مكياج النو ميكب ! هنتعلمه مع بعض بالخطوات

مكياج النو ميكب ! او المكياج الطبيعي هو استايل المكياج اللي بيبان طبيعي على الوش كانك مش حاطة مكياج ولكن في نفس الوقت بيداري اي عيوب في البشرة  وبيطلعها بشكل طبيعي كانك مش حاطة مكياج خالص, والنوع ده من المكياج بتستخدمة دايما الفنانات في حياتهم الطبيعية بعيدا عن لقاءات التليفزيون والحفلات بيظهروا كانهم مش حاطين مكياج لكن هما بيكونوا حاطين استايل النو ميكب, والميزة في استايل المكياج ده كمان غير انه بيطلعك طبيعية بيكون خفيف على البشرة وبيديها فرصة تتنفس ومش بيضرها زي المكياج التقيل.

تعالوا نعرف مع بعض بالخطوات طريقة مكياج النو ميكب!

• الخطوة الاولى:

اول حاجة تنضفي بشرتك كويس وتحطي كريم مرطب وبعدين تحطي لها كريم اساس BB النوع ده من كريم الاساس خفيف جدا على البشرة وتستني من خمس لعشر دقايق قبل ما تبدأي في الخطوة التانية عشان تدي فرصة للبشرة انها تتشربه كويس.

ولو عايزة نوع كريم اساس مع حامي من الشمس حطي CC ده فيه نسبة SPF للوقاية من الشمس وبيوحد لون البشرة.

• الخطوة التانية:

تاني خطوة هتحطي الكونسيلر تحت العين عشان تداري اي هالات سودا تبدأي بصوباعك تخبطي بالراحة تحت العين عشان تفردي الكونسيلر كويس, بعد كده تحطي بودرة اضاءة تحت العين بالفرشة الخاصة ليه تحطيها في البودرة وتخبطيها عشان تنزلي اي بودرة زيادة وتبدأي تحطيها تحت العين.

ولو عندك اي عيوب وبقع في بشرتك خصوصا في منطقة الدقن والانف والجبين عشان دايما بيطلع فيهم حبوب ممكن تحطي عليها طبقة خفيفة من بودرة الاساس المعدنية هتخفي اي عيوب وفي نفس الوقت بتدي لمعة حلوة اوي وطبيعية للوش.

اللي متعرفش ايه هي “بودرة الاساس المعدنية” هي نوع من البودرة بتكون سايلة وتركيبتها بتجمع ما بين البودرة وكريم الاساس والكونسيلر في تركيبة واحدة وبتكون خالية من المواد اللي ممكن تضر البشرة وبتدي شكل مخملي للبشرة جميل جدا.  

• الخطوة التالتة:

تالت خطوة معانا هي البلاشر هنستخدم فيها البلاشر الكريمي بلون وردي طبيعي تبدأي تحطيه على عضمة الخد وتخبطي بصوباعك عليه بالراحة عشان توزعيه كويس على بشرتك هيديكي خدود وردية بشكل طبيعي جدا.

• الخطوة الرابعة:

بعد كده في الخطوة الرابعة هنظبط الحواجب في البداية سرحيهم بفرشة الحواجب وابدأي املي فراغات الحواجب بملون الحواجب المناسب للون حواجبك وانسب لون يطلع حواجبك طبيعية هوالبني المتوسط يعني مش الغامق اوي ولا الفاتح اوي.

• الخطوة الخامسة:

في الخطوة دي هنحط الايشادو اختاري لون فاتح عشان يبان طبيعي فوق العين والافضل تختاري نوع ايشادو مطفي ابعدي عن الالوان اللي بتلمع عشان الشكل يطلع طبيعي اكتر.

• الخطوة السادسة:

دلوقتي بقى هنحط الماسكارا اختاري نوع خفيف من الانواع اللي بتدي طول للرموش بشكل طبيعي. وممكن قبل الماسكرا تستعلمي lash curler , اللي بيتني الرموش ويحضرها لاستقبال الماسكارا.

• الخطوة السابعة:

الخطوة دي هي اخر خطوة معانا وهي الروج عشان تكملي الطلة بتاعتك حطي ملمع شفايف بس بلون فاتح طبيعي, ولو مش عايزة روج بيلمع ممكن تحطي بدل الملمع لون نيود مات والالوان النيود هي اللي بتكون فاتحة لون الشفايف عشان شفايفك تبان بشكل طبيعي كانك مش حاطة روج.

وده الشكل النهائي للمكياج وبكده نكون اتعلمنا ازاي نعمل مكياج بلوك طبيعي خفيف على البشرة.