طريقة السويت بالعسل الاسود لازالة الشعر
طبعا كل البنات في حالة بحث دايما عن اسهل واسرع الطرق لازالة الشعر, واحنا زي ما عودنا بنات حوا بنجيبلهم دايما كل جديد, النهاردة جايبين لكم طريقة سهلة جدا لعمل السويت لازالة الشعر باستخدام مكون واحد بس وهو العسل الاسود, والميزة في السويت دي انها بتكون طرية وناعمة جدا على الجلد من السويت العادي, وكمان العسل الاسود مفيد جدا للبشرة وبيساعد على ترطيبها بشكل كبير جدا, وفيه عناصر مضادة للاكسدة المعروفة بفوايدها للجلد.
الطريقة:
كل اللي هنعمله هنجيب حلة او طاسة تكون كبيرة وغويطة, حطي فيها كمية العسل اللي انتي عايزاها على قد ما انتي هتحتاجي, حطيها على نار هادية, سيبي العسل يغلي وخليكي واقفة جنبه وقلبيه بالمعلقة لانه مش بياخد وقت خالص على النار وممكن لو سبتيه ينشف منك ويبوظ.
اول ما العسل يبدأ يغلي ويعمل فقاعات اختبريه وشوفيه استوى ولا لا, هاتي طبق وخدي بالمعلقة نقطة منه وحطيها على الطبق سيبيها تهدى شوية لمدة ثواني وبعدين امسكيها بين صوابعك لو لقتيها سايلة زي المية يبقى تسيبيه شوية على النار لو لقيتي العسل بيلزق بين صوابعك كده يبقى السويت جاهز وترفعيه فورا من على النار, هو تقريبا مش بياخد اكتر من دقيقة او اقل على النار.
صبي العسل على طبق صيني او ورق زبدة, سيبيه يهدى لمدة دقايق ويبرد لحد ما تقدري تمسكيه وميحرقش جلدك, ابدأي خدي العسل بايدك ولمي وافردي فيه لحد ما هتلاقي لونه افتح شوية معاكي ومسك نفسه وبقى زي السويت.
استخدميه عادي على اي منطقة في الجسم عايزة تشيلي منها الشعر.