نصايح بنات حوا السريعة لجمال الشعر

هنا في دليل نصايح الشعرهتعرفي أكتر عن طرق العناية بالشعر وجماله, إزاي تغسلي شعرك صح و إزاي تمنعي تساقطه وتحافظي علي طوله, إيه الألوان اللي تليق علي لون بشرتك, اتعلمي تسريحات سهلة وسريعة عشان روتينك اليومي وأكتر.

رفع الشعر في 5 دقايق

لمي الشعر كله على ورا اعمليه ديل حصان منخفض وبعدين ضفريه, اقسمي الشعر من النص وعدى الضفيرة من الفرق, وبعدين ابرمي الضفيرة كلها على فوق وثبتيها بالبنس.

ديل حصان معقود

قسمي شعرك تلات اجزاء, بس خلي الجزء اللي ورا اكبر من الجزئين اللي في الجناب, لمي الجزء اللي ورا  ديل حصان منخفض, وبعدين خدي الجزئين اللي في الجناب على ورا واربطيهم في بعض وبعدين لفي باقي الشعر حوالين ديل الحصان وثبتيه بالبنس, وكده تبقى التسريحة خلصت ومخدتش منك 3 دقايق في تنفيذها.

ازاي تنضفي المكوى والكيرلر

المكوى او البيبي ليس والكيرلر مع كثرة الاستخدام بيتراكم عليها زيوت ومنتجات تصفيف الشعر وده بيخليها لما نيجي نعمل بيها الشعر متديناش النتيجة المطلوبة او تنقل الزيوت دي لشعرنا عشان كده ضروري كل فترة ننضفها, وطريقة التنضيف سهلة وبسيطة جدا.

هنخلط شوية بيكنج صودا “الكربوناتو” مع مية اكسجين وبمنديل ناعم هناخد من الخليط ده ونمسح المكوى من جوه ومن بره, وبعدين بمنديل ناشف نمسحها كويس هتلاقيها نضفت.

وصفة القرفة لتنعيم الشعر

النهاردة جايبين لكل بنات حوا ماسك سهل وبسيط جدا وفي نفس الوقت فعال لتنعيم الشعر وكمان بيقويه وبيخليه صحي.

المكونات:

قرفة مطحونة.

لبن.

الطريقة:

حطي القرفة المطحونة في طبق بالكمية اللي تكفي طول وكثافة شعرك وبعدين جيبي اللبن وضيفيه شوية شوية على القرفة لحد ما يبقى القوام بتاعها سميك شبة عجينة الحنة قلبي اخلطي القرفة واللبن مع بعض كويس.

على شعر ناشف حطي خليط القرفة واللبن على خصلة خصلة يعني قسمي الشعر وخدي خصلة سرحيها بالمشط وافرديها كويس وحطي عليها الخليط يعني تقريبا زي طريقة الحنة.

بعد ما تخلصي الشعر كله متلميهوش خليه سايب وسيبيه لمدة ساعة لحد ما تلاقي الخلطة نشفت على الشعر خالص وبعدها اغسليه عادي المية والشامبو.

الخلطة نتيجتها حلوة جدا في تنعيم الشعر وكمان ممكن تساعد على فرده.

ياللا جربوا الوصفة وشاركونا النتايج :)

ضفيرة منخفضة افقية

الضفيرة من التسريحات البسيطة جدا وبتدي شكل حلو في نفس الوقت ونقدر ننوع فيها ونعملها بطرق كتير جدا, والطريقة اللي جيبنهالكم النهاردة سهلة وبسيطة جدا.

اقسمي الشعر نصين وضفري كل نص بس الضفيرة تحت على جوانب الشعر يعني تبدأي الضفيرة من الجنب وطول ما انتي نازلة تاخدي خصلة من الشعر تدخليها مع الضفيرة ولما تخلصي كل ضفيرة اربطيها باستك عشان متتفكش.

وبعدين خدي كل ضفيرة ثبتيها الناحية التانية بالبنس, وكده التسريحة تبقى خلصت ومش هتاخد منك دقايق في تنفيذها.

ديل حصان منخفض مع وردة

تسريحة سهلة وبسيطة جدا ومش هتاخد منك وقت في تنفيذها, هناخد جزء من الشعر من تحت نعمله ديل حصل ونربطه باستك صغير ونضفر الجزء ده ونربطه باستك تاني من تحت عشان ميتفكش وبعدين نلفه جوه بعضه ونثبته بالبنس.