طريقة عمل مانيكير الميه بالصور والفيديو
زى ما قدمنالك قبل كده اكتر من طريقة لاحدث و اجدد الصيحات فى المانيكير، و ازى تعملى انواع جديدة و مختلفة منه فى البيت لنفسك زى مانيكير الفرو و مانيكير الحبيبات أو الكافيار ، فى الموضوع ده هتعرفى كمان طريقة جديدة لعمل المانيكير فى البيت و هو “مانيكير الميه” أو water nails art ، و اللى بيعتبر من اجدد و احلى الطرق فى موضة المانيكير السنة دى ، و كمان هتعرفى ازاى تعمليه بالخطوات و الصور و الفيديو …
الأشكال النهائية لمانيكير الميه:
الادوات اللى هتحتاجيها لعمل مانيكير الميه:
- كوباية او طبق فيه الميه باردة
- مانيكير بألوان مختلفة من اختيارك
- شريط لاصق
- مانيكير شفاف
- قطنة
الطريقة :
1- هتجيبي طبقى فيه ميه باردة و تبدأى تحطى فيه نقط من الوان المانيكير اللى اختارتيها بالترتيب وراء بعض .
1- بعصاية صغيرة او شاليمو هتبدأى تخلطى الالوان ببعضها بالشكل اللى انتى عايزاه .
3- لفى الشريط اللاصق حوالين منطقة ظافرك علشان الزيادات من المانيكير متجيش على الجلد حواليه .
4- اغمسى ظافرك فى الميه الممزوج فيها المانيكير .
5- شيلى الشريط اللاصق بالزيادات ، وممكن تستخدمى القطنة لمسح الزيادات حوالين منطقة الظافر بالراحة.
6- استنى لما المانيكير ينشف كويس اوى .
7- استخدمى المانيكير الشفاف كطبقة حماية فوق مناكير المياة .
8- خطوة اضافية: فيه ناس بتحب تحط سترس أو خط بمانيكير دهبي بعد ماتخلص وبيدي شكل حلو قوي, هتلاقي من الأفكار ديه في الألبوم اللي فوق.
