نصايح الموضة من بنات حوا

اعرفي معلومات جديدة كل يوم عن حيل ونصايح الموضة بلمسات بسيطة جدا ممكن تغيري من اللوك بتاعك وتخلي شكل لبسك احلي ولايق أكتر علي شكل جسمك, ونصايح كمان لهدومك إزاي تحافظي عليها وتصلحيها.

اسماء موديلات البنطلونات

1- Skinny:

الموديل ده اللي بيكون ضيق وواخد شكل الجسم.

2- Straight:

بيكون مستقيم والرجل وسع واحد.

3- Harem:

الموديل ده اللي احنا بنقول عليه السروال بيكون واسع وماسك على منطقة انكل الرجل.

4- Tapered:

الموديل المدبب بيكون ماسك من عند منطقة الركبة اكتر من فوق.

5- Boot Cut:

بيكون نازل على واسع من تحت منطقة الركبة, وطول الرجل بيكون نازل على الشوز شوية.

6- Flared:

قريب من موديل ال Boot Cut بس الوسع تقريبا بيكون من تحت اكتر من عند منطقة الركبة.

7- Wide Leg:

الرجل الواسعة.

8- Palazzo:

البنطلون الواسع او البنطلون الجيبة.

9- Pleat Front:

بيكون الوسع من فوق اكتر من تحت.

10- Cargo:

الموديل بيكون واسع وفي جيوب كبيرة ممكن جيبين او اكتر من ورا ومن الجناب ومن قدام.

11- Pyjama:

الموديل اللي بيكون فيه حزام على الوسط.

12- Wide Waistband:

بيكون بكمر عريض على الوسط.

13- Capri:

الكابري بيكون موديل قصير وفي منه قصير عند الركبة على طول شبه البرمودا, وفي بيكون اطول شوية تحت الركبة.

14- Cuffed:

قصير بتنيه من تحت.

15- Cropped:

القصير اللي بيكون مبين منطقة كاحل الرجل.

16- Hot Pants:

الشورت القصير اوي.

17- Bermuda:

البرمودا اللي بيكون قصير عند الركبة.

18- City Short:

اللي بيكون طوله فوق الركبة.

19- Stirrup:

البنطلون اللي بيكون  فيه جزء ماسك في الرجل من تحت.

20- Jodhpur:

بيكون واسع او شكله منفوخ من فوق ونازل على ضيق من اول الركبة.

اسماء موديلات الجيبات

كتير من البنات بيبقوا عايزين يعرفوا اسماء الموديلات المختلفة في اللبس عشان يسهل عليهم لما ينزلوا يشتروا اي حاجة وكمان يكونوا عارفين شكل كل موديل, والنهاردة جايبين لكل بنات حوا اسماء موديلات الجيبات وشكل كل موديل.

1- Accordion:

الجيبة الاكورديون اللي موديلها بيكون عبارة عن كسر رفيعة جنب بعض يعني واخدة شكل الاكورديون.

2- A-Line:

الموديل ده اللي بيكون من فوق ضيق ونازل على واسع واخد شكل حرف A.

3- Asymmetrical:

الموديل ده بتكون الجيبة اطوالها مختلفة, يعني ممكن تبقى طويلة من جنب وقصيرة من الجنب التاني, او طويلة من ورا وقصيرة من قدام وهكذا.

4- Bubble:

الموديل اللي بيكون واخد شكل ال Bubble او الفقعات.

5- Circle:

الموديل اللي بيكون مدور وكله وسع واحد.

6- Draped:

الموديل الدرابيه اللي في تنيات فوق بعض زي ما هو باين في الصورة كده.

7- Godet:

الموديل بيكون ضيق عند منطقة الجناب ونازلة من تحت على واسع بكسر عريضة.

8- Gypsy:

الموديل الواسع الطويل.

9- Knife Pleated:

بيكون الموديل بكسر عريضة.

10- Layered:

الجيبة الطبقات فوق بعض.

11- Mermaid:

موديل عروسة البحر اللي بيكون ضيق ونازل واسع من تحت الركبة.

12- Mini:

الجيبة القصيرة.

13- Paneled:

الموديل ده بيكون نازل منة اللي كله وسع واحد, او اللي بيكون ضيق من عند الجناب ونازل على اوسع شوية, او ضيق ونازل على وسع من فوق منطقة الركبة, بس في كل الموديلات بيكون الوسع نازل بكسر عريضة او زي تنيات عريضة في الجيبة.

14- Pencil:

الجيبة اللي واخدة شكل الجسم.

15- Ruffled:

الموديل اللي فيه كشكشة.

16- Tube:

الجيبة الضيقة بس الموديل ده بيكون كله وسع واحد يعني تحت زي فوق مش واخدة شكل الجسم بالظبط زي ال Pencil, ولو بصينا للصورة هنعرف الفرق ما بينهم اكتر في الشكل.

17- Tulip:

الموديل اللي واخد شكل زهرة التيوليب, بتبقى كانها قطعتين جايين على بعض من قدام.

18- Wrap:

بتكون كمان كانها قطعتين على بعض بس جاية بورب او من الجنب.

19- Yoke-Waist:

بتكون ضيقة على الوسط وباقي الجيبة واسعة.

امنعي البنطلون يشبك في الشراب

بتحصل مع كتير مننا نكون لابسين بنطلون خامته تعمل احتكاك مع الشراب وتشبك فيه وطبعا ده بيسبب مشكلة وبنبقى اكيد مش مرتاحين.

عشان نمنع المشكلة دي بحيلة بسيطة جدا اشبكي جوه البنطلون من الجنب من تحت دبوس مشبك الحركة دي هتمنع الاحتكاك وهتحل لك المشكلة.

طبقي الهدوم بطريقة سهلة جدا

تطبيق الهدوم بطريقة منظمة ومرتبة وبنفس المقاس هتبقى مهمة سهلة مع الطريقة اللي هنعملها النهاردة طريقة بسيطة وسهلة جدا, كل اللي هنحتاجه كارتونة وقطر وشيكرتون.

  • – جيبي الكارتونة وافتحيها وبعدين هاتي اي قميص او بلوزة عندك حطيه على الكارتونة وعلمي بالقلم والمسطرة على قد القميص بالطول وبالعرض وقصي على قد حجم القميص 6 قطع.
  • – بعدين حطي كل تلات قطع جنب بعض لزقي القطع اللي فوق مع بعض بالشيكرتون وبعدين لزقي بين اللي فوق واللي تحت زي ما هو باين في الصورة كده.
  • – كده تبقى الكارتونة جاهزة للاستخدام هاتي القميص بتاعك حطيه على وشه على الكرتونة واتنيها عليه من الناحية اليمين والشمال وبعدين اتني الجزء اللي تحت في النص وبكده تبقي طبقتي القميص في ثانية واحدة, وهتبقى عندك الكارتونة تقدري تستخدميها مع هدومك كلها في اي وقت.

طرق مختلفة للبس السكارف

الطريقة الاولى : هنلفة حوالين الرقبة باي طريقة احنا عايزينها ونشبك على السكارف من فوق ورد او اكسسوار كبير عشان نغير من شكله.

الطريقة التانية : بسكارف لونين في بعض هنستخدمه زي الشال هنلفه عكس بعض ونربطه من ورا.

الطريقة التالتة : هنقسم السكارف نصين ونحطه على الرقبة بالعكس وبعدين نلفه حوالين الرقبة ونجيب الطرفين قدام.

الطريقة الرابعة : دي مناسبة للسكارفات الصغيرة ممكن نحط لها اضافة سلسلة نقسم السكارف نصين ونعمل في نهايتة عقدة ونحطه على الرقبة ونشبك فيه سلسلة من الطرفين ونثبتها بدبوس مشبك صغير.

الطريقة الخامسة : دي هنربط السكارف من الاخر نعمل فيه عقدة ونحطه على الرقبة وخلي العقدة في النص او فوق قريبة من الرقبة حسب اختيارك.

الطريقة السادسة : سهلة جدا هنحط السكارف على الكتف ونربطه على شكل فيونكة كبيرة.

الطريقة السابعة : هنقسم السكارف نصين ونحطه على الرقبة ونفردة من قدام ونلبس عليه حزام هيبقى عامل زي الفيست.

الطريقة التامنة : هنربط طرفين السكارف على الرقبة وبعدين هناخد الطرفين التانين نربطهم في بعض على ورا حوالين الوسط.

الطريقة التاسعة : هنحط السكارف على الرقبة ونربطه من تحت نعمله عقدة.

الطريقة العاشرة : هنقسم السكارف نصين ونحطه على الرقبة وناخد طرف واحد ندخله في السكارف في الناحية المتنية وبعدين نلفه مره وندخل فيه الطرف التاني.

الطريقة الحادية عشر : ممكن نستخدم السكارف كحزام نلفه حوالين الوسط.

الطريقة الثانية عشر : دي الطريقة العادية هنقسم السكارف نصين ونحطه على الرقبة وندخل الطرفين فيه.

حافظي على الاكسسوارات لاطول فترة

دايما بتقابلنا مشكلة مع الاكسسوارات ان لونها بيغير او بيطفي بعد فترة قصيرة , وكمان الخواتم اللي بتكون مصنوعة من المعدن ساعات بتسيب لون على الايد, وعشان نحل المشاكل دي بطريقة سهلة جدا اول ما تشتري اي اكسسوار جديد ادهنيه بمقوي الاظافر الطريقة دي هتخليه يحافظ على لونه من غير ما يتغير اطول فترة, وكمان هتحمي جلدك من المعدن بتاع الخاتم ان لونه يطلع في ايدك.