نصايح بنات حوا السريعة لكريم الاساس والكونسيلر

نصايح وحيل للكونسيلر والفونداشن والبودر,اعرفي هنا اجابات لأسئلة كتيرة بنات حوا بيسألوها زي اماكن وضع الكونسيلر؟ إزاي اختار لون الفوندشن , لو جبت كريم أساس وطلع أغمق من لون وشي أعمل إيه؟ بنحط مين الاول كريم الاساس ولا الكونسيلر؟؟ كل ده وأكتر.

اعملي بودرة الوجه في البيت بمكونات طبيعية

النهاردة هنقولكم على طريقتين لعمل بودرة الوجه في البيت بمكونات طبيعية هتغنيكي انك تشتري بودرة تاني من بره, والبودرة مناسبة لكل درجات البشرة ولكل انواع البشرة حتى البشرة الحساسة لانها بمكونات طبيعية مفيدة جدا للبشرة.

الطريقة الاولى:

هي طريقة اللوس بودر او البودرة السايبة, هاتي كوباية شوفان او اي كمية انتي عايزة تعمليها, اضربيها في الكبة كويس جدا لحد ما تبقى عبارة عن بودرة ناعمة خالص, حطي بودرة الشوفان دي في طبق وحطي عليها مية باردة تغطي الكمية او ممكن تحطي عليها مية ورد, وبعدين صفيه من المية, وبعدها حطي مية تاني وصفيها وكرري العملية دي 3 مرات عشان دي تعتبر عملية تنضيف للشوفان, بعد ما تصفيه اخر مره افردي مناديل او ورق زبدة وحطي عليه الشوفان وسيبيه لحد ما ينشف تماما, وبكده البودرة تبقى جاهزة عندك حطيها في اي علبة فاضية واستخدمي منها بالفرشة.

الطريقة التانية:

الطريقة التانية معانا هي طريقة البودرة المضغوطة, هنحتاج كوباية مية ورد و2 كوب بودرة اطفال, اخلطي المية مع البودرة واضربيهم مع بعض في الخلاط لحد ما الخليط يتجانس كويس بحيث انه يبقى مش متماسك ومفتت وبمجرد ما تضغطي عليه تقدري تشكليه, ولو لقيتي الخليط سايل زيادة ممكن تزودي عليه شوية بودرة اطفال لحد ما يبقى القوام مناسب زي ما قولنا, هاتي علبة بودرة فاضية قديمة عندك او اي علبة فاضية بغطا متوفرة بس متكونش غويطة يعني شبه علبة البودرة, خدي الخليط بالمعلقة وحطيه في العلبة وابدأي اضغطي عليه وساويه, سيبيها لحد ما تنشف, كده تبقى البودرة جاهزة تقدري تستخدميها بالطريقة العادية حطي منها بالفرشة او بالسفنجة.

صغري حجم الجبهه بالمكياج

كتير من البنات بيكون عندهم منطقة الجبهة عريضة ومش بيعرفوا يعملوا ايه عشان يصغروها, النهاردة هنقولك تصغريها بحيلة بسيطة بالمكياج.

 كل اللي هتحتاجيه برونزر, او كريم اساس كريمي ولو هتستخدمي كريم اساس يبقى اختاري درجة اغمق من لون بشرتك بدرجة واحدة, خدي بالفرشة من البرونزر او كريم الاساس وابداي افرديه على الجبهة على طول خط الشعر, ابدأي من الجنب لحد نص الجبهة ولما توصلي للنص حطي على الناحية التانية بنفس الطريقة من الجنب للنص زي ما هو باين في الصورة, وبعدين ادمجيه بالبلندر بس بالراحة بطريقة الطبطبة بس, وبكدة تبقي صغرتي حجم الجبهة بحيلة بسيطة جدا.

البودرة قبل كريم الاساس للبشرة الدهنية

تكنيك جديد بدأ يستخدمه خبراء المكياج للبشرة الدهنية بشكل خاص اللي بتعاني دايما من ان المكياج بيسيح عليها بسرعة وبعد وقت قصير بتلاقي ظهرت لمعة على البشرة, والتكنيك هو استخدام البودرة قبل كريم الاساس.

هتحطي البودرة على البشرة بالطريقة العادية وبعدين تحطي كريم الاساس وتمزجيه على البشرة بالبيوتي بلندر, وهنا استخدام البيوتي بلندر افضل من اي طريقة تانية لاننا بنستخدم طريقة الطبطبة على البشرة في دمج كريم الاساس فهتبقى افضل.

هتلاحظي مع الطريقة دي ان كريم الاساس هيدوم فترة اطول من غير ما يسيح ومافيش لمعة على الوش.

غمقي او فتحي كريم الاساس بطريقة سهلة

مشكلة بتقابل كتير من البنات لما بنشتري كريم الاساس ممكن تطلع درجته اغمق او افتح من درجة بشرتنا ومش بنعرف نتصرف ازاي, النهاردة هنقول لبنات حوا حل لمشكلة لون كريم الاساس.

لو جبتي كريم الاساس ولقيتي لونه غامق عن لون بشرتك هيبقى الحل انك لما تيجي تحطيه اخلطي معاه كمية من اي نوع كريم مرطب بتستخدميه هيفتحلك اللون.

لكن لو كريم الاساس طلع فاتح عن لون بشرتك وعايزة تغمقيه شوية في الحالة دي هيبقى حله انك لما تيجي تحطيه اخلطي معاه كمية بسيطة جدا من كركم البشرة هيغمق لونه وكمان هيديكي درجة اللون اللي على دهبي وهيدي لوك حلو جدا للبشرة.

اماكن وضع الهايلايتر على الوجه

الهايلايتر من خطوات المكياج اللي بتدي الوش اضاءة ولوك مشرق جدا, وبتظهر جمال الملامح اكتر وبشكل طبيعي.

تعالوا نعرف مع بعض اماكن وضع الهايلايتر:

1- فوق الحاجبين.

2- عضمة الحاجب.

3- زاوية العين الداخلية.

4- اعلى عضمة الخدين

5- منتصف الانف.

6- فوق الشفة العليا في المنتصف عند منطقة قوس كيوبيد.

7- منتصف الدقن.

استخدمي كريم بعد الحلاقة الرجالي كبديل للبرايمر

كلنا عارفين ان البرايمر من الخطوات المهمة اوي قبل المكياج عشان تثبته فترة طويلة وتقلل حجم المسام, بس لو مش متوفر عندك برايمر هنقولك النهاردة على بديل ممكن تستخدميه كبديل للبرايمر وهيديكي نفس النتيجة وهي كريم او بلسم بعد الحلاقة الرجالي “Aftershave balm” اللي بيتحط كترطيب للبشرة, استخدميه قبل المكياج هيقوم بنفس مهمة البرايمر.

وفي الصورة اللي قدامنا حطت في نص الوش البرايمر العادي وفي النص التاني بلسم بعد الحلاقة هنلاحظ ان مافيش فرق بين النصين.