نصايح بنات حوا السريعة للأظافر والمانيكير

نصايح للاظافر والمانيكير عشان تخلي ضوافرك قوية وبتلمع, اعرفي كمان إزاي تختاري اللون المناسب للون ايديكي, إزاي تحمي ضوافرك من التشقق وأفكار كتير عشان تتقني الرسم بالمانيكير زي المحترفين وأكتر.

رسمة مانيكير باستخدام الفتلة

طريقة لعمل تصميم على الضوافر بشكل جديد وسهل جدا باستخدام الفتلة, وفي التصميم اللي معانا النهاردة استخدمت فيه تلات الوان الابيض, والاحمر, والاخضر, طبعا انتي تقدري تختاري حسب ذوقك اي تلات الوان تفضليهم.

اول حاجة هتحطي لون مانيكير ابيض يبقى الطبقة الاساسية بتاعتك.

بعد ما ينشف حطي طبقة مقوي اظافر.

وبعدين هاتي فتلة باللون الاسود وحطيها على الضوفر باشكال مختلفة على كل ضوفر زي ما هو باين قدامنا في الصورة كده.

حطي عليها طبقة مقوي اظافر تاني عشان تثبتها على الضوفر, وبعدين قصي الفتلة على قد الضوفر بالظبط.

بعد كده ممكن تعملي نقط بألوان مختلفة حوالين الفتلة.

بعدها حطي طبقة اخيرة من مقوي الاظافر.

ازاي تختاري لونين مانيكير صح مع بعض

لو مش بتعرفي تنسقي لونين مانيكير مع بعض او مش عارفة ايه الالوان اللي ممكن تمشي مع بعضها, النهاردة جايبين لكل بنات حوا مجموعة الوان مانيكير وايه اكتر لونين ممكن تحطيهم مع بعض ويطلع شكلهم حلو ومتناسق.

1- اللون المرجاني او السيمون مع اللون الارجواني او البنفسجي.

2- لون ازرق مخضر مع السيلفر او الفضي.

3- اللون الازرق النعناعي مع اللون البينك الفاتح.

4- الاحمر مع الدهبي.

5- الابيض مع اللون النحاسي.

6- التركواز مع الاسود.

7- الازرق الغامق مع اللون اللافندر او الموف الفاتح.

الثوم لتقوية الاظافر

لو بتعاني من ضعف وتكسر الاظافر النهاردة جايبين لكم طريقة سهلة وبسيطة جدا لتقوية الاظافر وهتحافظ عليها صحية باستخدام مكون واحد بس, وهو الثوم, كل اللي هتعمليه انك تجيبي فص ثوم اقسميه نصين وافركي الضوافر بيه لمدة ثواني وبعدين امسحيه بمنديل, وممكن تعملي الوصفة دي كل يوم قبل النوم وتغسليها الصبح.

افتحي ازازة المانيكير بسهولة

ساعات كتير اول ما بنشتري ازازة المانيكير, او بعد ما نستخدمها كذا مره المانيكير يخلي الغطا بتاعها يبقى صعب الفتح, وعشان تسهلي المهمة دي كل اللي هتعمليه انك هتلفي استك كذا لفه على الغطا زي ما هو باين في الصورة كده, الحركة دي هتخلي الغطا يتفتح معاكي اسهل.

وصفة لتقوية الاظافر

المكونات: 

كميات متساوية من زيت جوز الهند وعسل النحل “اعملي اي كمية انتي عايزاها”.

كام نقطة من زيت اللافندر.

الطريقة:

اخلطي المكونات كلها مع بعض وادهني بيها الضوافر يوميا, وممكن تحتفظي بالخليط في اي ازازة مانيكير فاضية عندك وتدهني الخليط بفرشة المانيكير هيكون افضل.

وصفة لضوافر اطول واقوى

وصفة بسيطة وسهلة وفي نفس الوقت فعالة في تطويل وتقوية الضوافر, تعالوا نعرفها مع بعض.

المكونات:

1/4 كوباية عصير برتقان.

فص ثوم مفروم.

1/4 كوباية زيت زيتون.

الطريقة:

في طبق اخلطي عصير البرتقان مع الثوم المفروم وانقعي ضوافرك فيه لمدة 15 دقيقة.

بعدها اغسلي ايدك وانقعيهم في زيت الزيتون لمدة 15 دقيقة كمان وبعدين اغسليها.

كرري الوصفة من 2 – 3 مرات في الاسبوع, وخلال اسبوعين هتشوفي الفرق على ضوافرك وهتلاحظي انها بدأت تطول بشكل ملحوظ وبقت اقوى.

لان عصير البرتقان غني جدا بالمواد المضادة للاكسدة والفيتامينات اللي بتساعد على نمو الضوافر بشكل سريع, وكمان بيساعد على ترطيب الجلد اللي حوالين الضوافر.

الثوم غني بالسيلينيوم اللي بيساعد على نمو الضوافر, كمان بيحتوي على خصائص مضادة للجراثيم ومكافحة الفطريات.

زيت الزيتون يعتبر مرطب هايل جدا للبشرةوبيرطبها بعمق وده اكيد بيساعد على ترطيب الجلد اللي حوالين الضوافر وبيقوي الضوافر وبيمنع تكسرها.