نصيحة في صورة من بنات حوا

هنا في نصايح بنات حوا السريعة بنقدملك كل اللي محتاجة تعرفيه عن جمالك, مكياجك, شعرك, بشرتك, اظافرك وأكتر بطريقة نصيحة في صورة... معلومات وحيل جديدة كل يوم هتسهل حياتك وتخليكي دايما متألقة ومتجددة وعلي الموضة :)

 

تنضيف البيوتي بلندر

عشان تنضفي البيوتي بلندر او سبونج المكياج, ممكن بطريقتين, الطريقة الاولى بالصابون العادي الصلب هتبلي البيوتي بلندر بالمية وبعدين ترغيها بالصابون وترجعيها في المية تاني وتقعدي تضغطي عليها كده لمدة دقايق, وبعدها اشطفيها بمية عادية.

الطريقة التانية زي الاولى بس باستخدام صابون سايل, هتبلي البيوتي بلندر بالمية وبعدين تحطي عليها صابون سايل وترجعيها في المية تاني وترغيها وتضغطي عليها بايدك, وبعدين تشطفيها بالمية.

لمانيكير انعم واحلى على الضوافر

حطي المانيكير في التلاجة لمدة 15 دقيقة قبل ما تستخدميه, هيخليه انعم وشكله احلى على الضوافر.

مشروب لمنع العطش والجوع في رمضان

في كتير بيعانوا من العطش والجوع وبيتعرضوا للارهاق والتعب خلال ساعات الصيام خصوصا اللي بيعملوا مجهود كبير او نشاط بدني, عشان كده النهاردة جايبين لكم مشروب هايل جدا لمنع العطش والجوع, ومش بس المشروب كمان بيدي طاقة خلال فترة الصيام, والمشروب يتشرب على السحور وهو لوحده يعتبر وجبة متكاملة يعني ممكن تشربوه من غير ما تاكلوا اي حاجة تانية معاه, تعالوا نعرف مع بعض المكونات والطريقة.

المكونات:

3 تمرات.

3 ثمرات مشمش مستوي “ولو مش متوفر ممكن نستخدم بداله ثمرة موز واحدة”.

1/2 كوباية لبن.

2 معلقة كبيرة شوفان.

الطريقة:

هنحط كل المكونات في الخلاط, ونضربهم مع بعض كويس, لحد ما ما يبقى عندنا عصير سميك, وكده يبقى المشروب جاهز, نشربه كل يوم في السحور.

اعملي مرطب عميق للشعر بمكونات طبيعية

مرطب طبيعي للشعر بمكونات طبيعية بسيطة, هيساعد على ترطيب الشعر بعمق وتنعيمه جدا وهيغنيكي اي مرطبات او حمامات كريم ممكن تجيبيها من بره.

المكونات:

2 بيضة.

1 معلقة كبيرة زيت خروع.

1 معلقة كبيرة عسل نحل.

موزة متوسطة الحجم.

الطريقة:

في طبق اهرسي الموزة بالشوكة لحد ما تبقى ناعمة خالص مافيهاش اي كتل, ضيفي لها زيت الخروع والعسل والبيض, قلبيهم مع بعض كويس لحد ما المزيج عندك هيبقى شبه العجينة.

طريقة استخدامه:

اغسلي شعرك بالشامبو بالطريقة العادية, واشطفيه بالمية.

وزعي الخليط على الشعر كله من الجذور للاطراف.

سيبي الخليط على الشعر 5 دقايق على الاقل, لكن طبعا كل ما سبتيه اكتر هيعمل تأثير اقوى في تنعيم الشعر.

اغسلي الشعر بالمية بالطريقة العادية.

كرري الماسك مرتين في الاسبوع.

كريم طبيعي للشعر الكيرلي

لو شعرك كيرلي او مموج يبقى اكيد الكريم ده هيكون مناسب ليكي جدا, بدل ما تدفعي فلوس كتير في منتجات الشعر الكيرلي زي الكريمات والموس ده غير انها بيكون فيها نسبة كحول ومواد كيميائية ممكن تضر الشعر, النهاردة جيبنالك كريم طبيعي من مكونات بسيطة جدا, هيخلي الكيرلي شكله احلى ويحافظ عليه وهيرطب الشعر ويديه لمعة.

المكونات:

2 معلقة كبيرة جل صبار الالوفيرا.

2 معلقة كبيرة زيت جوز هند.

2 معلقة كبيرة زبدة الشيا.

الطريقة:

اخلطي المكونات كلها مع بعض وقلبيهم كويس لحد ما يمتزجوا كويس.

بعد غسيل الشعر حطيه عليه من الكريم من منتصف الرأس لحد الاطراف, واثناء وانتي بتدهنيه ممكن تلفي خصل الشعر حوالين صوابعك عشان يساعد انه يديه الشكل الكيرلي.

بعدها ممكن تنشفي الشعر بالسيشوار بالطريقة العادية, ركزي هوا السيشوار عليه.

استخدمي الطريقة دي بعد كل مرة تغسلي فيها شعرك عشان تعملي كيرلي طبيعي.

استخدمي الايلاينر كأيشادو

ممكن تستخدمي الايلاينر كبديل للايشادو, هتحتاجي ايلاينر وفرشة, حطي من الايلاينر خط سميك على ايدك وبالفرشة ابدأي سيحيه كده وخدي منه بفرشة الايشادو وحطيه على الجفن بنفس طريقة الايشادو.