نصايح بنات حوا السريعة لوضع الروج وجمال الشفايف

حافظي على ترطيب الشفايف مع الروج المات

الروج المات على قد ما بيبقى حلو جدا على الشفايف وبيثبت فترة طويلة لكن بتكون مشكلتة انه بينشف الشفايف, وعشان نتخلص من المشكلة دي بطريقة بسيطة جدا ادهني شفايفك قبل الروج بكمية بسيطة جدا من زيت جوز الهند او زيت اللوز الحلو او زيت الارجان وبعدين حطي الروج, هتحافظي على ترطيب الشفايف وهيطلع شكلها احلى مع الروج.

افضل الوان روج هتبين سنانك ابيض

اكيد اختيار الوان الروج المناسبة من الخطوات المهمة جدا في المكياج عشان تكمل اللوك بتاعنا, واختيار اللون بيلعب دور مهم في ابتسامتنا وانه يظهرها بشكل احلى, والنهاردة هنقول لكل بنات حوا افضل درجات الوان الروج اللي ممكن تبين سنانك بيضا اكتر.

1- البينك الشاحب:

الوان احمر الشفايف النيود من درجات الالوان اللي ممكن تبين السنان لونها اصفر اكتر, عشان كده الافضل انك تستبدليها بدرجات البينك الفاتح مع لمعة بسيطة.

2- البينك التوتي:

البينك التوتي من الالوان اللي هتظهر سنانك بيضا اكتر ومشرقة.

3- بينك مع تاتش ازرق:

احمر الشفايف المات باللون البينك مع تاتش لون ازرق خفيف بيخفي البقع الصفرا من السنان.

4- الفوشيا:

درجات الفوشيا من الالوان المشرقة جدا اللي هتخلي ابتسامتك احلى وهتبين سنانك ابيض.

5- الاحمر الغامق:

الاحمر الغامق من الالوان اللي ممكن تبين سنانك ابيض من 1 – 2 درجة, وعشان تدي تأثير اقوى واوضح ممكن تحطي طبقتين من اللون على شفايفك.

6- الاحمر العميق:

الاحمر العميق هو الدرجة الاغمق من الدرجات اللي فاتت كمان من الالوان اللي بتدي السنان بياض ومظهر مشرق جدا.

حولي الروج لمات بالنشا

لو عندك روج بيلمع وعايزة تحوليه لمات بطريقة سهلة جدا بعد ما تحطي الروج حطي عليه نشا بصوبعك او بالفرشةوبعدين شيلي اي زيادات من النشا من على الشفايف بالفرشة هتلاقي الروج بتاعك اتحول لمات.

اعملي تاتو الشفايف او الـ Peel off بنفسك في البيت

اكيد معظمنا سمع عن تاتو الشفايف او الـ Peel off اللي انتشر اوي الفترة الاخيرة اللي هو بيكون زي الروج وبيتحط على الشفايف وبيتقشر وبيدي لون وردي طبيعي ثابت على الشفايف, احنا هنقولكم ازاي نعمل تاتو الشفايف ده بنفسنا في البيت بمكونات سهلة جدا وبسيطة.

– اول حاجة هنقشر الشفايف بالمقشر عشان نشيل اي جلد ميت والشفايف تبقى ناعمة واللون يطلع حلو عليها ميبقاش مبقع.

– دلوقتي هنحضر التاتو وهو عبارة عن معلقة صغيرة مية مغلية هنضيف عليها معلقة صغيرة جيلاتين بودر ونخلطهم كويس مع بعض لحد ما يبقى سمكها متوسط مش خفيف ولا تقيل, وبعدين هنحط على الخليط ده دم الغزال لحد ماتدينا اللون اللي احنا عايزنيه لو عايزة الشفايف يادوب وردي فاتح حطي دم غزال بسيط لو عايزاها لونها احمر او وردي غامق شوية زودي كمية دم الغزال.

– هنحط الخليط على الشفايف ونسيبه لحد ما ينشف خالص, وخلال ما احنا سايبينه منحركش بوقنا او شفايفنا عشان اللون ميجيش على السنان, وبعد ما ينشف خالص هنقشرة هنلاقي الشفايف بقى لونها وردي طبيعي تحفة.

عشان تكبري شفايفك

لو عايزة شفايفك تبان بشكل اكبر هتغطي الشفايف كلها بالكونسيلر وخلي الكونسيلر بره حدود الشفايف, وبعدين بقلم التحديد ارسمي شفايفك بالحجم اللي انتي عايزاه وبعدين حطي الروج وملمع الشفايف.

عشان تخلي شفايفك شكلها ممتليء

لو عايزة تبيني شفايفك شكلها ممتليء اكتر وتبان احلى حطي كونسيلر فاتح على منطقة وسط الشفايف وادمجيه بصوابعك على الشفايف, وبعدين حطي ملمع شفايف بلون شفايفك.