نصايح بنات حوا السريعة لجمال الشعر

هنا في دليل نصايح الشعرهتعرفي أكتر عن طرق العناية بالشعر وجماله, إزاي تغسلي شعرك صح و إزاي تمنعي تساقطه وتحافظي علي طوله, إيه الألوان اللي تليق علي لون بشرتك, اتعلمي تسريحات سهلة وسريعة عشان روتينك اليومي وأكتر.

الطريقة الصح لغسل الشعر

يمكن يكون في بنات كتير اوي مش بيهتموا بطريقة غسل الشعر, لكن غسل الشعر بالطريقة الصح ليه تأثير كبير جدا على الشعر وبيحافظ عليه صحي فوق ما تتخيلوا, والنهاردة هنقولكم طريقة غسل الشعر بالطريقة الصحيحة في 7 خطوات.

1- اول حاجة قبل غسيل الشعر سرحيه بفرشة عشان تعززي فروة الراس وتنشطي الدورة الدموية, وتتخلصي من اي تشابك قبل الغسيل واللي هيساعد على منع تكسر الشعر.

2- بلي الشعر بمية دافية مش سخنة لان المية السخنة هتجفف فروة الراس من الزيوت الطبيعية وتنشف الشعر, وبعدها خدي كمية بسيطة من الشامبو على ايدك وحطيها على فروة الراس.

3- كتير من البنات بيهملوا الخطوة دي لكن هي مهمة جدا, وهي المساج بعد ما تحطي الشامبو اعملي مساج لفروة الراس ودلكيه بخفة اوي, استمري في التدليك من 1 – 2 دقيقة, ودلكي الشعر وهو مفرود زي ماهو باين في الصورة كده ولا تقلبيه على قدام ولا ترفعيه كله لفوق زي ما بنات كتير بيعملوا انتي محتاجة انك تدلكي فروة الراس بس بالشامبو ولما تيجي تغسليه بالمية الشامبو هينزل على باقي الشعر ينضفه.

4- بعد التدليك اغسلي شعرك من الشامبو بمية دافية كويس جدا لحد ما المية تنزل صافية مافيهاش اي شامبو, وقبل ما ننتقل لخطوة البلسم حاولي تتخلصي من المية الزيادة في الشعر عشان البلسم يجيب نتيجة احسن, والشعر يتغسل مرة واحدة بس بالشامبو الا لو شعرك دهني اوي ومحتاج يتغسل مرة كمان.

5- بعد ما تتخلصي من المية الزيادة في شعرك, حطي كمية صغيرة من البلسم على كف ايدك وحطيها على الشعر ودلكيه وركزي على الاطراف اكتر.

6- دلوقتي هنشطف الشعر والشطفة النهائية ضروري تكون بمية باردة, عشان تقفلي مسام فروة الراس, اشطفيه كويس لحد ما المية تنزل صافية.

7- بعدها نشفي شعرك بالفوطة من غير ما تفركيه بس حطيها على الشعر واضغطي عليه عشان تمتص المية مش اكتر, ولو هتنشفيه بالسيشوار استخدميه عليه من الجذور للاطراف وانتي بتحركيه من فوق لتحت عشان تقللي اضرار الحرارة على الشع, واستخدمي للتجفيف اقل درجة حرارة في السيشوار.

حيل واسرار بسيطة لشعر صحي

ممكن بحيل وحاجات بسيطة جدا نعملها نقدر اننا نوصل لشعر صحي من غير مجهود, والنهاردة جايبنلكم كام حيلة لو نفذتوها هتفرق جدا في صحة شعركم.

1- اول حاجة بدلي التوكة الاستك لربط الشعر بباندانا قماش عشان تكون اوسع على الشعر ومريحاه اكتر.

2- قبل غسيل الشعر وهو ناشف سرحي شعرك بالفرشة, لكن بعد الغسيل وهو مبلول سرحيه بمشط سنانة واسعة.

3- بدل ما تنشفي شعرك بالفوطة استبدليها بتيشرت قطن.

4- عشان اصلاح الشعر اعملي حمام كريم بشكل اسبوعي, ولحماية الشعر استخدمي سيروم وحامي من الحرارة.

5- استبدلي المخدة القطن بالساتان للنوم.

اعملي شعرك كيرلي بالمكوى بطريقة سهلة

لو عايزة تعملي شعرك كيرلي بالمكوى ال Flat iron ومعندكيش ادوات تساعدك انك تعملي الكيرلي, مش محتاجة تشتري ادوات مع الحيلة بتاعتنا النهاردة, كل اللي هتعمليه هتجيبي قلم رصاص خشب وتلفي عليه خصلة الشعر وتدوسي عليها بالمكوى وبعدين تفكيها من عليه, هتلاقي الكيرلي اتعمل بكل سهولة ومن غير اي مجهود ومش هياخد منك وقت.

اعملي بنفسك كيراتين طبيعي لتنعيم وتكثيف وفرد الشعر

النهاردة هنقولكم طريقة بسيطة جدا وسهلة باستخدام بذور الكتان بتساعد على تنعيم وفرد وتكثيف الشعر, وبذور الكتان اثبتت فعاليتها في علاج مشاكل الشعر وبقت دلوقتي بتدخل في كتير من منتجات العناية بالشعر وده لانها غنية جدا بالاحماض الدهنية الاوميجا3, وغنية بالعناصر المفيدة والمغذيات اللي بتساعد على تعزيز نمو الشعر وتنعيمه, بيقوي بصيلات الشعر, بيحمي الشعر من التساقط والتلف, بيعالج مشكلة جفاف وتقصف الشعر, تعالوا نشوف المكونات والطريقة مع بعض.

المكونات:

2 كوب مية.

1/4 كوباية بذور كتان.

الطريقة:

في طاسة غويطة او حلة, حطي المية وبذور الكتان مع بعض وحطيهم على النار اول ما يغلي خفضي النار, وخليهم يغلوا مع بعض لمدة من 7 – 9 دقايق مع التقليب المستمر, هتلاقي الخليط عندك بقى عامل زي الجل ارفعيه من على النار, وصفيه بمصفى ضيقة من البذور هيبقى عندك الجل بس ده اللي هنستخدمه للشعر.

ممكن تستخدميه لوحده او تضيفي عليه زيت زيتون, او جل صبار حوالي معلقتين كبار, هتدهني الشعر كله خصلة خصلة بالجل من الجذور للاطراف, وبعدين سرحي الشعر بمشط خشب بسنان واسعة عشان توزعي الجل كويس على الشعر كله, سيبيه 45 دقيقة وبعدين اغسليه بالمية والشامبو, كرري الوصفة مرتين في الاسبوع.

لو فضل عندك جل ممكن تحطيه في برطمان, وتحفظيه في التلاجة لما تيجي تستخدميه تاني, احفظيه من غير اي اضافات لو هتحطي اي اضافات زيوت تبقى وقت الاستخدام على طول.

تنضيف الشعر الدهني

لو شعرك دهني وبتعاني منه انه على طول بيزيت بعد ما تغسليه على طول, جربي الوصفة دي.

ببساطة ضيفي من 2 – 3 معالق كبيرة ملح اللي بنستخدمه في الاكل او ملح انجليزي للشامبو اللي بتغسلي بيه شعرك, واغسلي شعرك بالخليط ده هيحافظ عليه نضيف لفترة اطول.

ازاى تخلى شعرك يبان جذاب اكتر

سرحى شعرك بالفرشاة عادى واقسميه لـ 3 أجزاء، خدى جزء لفوق ولميه على شكل high bun و الجزئين اللى تحت افصليهم بايدك كويس، وباستخدام الـ hair curler اعملى لشعرك تمويجة خفيفة من نص الخصلة بالضبط، يعنى لا من الاطراف ولا من الجذور ، من النص. اعملى الطريقة دى على كل خصل الجزء اللى تحت من شعرك و استخدمى الـ hair curler  وانتى بتلفيها على الخصل عكس اتجاه عقارب الساعة. وبعد كده فكى الجزء اللى فوق وسرحى شعرك على خفيف بالفرشاة مرة تانية. وبكده تكونى عرفتى ازاى تخلى شعرك يبان جذاب اكتر .