنستخدم خمس درجات نبدأ بالغامق على الضوفر من فوق واللي بعده الافتح وهكذا لحد ما نوصل لافتح لون على الضوفر من تحت.

14 طريقة مبتكرة لتصميم ضوافرك بالمانيكير 12
14 طريقة مبتكرة لتصميم ضوافرك بالمانيكير 12

13- هنستخدم في التصميم ده اللون الابيض ودرجتين من الازرق والاسود, هنحط الطبقة الاساسية باللون الابيض وبعدين نعمل عليه اومبري باللون الازرق الفاتح والغامق, وفي التصميم ده استخدمت حاجة مبتكره عشان ترسم نخلة على الضوفر بطريقة سهلة هنجيب شاليمو ونقص جزء منها من فوق من ناحية واحدة بس وناخد بيها اللون الاسود ونرسم بيها النخلة.

14 طريقة مبتكرة لتصميم ضوافرك بالمانيكير 13
14 طريقة مبتكرة لتصميم ضوافرك بالمانيكير 13

14- تصميم الميرميد او عروسة البحر هنستخدم فيه اللون الابيض والازرق واستيكر شكل عروسة البحر, هنحط الطبقة الاساسية باللون الابيض وبعدين نحط الشكل على الضوفر ونحط اللون الازرق ونشيله هنلاقي الشكل طلع عندنا.

14 طريقة مبتكرة لتصميم ضوافرك بالمانيكير 14
14 طريقة مبتكرة لتصميم ضوافرك بالمانيكير 14

ياللا اختاروا التصاميم اللي حبتوها اكتر وجربوها :) .

شوفي افكار جديدة لمانيكيرك في صيف 2016

اعرفى معانا موضة مانيكير صيف 2016 بالصور و الخطوات
اعرفى معانا موضة مانيكير صيف 2016 بالصور و الخطوات

مقالات متعلقه

موضة تصاميم والوان المانيكير لموسم الربيع

موضة تصاميم والوان المانيكير لموسم الربيع

تصاميم مانيكير نيود بسيطة وانيقة

تصاميم مانيكير نيود بسيطة وانيقة

افكار تصاميم مانيكير للكريسماس

افكار تصاميم مانيكير للكريسماس