وصفة لتنعيم وترطيب الشعر

النهاردة جايبين لكم وصفة سهلة وفعالة جدا لترطيب وتنعيم الشعر والميزة فيها انها مناسبة لكل انواع الشعر يعني اي حد يقدر يعملها مكوناتها وطريقتها سهلة جدا تعالوا نعرفها مع بعض.

المكونات:

معلقة صغيرة قرفة مطحونة.

1/2 كوباية زيت زيتون.

معلقة صغيرة عسل نحل.

الطريقة:

حطي زيت الزيتون في طاسة او طبق وحطيه على النار لحد ما يدفى بس مسيخنش اوي

ارفعيه من على النار وانقليه في طبق تاني وضيفي عليه القرفة والعسل وقلبي المكونات كلها مع بعض كويس.

دلوقتي مرحلة تطبيق الخليط على الشعر قسمي شعرك لاجزاء, وابدأي حطي الخليط على الشعر بفرشة ممكن تستخدمي فرشة الصبغة على خصلة خصلة من ورا لقدام زي ما بنعمل الصبغة بالظبط, بعد ما تخلصي الشعر كله غطيه بطاقية الحمام او كيس بلاستيك, وسيبي الخلطة 15 دقيقة وبعدين اغسليها بنوع شامبو خفيف والبلسم اللي انتي متعودة تستخدمية.

كرري الخلطة دي يوميا لمدة اسبوع, هتحسي بالفرق جدا على شعرك, بعد الاسبوع ممكن تكرريها مرة واحدة في الاسبوع او حسب احتياج الشعر.