اعملي جراب للموبايل من الكرافتة !
دايما واحنا بره البيت بنحاول نحافظ على الموبايل بتاعنا ونحميه من انه يقع يتكسر او يقع عليها حاجة تبوظه وساعات الكفر العادي مش بيبقى كافي انه يحميه, عشان كده احنا النهاردة هنقولكم على طريقة جراب للموبايل سهلة وبسيطة جدا ومش مكلفة وهي بالكرافتة ! يعني تدخلي كده تفتحي دولاب باباكي او جوزك او اخوكي وتاخدي منه اي كرافتة قديمة عنده مش بيستخدمها وتستغليها :) .. تعالوا بقى نشوف هنعمل الجراب ازاي.
– بعد ما اختارنا الكرافتة اللي هنعمل بيها الجراب هنجيب الناحية اللي بتكون عريضة عند طرف الكرافتة من تحت ونحط عليها الموبايل عشان نشوف مقاسة ونقص بحجم الموبايل.
– تاني خطوة هنفك قماش الكرافتة من بعض ونفتحها وبعدين نقلبها على الناحية التانية ونتني القماش نحطه على بعضه ونخيطه مع بعض ونخيط الجزء اللي تحت المفتوح يعني هنقفل الجراب بتاعنا ونخليه بس مفتوح من فوق مكان ما هنحط الموبايل.
وبعد ما نخلص الخياطة ونقفلة هنعدل الجراب بتاعنا بقى على الوش, ونجيب سكوتش اللي هو اللاصق زي اللي بيكون في الكوتشيهات كده هنلاقيه عند اي محل بيبيع مستلزمات الخياطة هتلاقوا منه احجام جيبوا الحجم الصغير وطبعا بيبقى قطعتين بيلزقوا في بعض خيطوه على الجراب عشان نقفله ونفتحه منه, وكده يبقى الجراب عندنا جاهز بطريقة سهلة وبسيطة جدا ومش مكلفة وبأقل الامكانيات.