اعملي برايمر طبيعي
احنا اتكلمنا قبل كده عن فوايد البرايمر وقولنا انه بيساعد على تقليل المسام الواسعة, بيملى فراغات البشرة والخطوط والتجاعيد, بيسهل توزيع كريم الاساس وبيمنع تكتله في خطوط البشرة, بيثبت المكياج فترة اطول, والنهاردة جايبين لكم طريقة طبيعية لعمل البرايمر في البيت بطريقة بسيطة جدا باستخدام مكونين اتنين بس وهما جل الصبار, وكريم مرطب خالي من الزيوت.
كل اللي هتعمليه هتخلطي كميات متساوية من جل الصبار والكريم المرطب وتمزجيهم كويس مع بعض, وكده يبقى البرايمر عندك جاهز, احتفظي بيه في اي علبة فاضية عندك واستخدميه بالطريقة العادية قبل المكياج على البشرة كلها ماعدا منطقة جفن العين.
ولو انتي بشرتك دهنية اوي ممكن تزودي اضافة كمان حطي 1/2 معلقة صغيرة لوس بودر, ولو مش متوفرة عندك استخدمي البودرة المضغوطة العادية اكحتي منها باي حاجة حادة مقدار 1/2 معلقة صغيرة وضيفيها للخليط وقلبيهم مع بعض تاني.
وممكن كمان تستخدمي جل الصبار لوحده كبرايمر ولكن الافضل اضافة كريم مرطب ليه عشان يبقى ملمسه كريمي لان الجل لوحده قوامه لزج.
