نصايح بنات حوا السريعة لمكياج العيون

استخدمي الايلاينر كأيشادو

ممكن تستخدمي الايلاينر كبديل للايشادو, هتحتاجي ايلاينر وفرشة, حطي من الايلاينر خط سميك على ايدك وبالفرشة ابدأي سيحيه كده وخدي منه بفرشة الايشادو وحطيه على الجفن بنفس طريقة الايشادو.

عشان توسعي عينك

عشان تبيني عينك اوسع مترسميش الكحل الاسود حوالين العين كلها وعلى ال Waterline لان ده هيبين العين اصغرمن حجمها الطبيعي, الطريقة الصح حطي خط باللون الاسود على الجفن اللي فوق, وعلى اللي تحت حطي خط باللون البني, وعلى خط ال Waterline حطي لون نيود, الطريقة دي هتبين العين اوسع, زي ما احنا شايفين في الصورة قدامنا الفرق بين الاتنين.

طريقة سريعة للتخلص من انتفاخات تحت العين

كتير من البنات بيعانوا من مشكلة الانتفاخات تحت العين ومش بيقدروا يتخلصوا منها بسهولة, ومن الطرق اللي ممكن تخلصك من المشكلة دي بشكل سريع هو انت تحتفظي بكريم العين في التلاجة, لما هتحطي منه وهو ساقع هيساعد كتير في علاج الانتفاخات بسرعة.

استخدمي المعلقة لرسم الايلاينر

احنا اتكلمنا قبل كده عن استخدامات المعلقة في وضع المكياج وازاي نستفاد بيها في ظبط المكياج, والنهاردة هنقولك ازاي تستخدميها لوضع الايلاينر.

زي ما هو باين في الصورة قدامنا كده, هنستخدم ايد المعلقة عشان نظبط الجناح اللي تحت للرسمة بتاعتنا, وبعد ما نرسم الجناح اللي فوق هنحط المعلقة فوق العين ونرسم الجناح اللي فوق, وبعدها نملاه ونكمل باقي الرسمة.

استخدمي الكونسيلر الاخضر والبرتقاني مع بعض لاخفاء عيوب البشرة

كلنا عارفين الكونسيلر ليه استخدامات كتير جدا واحنا قولناها كلها قبل كده وعارفين كمان ان ليه الوان مختلفة وكل لون ليه استخدام, بس في الغالب معظم البنات بيستخدموا لون واحد من الكونسيلر على البشرة كل بشرة حسب احتياجها لكن مجربناش قبل كده نستخدم لونين مع بعض, ودي الحيلة اللي هنعرفها مع بعض النهاردة.

هنستخدم الكونسيلر الاخضر والبرتقاني مع بعض, وزي ما احنا عارفين ان الاخضر بنستخدمة عشلان نداري الحبوب, والبرتقاني عشان نداري البقع الغامقة والهالات السودا تحت العين, ولما نستخدمهم مع بعض ده هيدي تغطية اعلى وهيداري اي عيوب في البشرة.

هنحط الكونسيلر البرتقاني عند منطقة تحت العين وفوق الجفون, وفي اي مكان تاني على البشرة فيه بقع, والاخضر هنحطه على باقي الاماكن في البشرة عند الخدين, والدقن, والانف, بعد كده هنجيب فرشة كريم الاساس او البلندر ونحط بيها كريم الاساس وندمج كله مع بعضه الكونسيلر مع كريم الاساس.

وده فيديو للخطوات:

وصفة طبيعية لتكثيف الحواجب

النهاردة جايبنلكم وصفة بسيطة جدا هتساعد على تكثيف الحواجب وهي باستخدام زيت جوز الهند لانه غني جدا E وبالحديد, وهو مش بيساعد بس على تكثيفها كمان بيخلي لونها اغمق, ولافضل النتايج اخلطي كميات متساوية من زيت جوز الهند وزيت الخروع, اعملي مساج بالراحة للحواجب ودلكيهم بالزيت بصوابعك, سيبيه من 20 – 30 دقيقة, وبعدين اغسليه بمية دافية, كرري الوصفة يوميا لمدة من 2 -3 اسابيع بعدها هتلاحظي النتيجة, وممكن تستخدمي كمان نفس الوصفة لتكثيف وتطويل الرموش.